Niwiyegereze Imana

“Yehova ni Umwungere wanje”

NURABE iyo foto iri kuri uru rupapuro. Woba ushobora kwumva ukuntu ako kagazi k’intama gatekaniwe kibereye mu gikiriza c’umwungere wako? Muri Zaburi ya 23, Bibiliya irakoresha ikigereranyo c’umwungere n’intama ziwe mu kwerekana ukuntu Yehova yitwararikana ikibabarwe abamusenga. Ashaka ko twumva dufise umutekano uronkwa n’abashobora kuvuga ata mazinda nka kumwe kwa wa mwanditsi w’amazaburi Dawidi, bati: “Yehova ni Umwungere wanje.” *​—Umurongo wa 1.

Umwanditsi w’iyi zaburi Dawidi, akiri muto yari umwungere. Yari azi ivyo intama zikenera be n’ibanga ry’umwungere. Dawidi, uwiboneye mu buzima bwiwe ukuntu Imana yitwararikana, yaranditse iyo zaburi yiswe “zaburi ituma umuntu ahera amazinda canke yizigira.” Izina ry’Imana ari ryo Yehova riraboneka mu ntango no mu mpera z’iyo zaburi. (Umurongo wa 1 n’uwa 6) Amajambo ari hagati y’iyo mirongo aradondora uburyo butatu Yehova yitwararikamwo abantu biwe nk’uko umwungere yitwararika intama ziwe.​—Zaburi 100:3.

Yehova arayobora intama ziwe. Intama zitari kumwe n’umwungere wazo kenshi zirazimira. Na twebwe nyene turakeneye imfashanyo kugira ngo dutore inzira nziza mu buzima. (Yeremiya 10:23) Dawidi asigura ko Yehova ayobora abantu biwe mu “maragiriro yuzuye ubwatsi” n’“ahantu h’ukuruhukira havomerewe neza.” Abayobora “mu mihora y’ubugororotsi.” (Umurongo wa 2 n’uwa 3) Ivyo bintu bitwibutsa ivyo umwungere akora biradukura amazinda ko twoshobora kwizigira Imana. Dukurikije ubuyobozi bw’impwemu y’Imana nk’uko buri muri Bibiliya, turashobora gukurikira inzira y’ubuzima ituma twumva dushize akanyota, turuhuriwe kandi dutekaniwe.

Yehova arakingira intama ziwe. Intama zitari kumwe n’umwungere wazo ziragira ubwoba kandi zikumva zitagira gitabara. Yehova abwira abantu biwe ko badakeneye kugira ubwoba, n’igihe mbere boba bariko “[ba]gendera mu mubande w’igitutu kizitanye,” ni ukuvuga mu bihe vyoshobora gusa n’umwiza bigoye kuruta ibindi mu buzima. (Umurongo wa 4) Yehova arabagumizako ijisho, yiteguriye kubafasha. Arashobora guha abamusenga ubukerebutsi n’inkomezi bakeneye kugira bahangane n’ibigeragezo.​—Abafilipi 4:13; Yakobo 1:2-5.

Yehova aragaburira intama ziwe. Intama zihanga amaso umwungere wazo ngo azironderere ivyo zirya. Hariho ivyo dukeneye mu vy’Imana, kandi dushobora kubironka ari uko gusa dufashijwe n’Imana. (Matayo 5:3) Duhiriwe duhishije, Yehova ni Umutanzi atanga atitangiriye itama, atunganiriza abasuku biwe imeza inihiriye. (Umurongo wa 5) Bibiliya be n’ibikoresho bidufasha kuyiga, nk’iki kinyamakuru uriko urasoma, ni isôko ry’imfungurwa zo mu vy’Imana zituma tumenya ivyo dukeneye kumenya ku bijanye n’intumbero y’ubuzima be n’umugambi Imana idufitiye.

Dawidi yumva atekaniwe, azi ko aramutse agumye yiyegereje Umwungere wiwe wo mw’ijuru azokwibonera ukuntu Yehova amwitwararika mu buryo buranga urukundo “imisi yose y’ubuzima [bwiwe].” (Umurongo wa 6) Woba wipfuza gutekanirwa muri ubwo buryo? Nimba uvyipfuza, niwige ingene ushobora kwiyegereza Yehova. Gutyo urashobora kwumva utekaniwe uri mu maboko ya wa Mwungere Mukuru ayobora, agakingira kandi akagaburira abaguma ari intahemuka kuri we.​—Yesaya 40:11.

Aho turemeshejwe gusoma muri Rusama:

▪ Yobu 38-42–Zaburi 1-25

[Akajambo k’epfo]