Twe Bikye Nyamenle

‘Gyihova Le Me Neavolɛ’

NEA nvoninli ne mɔɔ wɔ mukelɛ ɛhye la. Boane ne mɔɔ la mboaneneavolɛ ne akɛnra nu la lɛ banebɔlɛ, ɔnle zɔ ɔ? Wɔ Edwɛndolɛ 23 ne anu, Baebolo ne fa kɛzi Gyihova nea ye azonvolɛ la toto kɛzi mboaneneavolɛ nea ye mboane la anwo. Gyihova kpondɛ kɛ yɛnyia banebɔlɛ na yɛfa anwodozo yɛka edwɛndolɛnli Devidi edwɛkɛ ne bie kɛ: ‘Gyihova le me Neavolɛ.’ *—Ngyɛnu 1.

Ɛnee Devidi mɔɔ hɛlɛle edwɛne ɛhye la le mboaneneavolɛ wɔ ye ngakula nu. Ɛnee ɔze mɔɔ mboane hyia nwolɛ yɛɛ gyima mɔɔ ɔwɔ kɛ mboaneneavolɛ yɛ la. Devidi mɔɔ Nyamenle nleanle ye wɔ ye ɛbɛlabɔlɛ nu la hɛlɛle mɔɔ bɛfɛlɛ ye kɛ “edwɛne mɔɔ maa anwodozo” la. Nyamenle duma Gyihova ne finde edwɛne ɛhye mɔlebɛbo yɛɛ ye awieleɛ. (Ngyehyɛnu 1,,  6) Edwɛkɛ mɔɔ wɔ nu la kile ndenle nsa mɔɔ Gyihova dua zo nea ye menli kɛmɔ mboaneneavolɛ nea ye mboane la.—Edwɛndolɛ 100:3.

Gyihova kile ye mboane ne adenle. Mboane mɔɔ ɛnlɛ neavolɛ la ta minli. Zɔhane ala a yɛhyia moalɛ amaa yɛanwu ɛbɛlabɔlɛ adenle kpalɛ ne a. (Gyɛlɛmaya 10:23) Devidi hilehilele nu kɛ Gyihova kile ye menli ne adenle kɔ “ndile amolɛ” nee “nzukpa mɔɔ gyi diinyi la anwo.” Ɔfa bɛ ɔdua “ndenle fɔɔnwo nu.” (Ngyehyɛnu 2,,  3) Ndile ɛhye mɔ mɔɔ bɛva bɛyɛ ndonwo wɔ ɛke la maa yɛnwu kɛ yɛkola yɛfa yɛ nwo yɛto Nyamenle anwo zo. Saa yɛdi sunsum ne adehilelɛ mɔɔ wɔ Baebolo ne anu la azo a, yɛbahola yɛabɔ ɛbɛla mɔɔ maa ahunlundwolɛ na yɛanyia banebɔlɛ.

Gyihova bɔ ye mboane nwo bane. Mboane mɔɔ ɛnlɛ neavolɛ la ɛnlɛ banebɔlɛ, yɛɛ bɛsulo. Gyihova se saa ye menli ne ‘lua ewule bɔnza nu’ anzɛɛ bɛyia tɛnlabelɛ mɔɔ yɛ ɛzulolɛ wɔ bɛ ɛbɛlabɔlɛ nu bɔbɔ a, bɛmmasulo. (Ngyɛnu 4) Gyihova nea bɛ na ɔbaboa bɛ. Ɔbahola yeamaa ye azonvolɛ nrɛlɛbɛ nee anwosesebɛ yeamaa bagyinla sɔnea biala anloa.—Felepaema 4:13; Gyemise 1:2-5.

Gyihova maa ye mboane ne aleɛ. Mboaneneavolɛ a boa bɛ mboane maa bɛnyia aleɛ a. Yɛlɛ sunsum nu ngyianlɛ bie mɔɔ Nyamenle ala a bahola aboa yɛ amaa yɛanyia a. (Mateyu 5:3) Yɛyɛ Gyihova mo kɛ ɔfi atiakunlukɛnlɛma nu ɔto ye azonvolɛ ɛkponle a. (Ngyɛnu 5) Baebolo ne nee mbuluku mɔɔ yɛfa yɛsukoa Baebolo ne mɔɔ le kɛ mɔɔ ɛlɛkenga ye kɛkala la le sunsum nu aleɛ mɔɔ boa yɛ a. Ɔmaa yɛnwu deɛmɔti bɛbɔle yɛ nee mɔɔ Nyamenle kpondɛ kɛ ɔyɛ ɔmaa yɛ la.

Ɛnee Devidi lɛ banebɔlɛ. Ɛnee ɔze kɛ saa ɔtwe ɔbikye Gyihova, ye anwuma Neavolɛ ne a, ɔbanlea ye “wɔ [ye] ngoane mekɛ nu amuala.” (Ngyɛnu 6) Asoo ɛkulo banebɔlɛ ɛhye? Saa ɛkulo a, ɛnee sukoa adenle mɔɔ ɛbalua zo wɔabikye Gyihova la. Ɛ nzo nu badwo wɔ wɔ Neavolɛ Kpole ne andɛba abo. Ɔluakɛ ɔkile bɛdabɛ mɔɔ bɛdi nɔhalɛ bɛmaa ye la adenle, ɔbɔ bɛ nwo bane yɛɛ ɔmaa bɛ aleɛ.—Ayezaya 40:11.

[Ɔ bo ɛkɛ ne edwɛkɛ]