Ia Mafuta Atu i le Atua

“O Ieova o Loʻu Leoleo Mamoe o Ia”

SEʻI tagaʻi foʻi i le ata i lenei itulau. O loo opo ma le māfana e le leoleo mamoe le tamaʻi mamoe. I le Salamo 23, ua faatusaina le alofa o Ieova i ona tagata tapuaʻi, i le alofa o se leoleo mamoe i ana mamoe. E finagalo o Ia ina ia tatou lagona le saogalemu, e pei ona iai iā Tavita, o lē na faapea mai: “O Ieova o loʻu Leoleo Mamoe o ia.” *​—Fuaiupu 1.

O Tavita lē na tusia lenei salamo, sa avea ma leoleo mamoe a o talavou. Na iloa e ia mea e manaʻomia e mamoe ma tiute o se leoleo mamoe. Na iloa foʻi e ia le lelei o le tausiga a le Atua iā te ia, o lea na ia tusia ai se solo ua taʻua “o le salamo o le faamautinoaga.” I le amataga ma le faaiʻuga o le salamo, o loo taʻua ai le suafa o Ieova. (Fuaiupu 1, 6) O loo faamatala i isi fuaiupu o le salamo auala e tolu o loo tausia ai e Ieova ona tagata, e pei ona tausia e se leoleo mamoe o lana lafu.—Salamo 100:3.

E taʻitaʻia e Ieova lana lafu. E faigofie ona leiloloa mamoe pe a leai so latou taʻitaʻi. E faapena foʻi ona tatou manaʻomia se taʻitaʻiga ina ia iloa le ala tonu e ui ai. (Ieremia 10:23) Ua faapea mai Tavita, e taʻitaʻia e Ieova ona tagata i “laufanua lauolaola,” ma “mea e mālōlō ai e iai vai.” E na te taʻitaʻi i latou “i ala o le amiotonu.” (Fuaiupu e 2, 3) O nei faamatalaga e uiga i se leoleo mamoe, ua faamautinoa mai ai e mafai ona tatou faatuatuaina le Atua. E tatou te maua se olaga e fiafia, faafouina ai ma saogalemu, pe a mulimuli i le taʻitaʻiga a lona agaga e tusa ai ma le Tusi Paia.

E puipuia e Ieova ona tagata. E lagona e mamoe le fefefe ma le tuulafoaʻiina, pe a leai so latou leoleo mamoe. Ua fetalai mai Ieova i ona tagata, e aua le fefefe, e ui ina savavali i “le vanu e matuā pogisa” po o taimi e sili ona faigatā o le olaga. (Fuaiupu e 4) O loo tausia i latou e Ieova, ma ua sauni o ia e fesoasoani mai. E na te foaʻi mai i ana auauna le poto ma le malosi e feagai ai ma puapuaga.—Filipi 4:13; Iakopo 1:2-5.

E fafagaina e Ieova ana mamoe. E faalagolago mamoe i lo latou leoleo mamoe, e tataʻi i latou i mea e maua ai mea e ʻai. E na o le Atua e mafai ona faamalieina o tatou manaʻoga faaleagaga. (Mataio 5:3) E tatou te faafetaia Ieova ona ua ia saunia maia se taumafataga tele mo ana auauna. (Fuaiupu e 5) Ua saunia mai taumafa faaleagaga e ala i le Tusi Paia ma lomiga e iai le lomiga lenei, e faamalieina ai lo tatou fia malamalama i le uiga o le olaga ma le finagalo o le Atua mo i tatou.

Na lagona e Tavita le saogalemu i le iloaina, afai e faalatalata atu pea i lona Leoleo Mamoe o Ieova, o le a ia tausia pea o ia ma le alofa i ʻaso uma o lona ola.’ (Fuaiupu e 6) Po o e fia maua lenā lagona? Ia e aʻoaʻo le auala e faalatalata atu ai iā Ieova, ma maua ai le saogalemu i aao alofa o le Leoleo Mamoe Sili, o lē e taʻitaʻia, puipuia, ma fafagaina i latou e faamaoni pea iā te ia.—Isaia 40:11.

Faitauga Tusi Paia mo Mē:

▪ Iopu 38-42–Salamo 1-25

[Faaopoopoga i lalo]