Batamela Kgauswi le Modimo

“Jehofa ke Modiši wa ka”

LEBELELA seswantšho se se lego letlakaleng le. Na o lemoga kamoo kwana e ikwago e šireletšegile ka gona ge e le sehubeng sa modiši wa yona? Go Psalme 23, Beibele e diriša papišo ya modiši le dinku tša gagwe go swantšhetša tlhokomelo e lerato yeo Jehofa a e neago barapedi ba gagwe. O nyaka gore re ikwe re šireletšegile go swana le bao ba bolelago ka kgodišego go swana le Dafida ba re: “Jehofa ke Modiši wa ka.” *—Temana 1.

Mongwadi wa psalme ye, e lego Dafida, e be e le modiši ge e be e sa le mofsa. O be a tseba dinyakwa tša dinku le boikarabelo bja modiši. Dafida, yo a ilego a hlokomelwa ke Modimo bophelong bja gagwe, o ngwadile seo se bitšwago “psalme ya kgonthišetšo goba ya potego.” Leina la Modimo la Jehofa, le tšwelela mathomong le mafelelong a psalme ye. (Ditemana 1, 6) Mantšu a magareng a bontšha ditsela tše tharo tšeo ka tšona Jehofa a hlokomelago batho ba gagwe go swana le modiši yo a hlokomelago dinku tša gagwe.—Psalme 100:3.

Jehofa o eta dinku tša gagwe pele. Dinku di a timela ge di se na modiši wa tšona. Ka mo go swanago, re tsoma thušo ya go hwetša tsela e nepagetšego bophelong. (Jeremia 10:23) Dafida o hlalosa gore Jehofa o hlahla batho ba gagwe a ba iša “mafulong a matala” le “mafelong a boikhutšo a nago le meetse a mantši.” O ba sepediša “ditseleng tša toko.” (Ditemana 2, 3) Diswantšho tše tša mafulo di re kgonthišetša gore re ka bota Modimo. Ka go latela tlhahlo ya moya wa gagwe yeo e lego ka Beibeleng, re ka phela ka tsela yeo e tlišago kgotsofalo, tapologo le tšhireletšego.

Jehofa o šireletša dinku tša gagwe. Ge di se na modiši wa tšona, dinku di a boifa e bile di ikwa di se na thušo. Jehofa o botša batho ba gagwe gore ga se ba swanela go boifa, gaešita le ge ba “sepela moeding wa kgampi ya leswiswi”—nakong ya seo se ka bonagalago e le dinako tša leswiswi bophelong. (Temana 4) Jehofa o a ba hlokomela e bile o dula a loketše go ba thuša. A ka fa barapedi ba gagwe bohlale le matla ao ba a nyakago e le gore ba lebeletšane le diteko.—Bafilipi 4:13; Jakobo 1:2-5.

Jehofa o fepa dinku tša gagwe. Dinku di ithekgile ka modiši wa tšona gore a di hweletše dijo. Re na le senyakwa sa moya seo se ka kgotsofatšwago feela ka thušo ya Modimo. (Mateo 5:3) Re leboga gore Jehofa ke Monei yo a nago le seatla se se bulegilego, yo a tekago tafola e tletšego dijo pele ga bahlanka ba gagwe. (Temana 5) Beibele le dithušo tša go ithuta Beibele, tše bjalo ka makasine wo o o balago, ke mothopo wa dijo tša moya tšeo di kgotsofatšago go nyaka ga rena go tseba morero wa bophelo le morero wa Modimo ka rena.

Dafida o ile a ikwa a šireletšegile e bile a tseba gore ge e ba a ka dula a le kgauswi le Modiši wa gagwe wa legodimong, o be a tla hlokomelwa ke Jehofa ka lerato “mehla yohle ya bophelo bja [gagwe].” (Temana 6) Na o hlologetše tšhireletšego e bjalo? Ge e ba go le bjalo, ithute kamoo o ka batamelago kgauswi le Jehofa ka gona. Ka go re’alo, o ka ikwa o šireletšegile ka diatleng tša Modiši yo Mogolo, yo a etago pele, a šireletšago e bile a fepago bao ba mmotegelago.—Jesaya 40:11.

Mmalo o šišintšwego bakeng sa May:

▪ Jobo 38–Psalme 25

[Mongwalo wa tlase]