“Yehova Ndiye Muliska Wane”
Sendelerani kwa Ciuta
“Yehova Ndiye Muliska Wane”
LAŴISKANI cithuzithuzi ico cili pa peji ili. Kasi mukuwona umo mberere iyi yiliri yakuvikilirika pa cifuŵa ca muliska wake? Mu Salmo cipaturo 23, Baibolo likuyelezgera umo muliska wakucitira na mberere zake kuti lilongosore umo Yehova wakupwelelelera awo ŵakumusopa. Yehova wakukhumba kuti nase tiŵe na civikiliro nga ico ŵali naco ŵanthu awo nga ni Davide ŵangayowoya na cigomezgo cose kuti: “Yehova ndiye muliska wane.” a—Vesi 1.
Davide ndiyo wakalemba Salmo ili ndipo apo wakaŵa muwukirano wakaŵa muliska. Wakamanyanga ivyo mberere zikukhumba kweniso milimo ya muliska. Davide wakawona umo Ciuta wakamupweleleranga, lekani wakalemba salmo ili, ilo likupembuzga ndiposo kupeleka cilindizga. Zina la Ciuta lakuti Yehova lili kulembeka pakwambilira ndiposo paumaliro wa salmo ili. (Mavesi 1, 6) Mavesi gha mukati ghakulongosora nthowa zitatu izo Yehova wakupwelelelera ŵanthu nga umo muliska wakucitira na mberere zake.—Salmo 100:3.
Yehova wakulongozga mberere zake. Para mberere zilije muliska zikuzgeŵa. Mwakuyana waka, nase tikwenera kovwirika kuti tende mu nthowa ya umoyo. (Yeremiya 10:23) Davide wakalongosora kuti, Yehova wakulongozgera ŵanthu ŵake ku “maluhari ghakuteketera” ndiposo “ku maji ghakudama.” Wakuŵalongozgera “mu nthowa za urunji.” (Mavesi 2, 3) Mazgu ghakuyelezgera agha ghakutisimikizgira kuti tikwenera kugomezga Ciuta. Para tikulondezga ulongozgi wa Ciuta uwo uli mu Baibolo, tingaŵa ŵakukhorwa, ŵakukondwa, ndiposo ŵakuvikilirika.
Yehova wakuvikilira mberere zake. Para muliska palije, mberere zikucita wofi ndiposo zikusoŵa cakucita. Yehova wakuphalira ŵanthu ŵake kuti ŵaleke kopa nanga ni para ‘ŵakwenda mu cinkhwawo ca munkhorwe wa nyifwa,’ panji kuti panyengo yakuti ŵasuzgika comene. (Vesi 4) Yehova wakuŵalaŵilira ndipo ngwakunozgeka kuŵawovwira. Wangapa awo ŵakumusopa mahara na nkhongono izo ŵakukhumbikwira mwakuti ŵazizipizge viyezgo.—Ŵafilipi 4:13; Yakobe 1:2-5.
Yehova wakulyeska mberere zake. Mberere zikugomezga muliska kuti wazisangirenge cakurya. Tili na njara yauzimu, ndipo ni Yehova yekha uyo wangatilyeska. (Mateyu 5:3) Tikuwonga kuti Yehova wali na mtima wa kupa, ndipo wanozgera ŵateŵeti ŵake vyakurya vinandi. (Vesi 5) Baibolo ndiposo mabuku ghakulongosora Baibolo, nga ni magazini iyi mukuŵazga, ni vyakurya vyauzimu ivyo vikumazga njara yakuti timanye cifukwa ico Ciuta wali kutilengera.
Davide wakawonanga kuti ngwakuvikilirika pakumanya kuti wawovwirikenge mu “mazuŵa ghose gha umoyo [wake]” para walutilira kudemelera kwa Muliska wake wakucanya. (Vesi 6) Kasi namwe mukukhumba civikiliro canthena? Usange ni nthena, sambirani umo mungasendelelera kwa Yehova. Para mwacita nthena muwonenge kuti muli ŵakuvikilirika mu mawoko gha Muliska Mukuru, uyo wakulongozga, kuvikilira, na kuryeska awo ŵakulutilira kuŵa ŵakugomezgeka kwa iyo.—Yesaya 40:11.
Vyaputala vya mu Baibolo Ivyo Mungaŵazga mu Meyi:
[Mazgu ghamusi]
a Mu Mabaibolo ghanyake mazgu agha ghali kulembeka kuti “Fumu ndi Muliska wane” ndipo ngakumanyikwa comene. Kuti mumanye cifukwa ico awo ŵakang’anamuranga Mabaibolo agha ŵali kulekera zina la Ciuta lakuti Yehova, wonani mapeji 195-197 mu buku la Kasi Baibolo Likusambizgaci Comenecomene? lakupharazgika na Ŵakaboni ŵa Yehova.