Kporom Hen Aôndo

‘Yehova Ka Orkuran Mo’

KENGER foto u sha peeji ne. Ú nenge er waniyôngo la a tem hoghom hoghom shin ikyum i orkuran na, i kpe un iyol kpishi kpa? Bibilo yar tom a gbenda u orkuranilev nan eren a ilev mbi nan la sha u tesen er Yehova a nengen sha mbacivir un kundu kundu la ken Pasalmi u sha 23. A soo ér se zua a mkor u mba vea fatyô u kaan vangertiôr ér “[Yehova] ka orkuran mo,” er orngeren pasalmi Davidi kpa yange kaa nahan la. *—Ivur i sha 1

Davidi u yange nger pasalmi ne la, lu orkuranilev shighe u lu iyev la. Yange fa mbamgbe mba iyôngo kua ityom i orkuranilev nan lu a mi la. Davidi u Aôndo nenge sha a na doo doo la yange nger pasalmi u i yer ér “pasalmi u tesen vangertiôr shin jighjigh u nan” la. I hii shi i kure Pasalmi ne sha iti i Ter. * (Ivur 1, 6) Asember a a lu hen atô u avur ne la tese igbenda itiar i Yehova a nengen sha ior nav kundu kundu, er orkuranilev ka nan nenge sha iyôngo i nan la.—Pasalmi 100:3

Yehova hemen iyôngo na. Iyôngo i í lu a orkuran i ga yô, ia fatyô u saan. Kape se kpa i gbe u a wase se ve se zua a gbenda u zan ken uma je la. (Yeremia 10:23) Davidi pase ér, Yehova ka a hemen ior nav a za a ve henpe “agumatoho a hem” shi “mngerem ma ma lu ving” ma lu yô. Ngu a hemen ve sha “igbenda i perapera.” (Ivur 2, 3) Akaa a tesen ikyo i wan tsung ne wase se u kaven wang ér se fatyô u suur sha Yehova. Aluer se mba dondon hemen u jijingi na er i tese ken Bibilo la yô, se fatyô u zan sha gbenda u uma u ua na se mkom man mpeveryol kua Mkor la.

Yehova kor iyôngo na. Aluer iyôngo ngi a orkuran ga yô, ia lu ken mcie shi ia zua a iwasen kpaa ga. Yehova kaa a ior nav ér ve de cie ga, aluer vea “karen ken pev u mure u kuugh,” sha shighe u i lu inja er ve hemba tagher a akaa a vihin tsung ken uma ve je kpaa. (Ivur 4) Yehova ngu kuran ve, shi a kegh a kegh iyol u wasen ve kpaa. Una fatyô u nan mbacivir un kwaghfan man agee sha er vea wa ishima a ameen yô.—Mbafilipi 4:13; Yakobu 1:2-5.

Yehova koson iyôngo na. Iyôngo ka i har sha orkuran u i ér a naan i kwaghyan. Se mba a mgbe u ken jijingi u i lu Aôndo tseegh una fatyô u wasen se kuren yô. (Mateu 5:3) Kwagh er doo yô, Yehova ngu Or u wan nagh, ne mbacivir un kwaghyan u ken jijingi mgbeghaa. (Ivur 5) Bibilo man ityakerada i wasen se u henen Bibilo, er magazin u u lu ôron ne nahan, ka igbenda i se zuan a kwaghyan u ken jijingi, ua wasen se u kuren isharen i se lu a mi i kaven inja i uma man awashima u Aôndo sha ci wase la.

Davidi yange nenge ér un ngu ken mkor shi fa ér aluer un za hemen u lun ikyua a Orkuran un u sha la yô, una zua a mkor u Yehova u sha dooshima la “sha ayange a uma [na] cii.” (Ivur 6) Ka imba mkor u i sar u u̱ zuan a mi laa? Aluer ka nahan yô, hen ase er u fatyô u kporom ikua a Yehova yô. U er nahan yô, u fatyô u zuan a mkor sha uwegh ku Orkuranilev u Hemban, u a hemen shi a kuran shi a koson mba ve ze hemen u suur sha a na la.—Yesaia 40:11

[Ngeren mba shin kpe]