Fuena Ku Huku

“Jeova Oe Omunthita Wange”

TALA olutalatu olu pefo apa. Upondola okusoka epamo okandyona aka kena ponkhondo yomunthita wako? Mo Salmo 23, Ombimbiliya ipopia ongeleka yomunthita, nonongi mbae, pala okulekesa oluembia Jeova ena novafendi vae. Oe uhanda tukale nepamo ngo liomuhoneki wono salmu David wati: “Jeova oe omunthita wange.” a—Oversikulu  1.

David omuhoneki wo salmu oyo, pouna wali omunthita. Oe ankho wii oityi onongi mbesukisa, novilinga viomunthita. Mokonda David, watekulilue nawa na Huku, wahoneka etyi tyitiwa “o salmu yonthumbi.” Mo salmu oyo, enyina lia Huku, Jeova, limonekamo tunde konthyimbi alo konthyulilo. (Oversikulu 1 no 6) Onondaka mbukahi pokati mbulekesa ononkhalelo ononthatu Jeova atekula ovanthu vae, ngetyi omunthita ayunga onongi mbae.—Salmo 100:3.

Jeova uhongolela onongi mbae. Onongi mbuhena omunthita mbuvomba. Tupu, nonthue tuesukisa okukuatesuako opo tuvase ondyila yaviuka yomuenyo. (Jeremias 10:23) David, wahangununa okuti Jeova uhongolela ovanthu vae “konofika mbeholi liatalala,” no “konomphangu mbokupululukwa mbatapelwa nawa.” Oe uvehongolela “monondyila mbouviuki.” (Oversikulu 2 no 3) Onondaka ombo mbulekesa okuti tupondola okuyumba onthumbi mu Huku. Mokulandula ehongolelo Huku etuavela Mombimbiliya, matukala nomuenyo weeta ehambu, nombembwa, nepameko.

Jeova wamena onongi mbae. Onongi mbuhena omunthita, mbuna owoma nokuhena ombatelo. Jeova upopila ovanthu vae okuti kavesukisa okukala nowoma, alo umwe tyina ‘vakuata mevota liapuputa’—mokueenda kuomivo viovitateka momuenyo vikahi ngenthiki. (Oversikulu 4) Jeova uveyunga nawa, nokuatokola okuvekuatesako. Oe upondola okuavela ovafendi vae ounongo nononkhono vesukisa, opo vafinde ovitateka.—Filipenses 4:13; Tiago 1:2-5.

Jeova ulisa onongi mbae. Onongi mbutei komunthita wambo pala okuvasa okulia. Nonthue tuesukisa okulitekula mopaspilitu, iya otyo tyitei vala kombatelo ya Huku. (Mateus 5:3) Tupandula Jeova Omuavi omukwatyali, wavela ovaumbili vae okulia okunyingi. (Oversikulu 5) Ombimbiliya nomikanda ovikuavo tuundapesa pokulilongesa Ombimbiliya, ngomukanda uno ukahi nokutanga, ondyivindyivi yokulia kuopaspilitu kutukuatesako okunoñgonoka etyi tualingilwa nevangelo Huku ena nonthue.

David ankho ulitehelela okuti wapama, mokonda ankho utyii okuti inkha atualako tyafuena Komunthita wae wokeulu, Jeova memutekula noluembia “ononthiki ambuho mbomuenyo [wae].” (Oversikulu 6) Ove uhanda epamo olio? Inkha uhanda, lilongesa oñgeni upondola okufuena vali ku Jeova. Ngotyo, molitehelela okuti wapama pomaoko Omunthita Omunene, una uhongolela, nokuamena, nokulisa vana vatualako okukolela mwe.—Isaías 40:11.

[Onondaka Poutoi]