“Ko Sehova ʼe Ko Toku Tauhi Ovi”
Kotou Fakaovi Ki Te ʼAtua
“Ko Sehova ʼe Ko Toku Tauhi Ovi”
KOTOU fakasiosio age muʼa ki te pāki ʼo te pāsina ʼaenī. ʼE kotou logoʼi koa te fīmālie ʼa te ʼakeno ʼi tana lafilafi ki te fatafata ʼo te tauhi ovi ? ʼI te kāpite 23 ʼo te Pesalemo 23, neʼe fakaʼaogaʼi ʼi te Tohi Tapu te fakatātā ʼo te Tauhi Ovi mo tana ʼu ovi moʼo fakahāhā ia te tokaga ʼofa ʼa Sehova ki te hahaʼi ʼaē ʼe ʼatolasio age kiā te ia . ʼE loto e Sehova ke tou logoʼi te fimalie ʼaē ʼe maʼu e nātou ʼaē ʼe natou ʼui ʼaki he loto falala ohagē ko te tagata fai pesalemo ko Tavite: “Ko Sehova ʼe ko toku Tauhi Ovi.” *—Vaega 1.
Ko te tagata ae neʼe ina tohi te pesalemo, ia Tavite neʼe ko he tauhi ovi ʼi tona temi tūpulaga. Koia neʼe ina ʼiloʼi lelei te meʼa ʼaē ʼe ʼaoga ki te ʼu ovi pea mo te ʼu gāue ʼaē ʼe tonu ke fai e he tauhi ovi. ʼI te ʼu ʼaluʼaga kehekehe ʼo tona maʼuli neʼe ʼiloʼi e Tavite ko te ʼAtua neʼe tokaga ki ai, koia neʼe ina tohi ai te ʼu palalau ʼe fakahigoaʼi “ko te pesalemo ʼo te tui papau peʼe ʼo te falala.” Ko te huafa ʼo te ʼAtua, ʼaē ko Sehova ʼe tuʼu ʼi te kamata mo te fakaʼosi ʼo te Pesalemo. (Vaega 1, 6) Pea ko te ʼu vaega ʼaē ʼi lotomālie ʼe natou fakahā mai te tokaga ʼa Sehova ki tana hahaʼi iā ʼaluʼaga e tolu, ohagē pē ko te tokaga ʼa he tauhi ovi ki tana ʼu ovi.—Pesalemo 100:3.
Ko Sehova ʼe ina taki tana ʼu ovi. Ko te nofo ʼa te ʼu ovi kae mole honatou tauhi ovi ʼe feala ke natou hehē. ʼO toe fēia pē mo tātou, ʼe tonu ke ʼi ai hotatou tokoni ke tou maʼu te ala ʼaē ʼe totonu ki totatou maʼuli. (Selemia 10:23) Neʼe fakamahino e Tavite, ko Sehova ʼe ina takitaki tana hahaʼi ki “te ʼu koga meʼa lunaʼia ʼaē ʼe mahu ai te luna,” pea mo “te ʼu koga meʼa mālōlōʼaga ʼaē ʼe tatafe lelei ai te vai.” Pea ʼe ina toe taki ia nātou “ ʼi te ʼu ala foufou ʼo te faitotonu.” (Vaega 2, 3) Ko te ʼu pāki ʼaia ʼo ʼuhiga mo te gāue tauhi ovi ʼe ina fakalotomālohiʼi tātou ke tou falala ki te ʼAtua. ʼAki tatatou muliʼi ia te takitaki ʼa te ʼAtua ʼaē ʼe ina fakahā ʼi te Tohi-Tapu, ʼe feala hatatou taupau te ala ʼo te maʼuli ʼaē ʼe ina fakafealagia mai te maʼuli fakafeʼauga mo fīmālie.
Ko Sehova ʼe ina puipui tana faga ovi. Ko te ʼu ovi ʼe maʼuli tuʼania pea ʼe mole maʼu puleʼaki mo kapau ʼe puli tanatou tauhi ovi. Neʼe ʼui e Sehova ki tana hahaʼi ke ʼaua tanatou tuʼania tatau aipē peʼe natou “haʼele ʼi te malaʼe fakapōʼuli”—lolotoga te ʼu temi ʼaē ʼe faigataʼa ʼaupitō ai tonatou maʼuli. (Vaega 4) Ko Sehova ʼe leʼoleʼo kiā nātou pea mo nofo tokaga ke tokoni ki tana hahaʼi. ʼE ina foaki ki tana kau ʼatolasio ia te poto pea mo te mālohi ʼaē ʼe ina fakafealagia kiā nātou ke natou tekeʼi te ʼu faigataʼa.—Filipe 4:13; Sake 1:2-5.
Ko Sehova ʼe ina fafaga tana ʼu ovi. Ko te ʼu ovi ʼe fakalogo tanatou meʼa kai ki te tauhi ovi. Ko te meʼa kai fakalaumālie ʼaē ʼe ʼaoga kiā tātou, ʼe hoki maʼu pē ia mai te ʼAtua. (Mateo 5:3) Meʼa lelei he ko Sehova ʼe ina foaki lahi pea ʼe ina teuteuʼi ke mahu te meʼa kai ʼaē ʼi te laupapa. (Vaega 5) Ko te Tohi-Tapu mo te ʼu tohi Fakatohi-tapu, ohagē ko te nusipepa ʼaenī ʼe kotou lolotoga lau, ʼe ko te matapuna ʼaia ʼo te meʼa kai fakalaumālie ʼaē ʼe ina fakafīmālieʼi tatatou fia ʼiloʼi te ʼuhiga ʼo te maʼuli pea mo te fakatuʼutuʼu ʼa te ʼAtua ʼo ʼuhiga mo tātou.
Neʼe logoʼi e Tavite he loto fīmālie, ʼi tana ʼiloʼi ʼaē kapau ʼe nofo ovi ki tana Tauhi Ovi ʼaē ʼi selō, pea ʼe tokaga ʼofa age anai ki ai ia Sehova “ ʼi te ʼu ʼaho fuli pē ʼo [tona] maʼuli.” (Vaega 6) Ko he fīmālie fēia koa ʼaē ʼe kotou fakaʼamu kiai? Kapau ʼe kotou loto kiai pea ʼe tonu ke kotou ako peʼe feafeaʼi hakotou lava fakaovi kiā Sehova. ʼE kotou logoʼi ai anai te fīmālie ʼi te nofo ʼi te ʼu nima ʼo te Tauhi Ovi Lahi, ʼaē ʼe ina taki, mo taupau, pea mo fafaga fakaleleiʼi ia nātou ʼaē ʼe nonofo agatonu kiā te ia.—Isaia 40:11.
[Nota]
^ pal. 3 Tokolahi te kau lautohi ʼe natou māhani ki te palalau ʼaenī “Ko te ʼALIKI ʼe ko toku Tauhi Ovi.” Kapau ʼe kotou fia mahino ki te tupuʼaga ʼo te haga ʼo te tokolahi ʼi te kau hiki Tohi-Tapu ʼo toʼo ia te huafa ʼo te ʼAtua ko Sehova, kotou vakaʼi te ʼu pāsina 195-197 ʼo te tohi Koteā ʼAē ʼe Akoʼi Moʼoni Mai ʼi Te Tohi-Tapu? neʼe tā e te kau Fakamoʼoni ʼa Sehova.