Piitsunut nalunaarut nuannersoq

GUUTIP oqaasiani ima neriorsoqqissaarneqarpugut: ‘Puiugaavissanngillat ajorsartut.’ (Tussiaat 9:19) Aamma Biibilimi Pinngortitsiserput pillugu ima allassimavoq: “Assatit ammartarpatit pinngortitallu tamaasa kissaatigisaannik qaarsillartittarlugit.” (Tussiaat 145:16) Neriorsuut taanna Biibilimeersoq kissaataannaanngilaq. Guuti ajugaqanngitsoq piitsuerutsitsisinnaavoq. Sunaana pisariaqartoq?

Afrikami aningaasaqarnikkut ilisimatooq oqarsimavoq nunat piitsoqarfiusut pisariaqartitaviat tassaasoq “kisermaassilluni naalakkersuisoq asannittoq”. Pineqartoq tassaavoq piitsuerutsitsisoqassappat taamaaliortussaq ima pissaaneqartigisariaqartoq iliuuseqarsinnaalluni taamaaliorusunnerminullu asannissuseqartariaqarluni. Aamma eqqarsaatigisariaqarpoq naalakkersuisoq sumi tamani piitsuerutsitsissaguni silarsuaq tamakkerlugu naalakkersuisuusariaqartoq, piitsuungaangaarnermi silarsuarmi tamarmi assigiinngissusermik pissuteqarpoq. Aamma iliuuseqarfigisinnaasariaqarpaa piitsuussusermut pissutiviusoq — inuit namminissarsiortuunerat. Naalakkersuilluarnerpaaq taama ittoq kinaava?

Guutip Jiisusi piitsunut nuannersumik nalunaariartortippaa. Ilaanni Jiisusip Guutimit sumik suliassinneqarsimanini oqaluttuaralugu ima oqarpoq: “[Jehovap] anersaavata tikippaanga [Jehovap] tanitarimmanga. Aallartippaanga nalunaarut nuannersoq piitsunut tusarliuteqqullugu.” — Lukasi 4:16-18.

Nalunaarut nuannersoq suua?

Guutip Jiisusi kunngitut toqqarsimavaa. Tamannarpiaavoq nutaarsiassaq nuannersoq. Piitsueruttoqassappat piukkunnarluartuuvoq uku pissutigalugit: (1) Inuiannut tamarmiusunut naalakkersuilissaaq iliuuseqarnissaminullu pissaaneqarluni; (2) piitsut misiginneqatigai ajoqersukkanilu isumassuisuunissaannik ilinniartillugit; aamma (3) piitsuunerup pissutivia, tassa inunnguuseralugu namminissarsioqqajaasarnerput, peersinnaavaa. Nutaarsiassamut nuannersumut tunngasut pingasut taakku sammeriartigik.

1. Jiisusip inuiaat tamaasa oqartussaaffigai. Jiisusi pillugu Biibilimi ima allassimavoq: “Naalagaassusermik . . . tunineqarpoq; inuiaqatigiit, naggueqatigiit immikkullu oqaasillit tamarmik kiffartorfigaat.” (Danieli 7:14) Takorlooruk silarsuarmi tamarmi ataasiinnarmik naalagaaffeqarnerata pitsaaqutaa! Nunarsuup pisuussutai akerleriissutaajunnaarlutik kikkunnut tamanut assigiimmik iluaqutaalissapput. Jiisusip nammineq uppernarsarpaa tassaalissalluni silarsuarmi naalakkersuisoq iliuuseqarnissamut pissaaneqartoq. Ima nalunaarpoq: “Qilammilu nunamilu pissaaneq tamarmi uannut tunniussaavoq.” — Matthæusi 28:18.

2. Jiisusip piitsut misiginneqatigai. Jiisusi nunarsuarmi kiffartornini naallugu piitsunut misiginneqatiginnittuuvoq. Assersuutigeriartigu arnaq pigisaminik tamanik nakorsartinnermut atuisimasoq. Ukiuni aqqaneq-marlunni aaqartuarsimavoq, aakilliorsimassaqaarlu. Neriulluni ajorunnaassalluni Jiisusip atisai attorpai. Inatsisit naapertorlugit inuit attugai tamarmik minguttunngussapput. Jiisusilli inussiarnisaarfigaa imalu oqarluni: “Panik, uppernerpit annaappaatit. Eqqissillutit qimagunniarit, ajoqutinnillu ajorunnaarsitaagit!” — Markusi 5:25-34.

Jiisusip ilinniartitsissutai inuit uummataannik allannguisinnaapput taakku aamma misiginneqatiginnittuulersillugit. Assersuutigalugu malugiuk Jiisusip angut Guutimit iluarisaajumalluni qanoq iliortariaqarnerminik apeqqutaanut akissutaa. Angutip nalunngilaa Guutip kissaatigigaa tullerput asassagipput, imali Jiisusi aperaa: “Kinami tulleraara?”

Tamatumunnga akissutitut Jiisusip angut Jerusalemimiit Jerikoliartilluni ujajaaffigineqartoq  “toqungajattorlu” qimaannarneqartoq pillugu assersuusiaq ilisimaneqarluartoq oqaluttuaraa. Palasip tamaanaqquttup qaangiinnarpaa. Levikkuusoq aamma taamaaliorpoq. “Samariamiulli angalalluni tassuunaqquttup ornippaa, takugamiullu nalligitsaappaa.” Taassuma ikii salippai akunnittarfimmukaallugulu, akunnittarfimmillu piginnittoq aningaasanik tunivaa ikilerneqarsimasoq isumageqqullugu. “Kina piiaasunit tiguneqartup tulleraa?” Jiisusi aperivoq. Angut ima akivoq: “Taassuminnga naakkinnittoq.” Taava Jiisusi ima oqarpoq: “Illittaaq taamaalioriartorit!” — Lukasi 10:25-37.

Jehovamut nalunaajaasunngortut Jiisusip ilinniartitsissutaanik uummammiuliussillutik inunnut pisariaqartitsisunut ikiuinissaminnut allatut isiginnittaaseqalertarput. Assersuutigalugu arnaq Letlandimiu atuakkiamini Women in Soviet Prisons-imi (Sovjetunionip parnaarussiviini arnat-mi) pinngitsaaliissummik sulisitsivimmi Potmami 1960-ikkunni sulisitaatilluni napparsimanini oqaluttuaraa. “Napparsimanera tamaat [Jehovap Nalunaajaasui] paarsisorilluarpakka. Paarsisuginnerusinnaanngilanga.” Imalu nangippoq: “Jehovap Nalunaajaasuisa kikkunnik tamanik, qanorluunniit upperisaqaraluartunik sumiuugaluartunillu, ikiuinissartik pisussaaffimmittut isigaat.”

Ecuadorimi Ancónimi Jehovap Nalunaajaasuisa ilaat aningaasatigut ajornartorsiornermik eqqorneqarput; suliffeqanngillat aningaasarsissanatillu. Uppeqataalli aningaasatigut ikiorniarlugit iliuusissarsipput; nerisassiorput taqqavani aalisartunut unnuami aalisareerlutik utertunut tuniniagassaminnik (takuuk asseq). Ilagiinniittut tamarmik, aamma meeqqat, peqataapput. Aalisartut ullaakkut sisamanut tikinnissaannut nerisassat naammassereertarniassammata unnuakkut ataatsinut nerisassiulertarput. Aningaasat isertitat pisariaqartitsineq naapertorlugu agguaanneqartarput.

Misigisanit tamakkunatut ittunit erserpoq Jiisusip maligassiuinera ilinniartitsissutaalu inuit isiginnittaasiannik allanngortitsisinnaasut pisariaqartitsisunik ikiuilersillugit.

3. Jiisusi inunnik allanngortitsisinnaavoq. Inuit namminissarsioqqajaasartut kikkut tamarmik nalunngilaat. Tamanna Biibilimi ajortimik taaneqarpoq. Aamma apustili Paulusi ima allappoq: “Taamaalillunga misigilerpara una inatsisaasoq: Ajunngitsumik iliorumagaluarlunga ajortumik iliortartunga.” Imalu nangippoq: “Kia kiffaajunnaarsissavaanga timimit matumannga toqup pianit? Guutili qujanarsili Jiisusi-Kristusikkut.” (Romamiut 7:21-25) Uani Paulusip pivaa Guutip pallorfiginnitsini ilumoortut Jiisusi aqqutigalugu ajortulioqqajaanerannit kingornutaannit aniguisissagai — ilaatigut namminissarsiornermit piitsuussusermut pissutaasumit. Qanoq?

Jiisusip kuisinnerata kingorna Johannesip Kuisisup taanna ima ilisaritippaa: “Aajuna Guutip savaaraa silarsuup ajortaanik nammattoq.” (Johannesi 1:29) Qanittukkut inuit nunarsuarmi inuusut tamarmik ajortimit kingornutamit, ilaatigut nammineq soqutigisanik salliutitseqqajaanermit, aniguisinneqarsimassapput. (Esaja 11:9) Taamanikkussamut Jiisusip piitsuussusermut pissutaasoq peersimassavaa.

Aap, kikkut tamarmik pisariaqartitaminnik pinissaannut piffissanngorumaartoq eqqarsaatigalugu nuannissusia! Biibilimi ima allassimavoq: “Tamarmik eqqissillutik inuussapput viinnequtaatimik figenequtaatimillu ataanni kimilluunniit peersinneqarnatik.” (Mika 4:4) Oqaatsini taakkunani taalliorpalaartuni allaatigineqarpoq piffissaq nalliuttussaq. Taamanikkussamut kikkut tamarmik nalerisimaarnartumik suliffeqarlutillu toqqissisimalluinnarlutillu piitsuunatik inuunermik nuannaarutiginnissinnaassapput — Jehovamut ataqqinaataasumik.