DIOSË yˈAyuk jyënaˈany: “Kyaj xëmë jäˈäytyëgoy yˈitäˈäny ja ayoobë jäˈäy” (Salmo 9:18). Biiblyë nanduˈun tmaytyaˈagyë Jyobaa: “Myajwaˈxypyë mgëˈë ets xymyoˈoyaˈany tijaty tsyojktëp diˈib jukyˈäjttëp” (Salmo 145:16). Tyäˈädë wandakën adëwäämp, pesë Dios diˈib myëdäjtypy tukëˈëyë mëjää mbäät dyajjëgeˈegyë ayoˈon. ¿Tijaty mbäät ttuny?

Tuˈugë toxytyëjk diˈib África diˈib yˈëxpëjkpëtseempy wiˈix tyunyë meeny sentääbë abëtsemy nyaxwinyëdë, jyënaˈany ko diˈib tsojkëp mä paˈis diˈib ayoop, yëˈë tmëdatët tuˈugë “yˈanaˈambë diˈib jantsy oyjyaˈay”. Tyäˈädë yëˈë xytyukˈijxëm ko parë jyëjptëgoyëdë ayoˈon, yëˈë tsojkëp tuˈugë jäˈäy diˈib myëdäjtypyë mëjää etsë oyjyot. Ets nan yëˈë anaˈamëp abëtsemy nyaxwinyëdë, pesë jäˈäy myëk ayoy mët ko kyaj jyaˈˈatyë tuˈugyëˈäjtën abëtsemy nyaxwinyëdë. Nan mbäät dyajjëgeˈeky mä jäˈäyë kyorasoon parë kyaj yëˈëyë tijaty nyaytyukmëtsokëdët, pes pääty jyaˈˈatyë ayoˈon. ¿Mä mbäät yajpäätyë duˈumbë anaˈambë?

Dios ojts tkexyë yˈUˈunk parë ayoobë jäˈäy tˈawanët ja oybyë ayuk. Jesus ojts tnigäjpxy ti nety të tnigëdaˈaky ko ojts tkajpxy diˈibë nety ijtp jääybyety: “Nmëdäjtypyëts ja Diosë [myëjää], es tëts xymyoˈoy ja tuunk esëts ngäjxwäˈxët ja oybyë ayuk mä ja ayoobë jäˈäy” (Lukʉs 4:16-18).

¿Diˈibë tyäˈädë oybyë ayuk?

Ko Dios të tnikäjpxpety yˈUˈunk ets tyunët Rey, yëˈë tuk pekyë tyäˈädë oybyë ayuk. Taaˈäjtp kanäk peky tiko Jesus jantsy oy yˈanaˈamäˈäny: 1) myëdäjtypyë madakën ets tˈanaˈamdäˈäyët niˈamukë naxwinyëdë jäˈäy, 2) pyaˈˈayoobyë ayoobë jäˈäy ets tyukniˈˈijxëbë yˈëxpëjkpëty parë nanduˈun tpaˈˈayowët, ets 3) mbäädë jäˈäy dyajtëgäjtsë jyot wyinmäˈäny parë kyaj jeˈeyë këˈëm tijaty nyaytyukmëtsokëdët. Min nˈokˈijxëm.

1. Jesus myëdäjtypyë kutujkën mä tukëˈëyë nasionk Diosë yˈAyuk jyënaˈany ko Jesus yëˈë yajmooyë “anaˈamkakn [...] parë myëdunëdët tukëˈëyë ja nax käjpn, nasionk etsë jäˈäy diˈib kyajpyxypy oytyim diˈibëtyë ayuk” (Daniel 7:14). ¿Mbawinmaapy wiˈix ndukˈoyˈatäˈänëm ko jeˈeyë nmëdäjtëm tuˈugë gobiernë abëtsemy nyaxwinyëdë? Nipën nëjkx tkajaˈaniwäˈänäˈäny tijatyë Naxwinyëdë yajkypy, tuknax ndukˈoyˈatäˈänëm. Jesus ojts jyënaˈany ko yˈanaˈamäˈäny abëtsemy nyaxwinyëdë ets ko myëdataambyë mëjää parë tijaty ttunët, duˈun jyënany: “Ëjts të xymyoˈoy ja Dios tëgekyë kutujkën, dëˈën jam tsäjpotm es dëˈën yä naxwiiny” (Matewʉ 28:18).

2. Pyaˈˈayoobyë ayoobë jäˈäy Nuˈunë Jesus tyuuny yä Naxwiiny, pyaˈˈayoojë ayoobë jäˈäy. Extëm nˈokpëjtakëm, tuˈugë toxytyëjk mäjmajtsk jëmëjtë nety të tmëdäjnë windaxyë päˈäm ets të yajpagixënë, yajtuundääyë myeeny syentääbë mä doktoor, ta ojts ttoonë Jesusë wyit parë yˈagëdäˈägäˈäny. Ja Ley duˈunë nety jyënaˈany ko pën ttonët, kyaj wäˈäts nyekyˈitët. Perë Jesus yaˈijxë oyjyaˈayˈäjtën ets tˈanmääy: “Të mˈagëdaˈaky mët ko të xymyëbeky. Nëjx yajxon. Të mˈagëdaˈaky” (Markʉs 5:25-34).

Jesusë tyukniˈˈijxën myëdäjtypyë mëjää parë dyajtëgäjtsëdë jäˈäyë kyorasoon ets pyaˈˈayowët. Okpawinmay wiˈixë Jesus tˈatsooy ja yetyëjk diˈib yajtëëjë wiˈix mbäädë Dios dyajjotkujkˈaty. Tyäˈädë yetyëjk nyijäˈäbë nety ko jëjpˈam ttsokëdë myëguˈuk, pääty dyajtëëy: “¿Pënëts ëj [nmëguˈukˈäjtypy]?”.

Jesus ta tmaytyaky ja judiyë diˈib nety nëjkxp Jericó ets ja maˈtspë axëëk tyuunë ets nyikakë oˈktsoˈoky. Ta tuˈugë saserdotë jam nyajxy, per ta ojts nyayoˈoyëty, ta myiiny tuˈugë lebitë ets  nanduˈun yˈadëtsy. “Per oknëm myiiny tuˈugë samaritanë jäˈäy diˈibë jëdijtp mä nandëˈënë tadë tuˈu. Es ko tˈijxy, net mëk tjäˈäjë es tpaˈˈayooy.” Ta ojts tpujë tsyayut ets ojts tmënëjkxy mä tuˈugë jäjtakn ets tnimëjuˈuyë parë yajkuentˈatët. Jesus ta dyajtëëy: “¿Pënë tyäˈädë nidëgëëkpë mjënäämp ko yëˈë [tmëguˈugëty] diˈibë mäjtsë tadë maˈtspë?” Ta ja yetyëjk yˈatsooy: “Ja diˈibë myëdäjt ja paˈˈayoˈon mët yëˈë”. Net ja Jesus yˈanmääyë: “Nëjx mij es xytyunët nandëˈën” (Lukʉs 10:25-37).

Pënaty jëmbijttëp Jyobaa tyestiigë, yˈëxpëjktëp tijatyë Jesus ttukniˈˈijxë ets yajtëgäjtstëbë jyaˈayˈäjtën parë tpudëkëdë ja diˈib tijaty yajtëgoyˈajtypy. Extëm nˈokpëjtakëm, tuˈugë toxytyëjk diˈib Letonia diˈib tuun mä campo penitenciario de Potma naa 45 jëmëjtëp, ojts jam pyäˈämbety ets ok ta tkujäˈäyë mä lyiibrë: “Kojëts nbëjk nˈijxë, yëˈë [Jyobaa tyestiigëty] yëˈëjëts xykyuentˈäjttë. Kyajxyëbëts pën ojts xykyuentˈaty mas oy extëmëts yëˈëjëty ojts xykyuentˈattë”. Ets ta yˈakjënany: “Jyobaa tyestiigëty wyinmaytyë ko nyikëjxmˈäjttëp ets tpudëkët niˈamukë jäˈäy, oy diˈibë relijyonk ttukˈitët ets oy mä tsyoonët” (Women in Soviet Prisons, [Las mujeres en las prisiones soviéticas]).

Ko Jyobaa tyestiigëty diˈib Ancón (Ecuador), tuk tiempë yˈayoodëjkëdë, ta ja myëguˈuktëjk tˈëxtääytyë winmäˈäny wiˈix mbäät dyajtuˈukmuktëdë meeny sentääbë parë tpudëkëdët: yëˈë yaˈoˈoyëdë kaaky tojkx parë ttukmëdoˈktë ja äjkx mäjtspëty diˈib koots tuundëp (retratë abatkëˈëy). Niˈamukë ja nmëguˈukˈäjtëm jyantsy tyuundë axtë piˈk ënäˈk. Tyuuntsondäˈäktë a la 1 de la mañana parë ko jyäˈttët ja äjkxmäjtspë a las 4, listë yˈitët ja kaaky tojkx. Nuˈun ja meeny dyajtuˈukmujktë, duˈun tmooytyë ja myëguˈuktëjk extëmë nety tyëgoyˈäjtxëdë.

Tyäˈädë yëˈë xytyukˈijxëm ko Jesusë yˈijxpajtën ets tijaty tukniˈˈijxë, myëdäjtypyë mëjää parë dyajtëgäjtsëdë jäˈäyë jyot winmäˈäny ets tpudëkët ja diˈib tijaty yajtëgoyˈajtypy.

3. Jesus myëdäjtypyë mëjää parë dyajtëgatsëdë jäˈäy Niˈamukë nˈëxkäjpëm ko kyaj tijaty ndukmëtsojkëmë nmëguˈukˈäjtëm. Biiblyë ja ttijy poky. Apostëlë Pablo tkujäˈäyë: “Diˈibëts xyjäjtp, ko njatunäˈänyëts diˈibë oy, per jam ja pojpë mäts ëj”. Ta net jyënany: “¿Pënëts xyajnitsoˈogëp mä tyäˈädë niniˈx diˈibë të yajtuknikäjxpety ja oˈkënë? Yajjäˈäygyëdakp ja Dios ko jyaaty ja nitsokën mët yëˈëgyëjxmë Nintsënˈäjtëm Jesukristë” (Romanʉs 7:21-25). Pablo yëˈë myaytyäˈägan ko mët yëˈëgyëjxmë Jesus, mbäädë nety Dios xyaˈˈawäˈätspëtsëˈëmëm mä ja poky diˈib nmëdäjtëm, extëm ko kyaj tijaty ndukmëtsojkëm ja nmëguˈukˈäjtëm. ¿Wiˈixë nety ttunäˈäny?

Ko netyë Juan të dyajnëbajtäˈäyë Jesus, ta jyënany: “Ixtë! Tyäˈädë dëˈën ja Diosë Byorreeguˈunk diˈibë wëˈëmp extëmë wintsëˈkën es yajpojpënitëgoyët yä naxwiiny” (Fwank 1:29). Tim tsojkë tyäˈädë Naxwinyëdë tyuktukäˈäny mëdë jäˈäy diˈib nety të nyiwäˈätsëdë ja poky kaytyey, extëm ko kyaj jeˈeyë këˈëm tijaty nyaytyukmëtsokëdë (Isaías 11:9). Duˈuntsoo Jesus dyajjëjptëgoyaˈany diˈib yajjaˈäjtypyë ayoˈon.

¡Jantsy jotkujk nayjäˈäwëm ko jyäˈtäˈäny ja tiempë mä nitii nëjkx kyanekytyëgoyˈaty! Diosë yˈAyuk wyandakypy: “Yˈuˈunyëyäˈändë niduˈuk niduˈuk mä yˈuubës päˈtk ets mä yˈiigë päˈtk, ets kyaj nyeky jyamˈatäˈäny pën atsëˈëgëdëp” (Miqueas 4:4). Tyäˈädë ää ayuk yëˈë nyigajpxypy ja tiempë mä niˈamukë nmëdatäˈänëmë tuun oybyë, mä kyaj ti xynyekyˈatsëˈëgëyäˈänëm ets mä kyaj nyekyjamˈatäˈänyë ayoˈon, tukëˈëyë tyäˈädë tmëjkumayaˈanyë Jyobaa.