Koe-noog naong rãmbã yĩnga

WẼNNAAM GOMDÃ yeela bũmb sẽn kengd raoodo. A yeela woto: “B ka na n kell n yĩm naong rãmbã yell daar fãa ye.” (Yɩɩl Sõamyã 9:19) Biiblã goma Naandã yell n yeel woto me: “Yãmb pukda y nugu, la bõn-vɩɩs fãa paamda bark tɩ seke.” (Yɩɩl Sõamyã 145:16) Biiblã gom-kãensã pa belgr ye. Wẽnnaam sẽn tõe bũmb fãa wã tõe n menesa naongã. La sẽn na yɩl n menes naongã, bõe maaneg n yaa tɩlae?

Pag a ye sẽn yit Afirik n yaa laogã zãab yel-mit yeelame tɩ naongã sẽn namsd tẽns ninsã sẽn dat yaa “naab sẽn tar pãng la sẽn yaa nimbãan-zoɛta.” Woto rat n yeelame tɩ sẽn na yɩl n menes naongã, ãdem-biisã rata ned sẽn tar tõog la sẽn sɩd rat b neer t’a yɩ b naaba. La d tõe n paasame tɩ naab a woto buud segd n dɩɩ naam dũniyã gill zugu, bala yaa tẽngã laogã pʋɩɩb sẽn pa zemsã n kɩt tɩ naongã namsd nebã tɩ loog noorã. Naab sẽn tõe n menes naongã me segd n tõog n menesa bũmb ning sẽn wat ne naongã, rat n yeel tɩ ninsaal rat-m-ye wã. Yɛ la d tõe n paam naab a woto?

Wẽnnaam tʋma a Zezi t’a wa taas naong rãmbã koe-noogo. Daar a yembr a Zezi sẽn yik n na n karem bãngr-gomd sẽn wilgd Wẽnnaam sẽn tʋm-a t’a wa maan bũmb ningã, a yeela woto: “Zusoabã sɩɩg bee mam zugu. Tɩ bõe, bãmb kõo maam pãng tɩ m moon koe-noog naong rãmb sʋka.”—Luk 4:16-18.

Koe-noogã la bʋgo?

Wẽnnaam yãka a Zezi t’a na n yɩ Rĩma. Woto sɩd yaa koe-noogo. A yaa naab ning sẽn sɩd tõe n menes naongã, bala, 1) a na n dɩɩ naam dũniyã gill zugu, la a tara pãng n tõe n maan a sẽn datã me. 2) A kʋmda naong rãmbã nimbãanega, la a wilgd a poorẽ dãmbã me tɩ b sõng naong rãmbã. Sẽn na n baas 3) a tõe n menesa bũmb ning sẽn wat ne naongã, rat n yeel tɩ ninsaalbã rat-m-ye wã. Bɩ d gom koe-noogã nen-kãens b tãabã yelle.

1. A Zezi na n dɩɩ naam dũniyã gill zugu Wẽnnaam Gomdã pʋgẽ, b goma a Zezi yell n yeel woto: “B kõo yẽ . . . naam, tɩ tẽnsã fãa neb sẽn yaa soolem toɛ-toɛy n gomd goam toor-toorã sak-a.” (Daniɛll 7:14) Tags-y n ges-y goosneem a yembr sẽn na n soog dũniyã fãa sẽn na n wa ne nafa ninsã. Wakat kãnga, tẽns pa na n le zab taab dũniyã laog poorẽ ye. Ned baa a ye pa na n naf n yɩɩg a to ye. A Zezi meng wilgame t’a na n wa yɩɩ dũniyã gill rĩm sẽn tar pãnga, n tõe n maan a sẽn datã. A yeela woto: “B kõo maam pãng fãa sẽn be [saasẽ, MN] la sẽn be dũniyã.”—Matɩe 28:18.

2. A Zezi kʋmda naong rãmbã A Zezi koe-moonegã sasa, a maana yɛl toor-toor n wilg t’a kʋmda naong rãmbã. Wala makre, daar a yembre, pag sẽn ka laafɩ tɩ kɩt t’a wʋk a paoongã fãa n tɩp a menga, n wa n sɩɩs a Zezi fuugã noore, n tẽ tɩ rẽ la a na n paam laafɩ. Pagã bãagã kaoosa yʋʋm 12, t’a zɩɩm da yita. Sãmbg sẽn ka be, bãagã kɩtame t’a zɩɩmã ra pa le waoogẽ ye. Sã n yaa ne a Moiiz tõogã sẽn da wilgã, a sẽn sɩɩs ned ning fãa lebgda rẽgdo. La a Zezi pa zab-a ye. A kʋm-a lame, n yeel-a woto: “M biiga, fo tẽeb n maag foom. Kẽng ne laafɩ n paam f meng ne bãag ninga sẽn tar foomã.”—Mark 5:25-34.

A Zezi sẽn da wilgd nebã bũmb ninsã tara pãnga, n tõe n toeem ned t’a me lebg nimbãan-zoɛta. Wala makre, daar a ye, rao n sok-a n na n bãng a sẽn tõe n maaneg n ta Wẽnnaam yam. Raoã ra miime tɩ Wẽnnaam datame tɩ ninsaal nong a to, la a soka a Zezi woto: ‘Ãnda la mam to?’

Sẽn na yɩl n leok-a, a Zezi rɩka makre, n gom rao sẽn yi Zerizalɛm n debd Zeriko tɩ fãadb tek  n pogl-a, n bas-a “t’a rat n ki” yelle. A yeelame tɩ maan-kʋʋd n tũ so-kãnga, la a sẽn yã nedã, a bʋdgame n looge. Levi ned n ta be, la a me bʋdgame n looge. “La Samari dao a yembr n da togd sore, n wa lood be. A sẽn yãend-a, a zoe-la a nimbãanega.” A peka raoã sãmpoagã, n tall-a n ta sik zĩigẽ, n yao zĩigã soab ligd sẽn na yɩl t’a ges a yelle. A Zezi soka raoã woto: “Ãnda n ges raoã sẽn lʋɩ fãadbã nusẽ wala a to?” T’a leoke: “Yaa sẽn zoe-a raoã nimbãanegã sẽ.” Rẽ poore, a Zezi yeel-a-la woto: “Bɩ y kẽnge, la yãmb me maan boto.”—Luk 10:25-37, Sebr Sõngo.

Neb nins sẽn lebg a Zeova Kaset rãmbã baood n bãngda bũmb toor-toor a Zezi sẽn da wilgd nebã, tɩ kɩt tɩ b toeeme, n sõngd neb nins sẽn be raab pʋgẽ wã. Wala makre, sebr a yembr (Les femmes dans les prisons soviétiques [angl.]) Letoni pag sẽn gʋls pʋgẽ, a goma a sẽn da wa n be bãens roog Potma soolmẽ wã yʋʋmd 1960 soabã sẽnes yelle, n tẽeg sasa sẽn zĩnd t’a ra wa lʋɩ bãag yelle. Ad a sẽn yeele: “Mam bãagã sasa, [a Zeova Kaset rãmbã] gesa mam yell sõma. Mam pa tẽed tɩ ned ra tõe n gesa m yell sõma tɩ yɩɩg rẽ ye.” A paasa woto: “A Zeova Kaset rãmbã tagsdame tɩ bãmb segd n maana ãdem-biig buudã fãa neer n pa ges a sẽn yaa sor ning neda, wall a tẽng ye.”

Ligd zu-loees sẽn da wa n kẽ Ekoatɛɛr soolmẽ wã, a Zeova Kaset rãmb nins sẽn be Ankonnã kẽer tʋʋm sãamame tɩ b pa tar b sẽn maandg ye. Woto kɩtame t’a Zeova Kaset rãmb a taab yãk yam n na n bao ligd n sõng-ba. B tẽngã zĩm-yẽedb sẽn tʋgd n yõgd zĩmã ne yʋngã yĩnga, b rɩka sard n na n koosd rɩɩb ne-ba, b lebgrã sasa. (Rẽ foto la sẽn be rɩtgã) Tigingã neb fãa, la hal baa kambã meng sõng n tʋmame. B ra sɩngda seglgã yʋng inɛɛre, sẽn na yɩl tɩ zĩm-yẽedbã ne b na n lebg n wa yibeoog lɛɛr a naas sasa wã, bɩ mik tɩ rɩɩbã bɩɩme. B ra geta ned kam fãa yɛl sẽn yaa to-to wã n pʋɩt yõodã tɩ zemsdẽ.

Kiba-kãensã buudã wilgda vẽeneg t’a Zezi mak-sõngã la a sẽn zãms nebã bũmb ninsã sɩd tara pãnga, n tõe n toeem nebã n kɩt tɩ b sakd n sõngd sẽn dat-b sõngrã ne yamleoogo.

3. A Zezi tõe n toeema ninsaal zʋgo Dũniyã gill zugu, b miime tɩ ãdem-biig nong n tagsda a mengã yell bala. Biiblã wilgame tɩ rẽ yaa yel-wẽnde. Tʋm-tʋmd a Poll meng yeela woto: “Mam yãta tõ-kãng mam pʋgẽ tɩ mam sẽn dat n maan neere, wẽng loee ne maam.” La rẽ poore, a paasa woto: “Ãnda n na n fãag maam ne kũum sẽn be yĩn-kãngã pʋgẽ wã? Bark Wẽnnaam tõnd Zusoab a Zezi Kirist maasem yĩnga.” (Rom dãmba 7:21-25) Yaa Wẽnnaam sẽn na n tũnug ne a Zezi n kɩt tɩ neb nins sẽn tũud-a wã paam b mens ne yel-wẽndã, rat-m-ye wã sẽn wat ne naongã sẽn naagã yell la a Poll da gomda. Wãn to la Wẽnnaam na n maan dẽ?

A Zezi lisgã poor bilfu, a Zãmbatiis wa n tees-a lame n yeel nebã woto: “Ad Wẽnnaam Pe-bilã sẽn yiisd dũniyã yel-wẽnã.” (Zã 1:29) Ka la bilfu, dũniyã na n pida ne neb sẽn paam b mens ne yel-wẽndã, n pa le baood b mens nafr bal ye. (Ezai 11:9) A Zezi na n menesa bũmb ning sẽn wat ne naongã.

Wakat kãnga, ãdem-biisã fãa na n paama b sẽn datã tɩ seke. Ad d sã n tagsg rẽ yelle, noogda d sũy wʋsgo! Wẽnnaam Gomdã goma sasa kãng yell n yeel woto: “Ned kam fãa na n zĩnda a viyn tɩɩg ne a kankang tẽngr tɩ ned ka yɛɛs-b ye.” (Miise 4:4) Gom-kãensã sẽn kengd raoodã bilgda wakat ning ned kam fãa sẽn na n tar a yam tʋʋmd n zĩ bãane, la a tõe n vɩɩmd ne su-noog dũni pʋgẽ naong sẽn pa na n zĩndi. Woto fãa na n yɩɩ a Zeova yʋʋrã pẽgr yĩnga.