Ga nduru na Nzapa

‘Jéhovah ayeke Berger ti mbi’

MO BÂ foto so ayeke na lê ti mbeti so? Mo bâ tongana nyen molenge ti ngasangbaga so aduti nzoni na kate ti berger ti lo nga so mbeto asara lo pëpe? Na Psaume 23, Bible asara tënë ti mbeni berger na angasangbaga ti lo ti fa tongana nyen na ndoye Jéhovah ayeke bâ lege ti azo so ayeke voro lo. Jéhovah aye si e duti nzoni tongana ala so, na tapande ti David, alingbi ti tene na bê kue: “[Jéhovah, FD] ayeke Berger ti mbi.” *​—Versê 1.

David, so asû psaume so, ayeke lani mbeni berger na ngoi so lo de maseka. Lo hinga ye so angasangbaga ayeke na bezoin ni nga na aye so a lingbi mbeni berger asara. David, so abâ tongana nyen na ndoye Nzapa abâ lege ti lo, asû ye so a iri ni “psaume ti dengo bê.” A yeke wara iri ti Nzapa, Jéhovah, na yâ ti kozo versê ni nga na ndangba versê ni (versê 1, 6). Tanga ti aversê ni afa aye ota so Jéhovah ayeke sara ti bâ lege ti azo ti lo tongana ti so mbeni berger ayeke bâ lege ti angasangbaga ti lo.​—Psaume 100:3.

Jéhovah afa lege na angasangbaga ti lo. Tongana mbeni berger ayeke dä pëpe ti fa lege na angasangbaga ti lo, ala yeke hinga pëpe ndo so a lingbi ala gue dä. Legeoko nga, e yeke na bezoin ti tene a mû maboko na e si e mû nzoni lege so ague na fini (Jérémie 10:23). David atene so Jéhovah ague na azo ti lo na “benyama so fini pere ayeke dä” nga na “tere ti ngu so asua na ngangu pëpe.” Lo fa na ala “lege ti mbilimbili”. (Versê 2, 3). Aye so afa na e so e lingbi ti zia bê ti e kue na Nzapa. Tongana e mû peko ti fango lege ti Nzapa so ayeke na yâ ti Bible, e yeke mû lege ti fini so ayeke sara si e duti na ngia na yâ ti aye so e yeke na ni, bê ti e ayeke dë nga e yeke duti na siriri.

Jéhovah abata angasangbaga ti lo. Tongana berger ayeke na tere ti angasangbaga pëpe, mbeto ayeke sara ala nga ala lingbi ti sara mbeni ye pëpe. Jéhovah atene na azo ti lo ti sara mbeto pëpe, même na ngoi so ala “hon na popo-hoto ti bingo ti kui” so ti tene na angoi ti ngangu (versê 4). Jéhovah ayeke bâ ndo na ndo ti ala na lo yeke nduru ti mû maboko na ala. Lo yeke mû na azo ti lo ndara nga na ngangu so ala yeke na bezoin ni ti luti na gbele akpale.​—aPhilippien 4:13; Jacques 1:2-5.

Jéhovah amû kobe na angasangbaga ti lo. Berger la ayeke gi ka kobe na angasangbaga ti lo. E yeke na bezoin ti aye ti yingo so gi Nzapa la alingbi ti mû maboko na e ti wara ni (Matthieu 5:3). Ye ti nzoni ni ayeke so, Jéhovah so ayeke mû ye mingi na zo azia na gbele azo ti lo gbâ ti akobe ti tengo ni (versê 5). Bible nga na ambeti so azi nda ti Bible, na tapande Tour ti Ba Ndo so mo yeke diko so, ayeke akobe ti yingo so amû lege na e ti hinga ndani so e yeke na fini nga na ye so Nzapa aleke ti sara teti e.

David aduti lani nzoni, lo hinga so tongana lo ngbâ lakue nduru na tere ti Jéhovah so ayeke Berger ti lo, lo yeke bâ lege ti lo na “lâ ti fini ti [lo] kue” na ndoye (versê 6). Mo nga kue mo ye ti duti nzoni tongaso? Tongana a yeke tongaso, gi ti hinga tongana nyen mo lingbi ti ga nduru na Jéhovah. Mo yeke bâ so mo duti nzoni na yâ ti maboko ti Kota Berger, so ayeke fa lege na azo so angbâ lakue be-ta-zo na lo, so ayeke bata ala nga so ayeke mû kobe na ala.​—Ésaïe 40:11.

[Kete tënë na gbe ni]