Maayong Balita Alang sa mga Kabos

ANG Bibliya nagpasalig kanato: “Ang kabos dili kanunay nga hikalimtan.” (Salmo 9:18) Kini naghisgot usab bahin sa atong Maglalalang: “Imong ginabukhad ang imong kamot ug ginatagbaw ang tinguha sa tanang buhing butang.” (Salmo 145:16) Kini nga paglaom dili kay damgo lamang. Ang Labing Gamhanang Diyos makatagana kon unsay gikinahanglan sa pagtapos sa kakabos. Unsay gikinahanglan sa mga kabos?

Usa ka ekonomista sa Aprika mikomento nga ang kabos nga mga nasod nagkinahanglan gyod untag “buotan nga diktador.” Nagpasabot nga aron matapos ang kakabos, kinahanglan nga ang usa may gahom nga mohimog aksiyon ug may kahingawa. Kinahanglan usab nga ang usa nga motapos sa kakabos maoy magmamando sa tibuok kalibotan, kay ang hilabihang kakabos sagad maoy resulta sa pagkadili-makiangayon sa mga nasod. Dugang pa, siya kinahanglang makasulbad sa gamot sa kakabos—ang atong kinaiyanhong kahakog. Asa nato makaplagi ang maong magmamando?

Gipadala sa Diyos si Jesus uban ang maayong balita alang sa mga kabos. Sa dihang gibasa ni Jesus ang sugo kaniya gikan sa Diyos, siya miingon: “Ang espiritu ni Jehova ania kanako, tungod kay siya nagdihog kanako aron sa pagpahayag sa maayong balita ngadto sa mga kabos.”—Lucas 4:16-18.

Unsa ang Maayong Balita?

Gitudlo sa Diyos si Jesus ingong Hari. Usa gayod kini ka maayong balita. Siya mao ang takos nga Magmamando nga motapos sa kakabos kay (1) siya magamando sa tibuok kalibotan ug may gahom nga mohimog aksiyon; (2) siya maluluy-on sa mga kabos ug nagtudlo sa iyang mga sumusunod sa pagkahingawa kanila; ug (3) siya makahanaw sa hinungdan sa kakabos, ang atong kinaiyanhong kahakog. Susihon nato kining tulo ka aspekto sa maayong balita.

1. Ang awtoridad ni Jesus sa tanang kanasoran Ang Bibliya nag-ingon bahin kang Jesus: “Kaniya dihay gihatag nga pagmando . . . aron ang tanang mga katawhan, nasodnong mga pundok ug mga pinulongan magaalagad gayod kaniya.” (Daniel 7:14) Mahanduraw ba nimo ang kaayohan kon usa ray gobyernong magmando sa tanang katawhan? Dili na unya awayan ang mga kahinguhaan sa yuta. Kini patas nga mapahimuslan sa tanan. Si Jesus nagpasalig nga siya maoy Magmamando sa tibuok kalibotan nga may gahom sa paghimog aksiyon. Siya nag-ingon: “Ang tanang awtoridad gihatag na kanako sa langit ug sa yuta.”—Mateo 28:18.

2. Ang kaluoy ni Jesus sa mga kabos Sa iyang pagministeryo dinhi sa yuta, si Jesus nagpakitag kaluoy sa mga kabos. Pananglitan, ang usa ka babaye nga nakagasto sa tanan niyang kahinguhaan sa pagpatambal mihikap sa besti ni Jesus aron maayo. Siya gitalinug-an sa 12 na ka tuig ug dayag nga siya anemik na kaayo. Sumala sa Balaod, ang tanan niyang mahikapan mahugawan. Apan si Jesus maluloton kaniya. Siya miingon: “Anak, ang imong pagtuo nakapaayo kanimo. Lakaw nga malinawon, ug mamaayo na ang imong lawas gikan sa imong grabeng sakit.”—Marcos 5:25-34.

Ang pagtulon-an ni Jesus makapabag-o sa kasingkasing sa mga tawo maong sila usab magpakitag kaluoy. Pananglitan, tagda ang tubag ni Jesus sa usa ka tawo nga buot masayod kon unsaon pagpahimuot ang Diyos. Ang tawo nahibalo nga buot sa Diyos nga higugmaon nato ang atong silingan, apan siya misukna kang Jesus: “Kinsa ba gayod ang akong silingan?”

Sa pagtubag, giasoy ni Jesus ang iyang iladong ilustrasyon bahin sa usa ka tawong miadto sa  Jerico gikan sa Jerusalem kinsa gitulisan ug gibiyaang “himalatyon.” Ang saserdote nga milugsong niana nga dalan miagi sa pikas daplin. Mao pod nay gihimo sa usa ka Levihanon. “Apan usa ka Samarianhon nga nagapanaw sa dalan nahiabot kaniya ug, sa pagkakita kaniya, siya giabot ug kaluoy.” Iyang gihunaran ang samad niini, gidala kini sa balay-abotanan, ug gibayran ang magbalantay aron kini atimanon. “Kinsa . . . ang naghimo sa iyang kaugalingon nga silingan sa tawo nga nahulog sa kamot sa mga tulisan?” si Jesus nangutana. “Ang usa nga milihok nga maluluy-on” mao ang tubag. Nan si Jesus miingon: “Buhata ang ingon.”—Lucas 10:25-37.

Ang nahimong mga Saksi ni Jehova nagtuon sa pagtulon-an ni Jesus ug nagbag-o sa ilang tinamdan bahin sa pagtabang niadtong nanginahanglan. Pananglitan, sa iyang basahon nga Women in Soviet Prisons, ang usa ka awtor sa Latvia misulat bahin sa iyang pagkasakit samtang nagtrabaho sa prisohan sa Potma sa tungatunga sa mga katuigan sa 1960. “Sa dihang nasakit ko [ang mga Saksi] naghago sa pag-atiman nako. Wala na koy mailiw pa.” Siya midugang: “Giisip sa mga Saksi ni Jehova nga katungdanan nila ang pag-atiman kang bisan kinsa bisag unsay relihiyon o nasyonalidad.”

Sa dihang ang pipila sa mga Saksi ni Jehova sa Ancón, Ecuador, nawad-ag trabaho tungod sa krisis sa ekonomiya, nakakitag paagi ang ilang isigka-Saksi sa pagpatunghag kuwarta alang kanila; sila maglutog pagkaon nga ilang ibaligya sa mga mangingisda nga mopauli gikan sa pagpanagat sa gabii (hulagway sa tuo). Ang tanan sa kongregasyon mikooperar, lakip ang mga bata. Sila magsugod sa ala-una sa kaadlawon aron maandam na ang pagkaon pagkaalas-kuwatro inig-abot sa mga mangingisda. Ang kita gibahin sumala sa ilang panginahanglan.

Ang maong mga kasinatian nagpakita nga ang panig-ingnan ug pagtulon-an ni Jesus makabag-o gayod sa tinamdan sa mga tawo sa pagtabang niadtong nanginahanglan.

3. Ang gahom ni Jesus sa pagbag-o sa kinaiyanhong tinamdan Kita nasayod nga may kinaiyanhong kahakog ang tawo. Gitawag kini sa Bibliya ug sala. Bisan si apostol Pablo misulat: “Busa, nakita ko kini nga balaod sa akong kahimtang: nga sa dihang buot nakong buhaton ang maayo, ang daotan ania kanako.” Unya siya midugang: “Kinsa ang magluwas kanako gikan sa lawas nga nahiagom niini nga kamatayon? Salamat sa Diyos pinaagi kang Jesu-Kristo.” (Roma 7:21-25) Dinhi gihisgotan ni Pablo kon sa unsang paagi luwason sa Diyos, pinaagi ni Jesus, ang matuod nga mga magsisimba gikan sa napanunod nga tendensiya sa pagkasala, nga ang usa niini mao ang kahakog, ang gamot sa kakabos. Sa unsang paagi kini mahitabo?

Human sa bawtismo ni Jesus, siya gipailaila ni Juan nga Tigbawtismo, nga nag-ingon: “Tan-awa, ang Kordero sa Diyos nga magakuha sa sala sa kalibotan!” (Juan 1:29) Sa dili madugay ang yuta mapuno sa mga tawong wala nay sala, lakip ang tendensiya sa kahakog. (Isaias 11:9) Wagtangon na unya ni Jesus ang gamot sa kakabos.

Pagkanindot palandongon sa panahon nga ang tanan matagbaw na sa iyang panginahanglan! Ang Bibliya nag-ingon: “Sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila.” (Miqueas 4:4) Kini malarawanong naghubit sa panahon diin ang tanan duna nay makapatagbawng trabaho, kasegurohan, ug hingpit nga kahigayonan nga mapahimuslan ang usa ka kalibotang wala nay kakabos—sa kadayeganan ni Jehova.