“Jehova Em i Wasman Bilong Mi”
Go Klostu Long God
“Jehova Em i Wasman Bilong Mi”
LUKIM piksa long dispela pes. Yu inap pilim bel isi bilong dispela pikinini sipsip em wasman i holim klostu long bros bilong em? Long Song 23, Baibel i tok piksa long wasman na sipsip bilong en bilong makim gutpela pasin bilong Jehova long lukautim ol manmeri i save lotuim em. Em i laik bai yumi pilim tru dispela bel isi i save kamap long ol man, na olsem Devit ol inap tok: “Jehova em i wasman bilong mi.” *—Ves 1, NW.
Devit, em man bilong raitim dispela song, na taim em i mangi yet em i wanpela wasman bilong sipsip. Em i save long ol samting ol sipsip i mas kisim na ol wok bilong wasman. Devit i bin pilim tru gutpela pasin bilong God long lukautim em, na em i raitim dispela song em wanpela buk i kolim olsem “song i kamapim bilip.” Nem bilong God, Jehova, i stap long kirap na pinis bilong dispela song. (Ves 1, 6, NW) Ol tok i stap namel i stori long 3-pela pasin bilong Jehova long lukautim lain bilong em olsem wasman i save lukautim ol sipsip bilong em.—Song 100:3.
Jehova i save go pas na bringim ol sipsip bilong em. Ol sipsip i no gat wasman ol i save paul na lus nabaut. Olsem tasol, yumi mas kisim helpim bilong painim stretpela rot bilong bihainim long laip bilong yumi. (Jeremaia 10:23) Devit i tok, Jehova i save bringim lain bilong em i go long ples i gat “gutpela gras” na long ‘ol liklik wara ol i ken dring na malolo.’ Na em i save bringim ol i go “long ol gutpela rot.” (Ves 2, 3) Dispela tok piksa long ples i gat gutpela gras na wara, em i strongim yumi long bilip tru long God. Sapos yumi bihainim rot em God i makim olsem i stap long Baibel, yumi inap mekim ol samting long i stap bilong yumi na dispela i givim bel isi na nupela strong long yumi na yumi stap gut.
Jehova i save lukautim ol sipsip bilong em. Sapos ol sipsip i no gat wasman, ol bai pret na ol i no inap lukautim ol yet. Jehova i tokim lain bilong em olsem ol i no ken pret, maski ol i “wokabaut long ples nogut na bikpela tudak”—olsem long taim i gat bikpela hevi na taim nogut i painim ol. (Ves 4) Jehova i save was long ol na oltaim em i redi long helpim ol. Em inap givim savetingting na strong long ol manmeri i lotuim em bambai ol inap karim ol hevi i painim ol.—Filipai 4:13; Jems 1:2-5.
Jehova i save givim kaikai long ol sipsip bilong em. Ol sipsip i mas i gat wasman bilong painim kaikai bilong ol. Yumi tu i mas kisim ol kaikai bilong spirit, na God tasol inap helpim yumi long kisim. (Matyu 5:3) Yumi tenkyu long Jehova, em i Man Bilong Givim planti samting long yumi, na em i redim planti gutpela kaikai bilong spirit long givim long ol wokman bilong em. (Ves 5) Baibel na ol buk na nius i kamapim tok bilong Baibel, olsem dispela nius nau yu ritim, ol i gat ol gutpela kaikai bilong spirit i save helpim yumi long kisim save long as bilong i stap bilong yumi, na ol samting God i tingting pinis long mekim.
Devit i stap bel isi, long wanem, em i save olsem sapos em i stap klostu long Wasman bilong em long heven, Jehova bai lukautim em gut long “olgeta de [em i] stap laip.” (Ves 6) Yu gat laik tru long kisim kain bel isi? Sapos olsem, orait yu mas kisim save long olsem wanem yu ken i go klostu long Jehova. Long dispela rot yu bai pilim olsem yu stap gut tru long han bilong Bikpela Wasman, em i save bringim, lukautim, na givim kaikai long ol manmeri i stap gut long em.—Aisaia 40:11.
BAIBEL RITIM BILONG ME:
[Futnot]
^ Planti man bilong ritim Baibel i save gut long dispela tok: “BIKPELA em i Wasman bilong mi.” Bilong save long as na sampela Baibel i rausim nem bilong God, em Jehova, lukim pes 195-197 bilong buk Tru Tru Baibel i Tok Wanem?, em ol Witnes Bilong Jehova i wokim.
