Ki savedir lamizer nwanr?

EN DIMOUN i kapab mor akoz lamizer nwanr. Sa kalite mizer i kan en dimoun napa ase manze, delo, petrol, ni menm en bon twa lo son latet, swen lasante ek ledikasyon. I afekte en bilyon dimoun ki i apepre popilasyon kontinan Lafrik. Pourtan, laplipar dimoun ki viv dan Was Lerop ek Nor Lanmerik pa’n zanmen konn okenn dimoun ki viv dan lamizer nwanr. Annou fer konnesans avek detrwa.

Mbarushimana i reste Rwanda avek son madanm ek senk zanfan. En sizyenm zanfan ti mor avek malarya. I dir: “Mon papa ti bezwen diviz son later avek sis nou. Mon par ti tro pti ki mon ti bezwen pran mon fanmir e al reste dan en lavil. Mwan ek mon madanm nou sarye bann sak ros ek disab konman travay. Nou lakaz napa lafnet. Nou ganny delo dan en pi ki kot stasyon lapolis. Normalman nou manz zis en fwa par zour me letan napa travay, nou pa manz ditou. Mon al deor kan sa i arive. Mon pa kapab tenir kan mon bann zanfan i plere akoz zot lafen.”

Victor ek Carmen i fer e aranz soulye. Zot reste dan en lavil izole Bolivi avek zot senk zanfan. Zot lwe en lasanm dan en batiman ki’n ganny fer avek bann blok labou ek lapay. Sa batiman i dan en move kondisyon, son tol i koule e napa elektrisite. Pour son fiy kapab al lekol, Victor ti bezwen fer en latab pour li akoz i ti annan sitan en kantite zanfan lekol. Sa koup i bezwen mars dis kilomet pour al rod dibwa pour kwi manze e pour bwi delo. Carmen i dir: “Nou napa kabinen, nou bezwen al kot sa menm larivyer ki ganny servi pour bennyen ek zet salte. Souvan bann manrmay i tonm malad.”

Francisco ek Ilídia i reste Mozanbik, lwen avek lavil. Kat zot bann zanfan ki ankor ptipti in sirviv me enn ti mor avek malarya apre ki en lopital pa ti admet li pour ganny tretman. Sa koup i plant diri ek patat lo zot pti kare later pour ganny ase manze pour trwa mwan. Francisco i dir: “Parfwa lapli pa tonm ditou e parfwa voler i pas dan nou plantasyon, alor mon fer en ptigin larzan par koup e vann banbou pour konstriksyon. Nou osi  mars de-z-erdtan pour al rod dibwa dan bwa. Mon madanm ek mwan, sakenn i anmenn en pake, enn pour kwi manze pour lasemenn e lot pour vann.”

Bokou dimoun i santi ki i vreman mal e enzis pour annan en lemonn kot 1 dan 7 dimoun i viv parey Mbarushimana, Victor ek Francisco tandis ki i annan plizyer bilyon lezot ki pe byen prospere. Serten in esey amelyor sa sityasyon. Sa lartik ki swiv pou montre ki zot in esey fer e ki zot ti a kontan vwar arive.

[Portre lo paz 3]

Carmen avek de son bann zanfan pe pran delo dan larivyer