Miharinea An’Andrianagnahare

“I Jehovah ty Mpiarake Ahy”

HENTEO i sare ankavana etiagney. Tsy matahotahotse i anak’agnondrỳ ty amy i tratra i mpiarake azey ey. Ampitovie ty Baiboly amy ty mpiarake agnondry mikarakara ty agnondri’e ty Jehovah amy Salamo 23 ao, naho fa mikarakara ty mpanompo’e. Tea’e tsy hinekoneko tikagne, le ho agnisa ty hirehake manahake i Davida mpanao salamo toy tie: “I Jehovah ty Mpiarake ahy.” *—Andine’e 1.

I Davida ty nanoratse io, sady mpiarake agnondry reke tamy i reke mbe nitanora. Fanta’e ty raha ilae o agnondrio naho ty andraiky o mpiarake agnondrio. Tsapa’e ka fa mikarakara aze ty Andrianagnahare, le nanoratse i atao tihoey “salamo magnomey toky naho fanantenagney” reke. Trea amo o andine’e voaloha’e naho fara’e amo o salamo iohoe ty tahinan’Andrianagnahare tihoe Jehovah. (Andine’e 1, 6) Rehafe’e antegnantegna’e eo ka ty fomba telo anehoa i Jehovah fikarakaragne ty vahoa’e, manahake ty atao ty mpiarake agnondry amy ty agnondri’e.​—Salamo 100:3.

Mitarike ty agnondri’e ty Jehovah. Mateteke montso o agnondrio naho fa tsy misy mpiarake. Mipay fagnampeagne ka tikagne amy ty fiaignagne mba hahafantarantikagne ty lalagne hombagne. (Jeremia 10:23) Nirehake ty Davida fa ninday ty vahoa’e “amy ty toeragne feno akata maintso” naho “amy ty toeragne azon-drano soa” ty Jehovah. Mitarike iareo “amy ty lala ty hamarenagne” ka reke. (Andine’e 2, 3) Antoke ho antikagne zay fa afake matoky an’Andrianagnahare tikagne. Hahafa-po naho hahafinaritse vaho hilamigne ty fiaignantikagne, naho magneke hotarihe i fagnahỳ, le magnorike ty tari-dalagne amy Baiboly ao.

Miaro ty agnondri’e ty Jehovah. Matahotse naho tsy le manam-piarovagne o agnondrio naho tsy eo i mpiarake azey. Misaontsy amy ty vahoa’e ty Jehovah fa tsy toko’e hatahotse iareo, ndra tie “miranga ambavatane ty iembey”, ty dika izay agnate ty fotoan-tsarotse amy ty fiaignagne. (Andine’e 4) Miambegne iareo ty Jehovah, sady vognogne hagnampe naho fa mipay fagnampeagne iareo. Afake magnomey fahendreagne naho hery hiatreha iareo fitsapagne reke.​—Filipianina 4:13; Jakoba 1:2-5.

Magnomey hanegne ty agnondri’e ty Jehovah. Tsy mahatrea hanegne o agnondrio naho tsy ampea ty mpiarake aze. Tsy mahazo ze raha ilaentikagne ara-pagnahy ka tikagne naho tsy ampean’Andrianagnahare. (Matio 5:3) Soa avao fa matarike ty Jehovah, i Mpagnomey ze raha ilaegney, le magnomagne tihy feno hanegne aloha ty mpanompo’e eo. (Andine’e 5) Amy Baiboly ao naho amo o boke ara-baibolio manahake ty gazete vakie’o toy, ty misy ty hanegne ara-pagnahy ilaentikagne. Magnampe antikagne reke mba hahafantatse ty dika ty fiaignagne naho ty raha safirien’Andrianagnahare ho antikagne.

Tsy ninekoneko ty Davida, satria fanta’e fa naho mifandrambe marine avao amy i Mpiarake aze an-dagnitse agney reke, le ho tea’e naho ho karakarae’e ‘agnate ty androm-piaigna’e.’ (Andine’e 6) Izay vata’e vao ty irie’o? Fantaro areke tie ino ty toko’e hatao’o mba harine i Jehovah avao rehe. Amy izay rehe tsy hinekoneko, an-tratra i Mpiarake Lahibey eo, i mitarike naho miaro vaho magnomey hanegne hoahy ze tsy mivalike ama’ey.​—Isaia 40:11.

Famakiagne Baiboly amy Mey:

▪ Joba 38-42–Salamo 1-25

[Fagnamarehagne ambane peje]