Oluhepo Olunene Oityi?

OLUHEPO olunene lupaka omuenyo motyiponga. Otyo tyilekesa okuti, omunthu utupu okulia kutuuka, nomeva, nomulela womatutuku, no ondyuo ongwa, utupu ekongoko, nokuhaendele mosikola. Ovanthu ovanyingi-nyingi velifwe povanthu vo Afilika aiho, vekahi motyitateka ngotyo. Anthi, ovanthu ovanyingi mo Europa no Amelika kavenemone nalumwe omunthu wahepa unene. Tutalei onongeleka mbumwe.

Mbarushimana ukala ko Rwanda, mo Afilika, nomukai wae novana vetano. Omona wa pandu wanyima nelema. Oe wati: “Tate, onthue ovana vae epandu wetuyapaulila ofika yae. Mahi ohika yange ankho onthutu unene, iya andyiilukila mepundaumbo nombunga yange. Ame nomukai wange tuhimama nokututa onosako mbomamanya noluheke. Ondyuo yetu itupu onondyanena. Omeva tutapa monyombo pombonge yopulisa. Haunene tulia vala lwike monthiki, mahi tyina tuhamuene ovilinga, katuli onthiki aiho. Tyina tuhena okulia ndyitundapo, hihande okutehelela ovana valila mokonda yondyala.”

Victor na Carmen vanyika ononkhaku. Vakala mepundaumbo limwe ko Bolivia novana vavo vetano. Vakala mondyuo yakulupa yonondopi vafetela, ina omasingu atiuka nokuhena olusu. Osikola yeyula unene, iya Victor walingila omona wae okamesa kokuhonekela kosikola. Ovalinepi ovo vena okueenda onokilometu 10, okukatiava ononkhuii pala okuteleka nokufilula omaande okunwa. Carmen wati: “Tutupu okandyuo kokuila kohika. Moluotyo, tuna okulauka kondongi, kuna tupu ovanthu velikoha nokuyumba esilo. Ovana vetu apeho vavela.”

Francisco na Ilídia vakala kondye yepundaumbo ko Mosambike. Ovana vavo vekuana ovatutu vahupa, watano wankhia nelema etyi osipitali yaanya okumuhakula. Ovalinepi ovo valima pokapia kavo okatutu oluoso notyikalau vituuka pala okulia monohanyi ononthatu. Francisco wati: “Mokonda yovimphulu nombila pamwe ihaloko nawa, patunda vala katutu. Moluotyo ndyiteta nokulandesa onombambuu mbokutunga, omu  ndyipola oumbongo uhehi. Tupu tueenda onoola onombali okukatiava ononkhuii. Ame nomukai wange tutyinda ovipandi onene, tyike pala okuteleka mosimano otyikuavo atulandesa.”

Ovanyingi velitehelela okuti pena etyi tyikahi navi unene nokuhaviukile konthele youye. Mokonda povanthu epandu-vali, wike wahepa nga Mbarushimana, na Victor, na Francisco, putyina ovanyingi vena omalumono amanyingi. Vamwe vehole okuhetekela okutetulula otyitateka otyo. Monthele mailandulako tala ononkhono valinga nekevelelo liavo.

[Olutalatu pefo 3, 4]

O Carmen novana vae vevali, vatapa omaande mondongi