Ditaba tše Dibotse go Badiidi

LENTŠU LA MODIMO le re kgonthišetša ka gore: “Ga se ka mehla modiidi a tlago go lebalwa.” (Psalme 9:18) Beibele gape e bolela ka Mmopi wa rena gore: “O bula seatla sa gago wa kgotsofatša kganyogo ya sephedi se sengwe le se sengwe.” (Psalme 145:16) Kholofelo ye yeo e lego ka Lentšung la Modimo ga se toro feela. Modimo Ramatlaohle a ka nea seo se nyakegago bakeng sa go fediša bodiidi. Ke’ng seo badiidi ba se nyakago?

Setsebi sa tša boiphedišo sa Moafrika se boletše gore, ge e le gabotse, dinaga tše di diilago di tsoma “mmušanoši yo a lokilego.” Seo se bolelwago mo ke gore bakeng sa go fediša bodiidi, go nyakega motho yo a nago le matla gore a gate mogato le yo a nago le botho gore a nyake go dira bjalo. Re ka tlaleletša ka gore mmuši yo a ka fedišago bodiidi ka moka e swanetše go ba mmuši wa lefase ka gobane bodiidi bjo bo feteletšego gantši bo tlišwa ke go se lekalekane ga ditšhaba. Go oketša moo, mmuši yo a ka fedišago bodiidi o swanetše go kgona go dira se sengwe ka sebaki sa bodiidi, e lego tlhago ya rena ya boithati. Mmuši yo bjalo yo a swanetšego a ka hwetšwa kae?

Modimo o ile a romela Jesu gore a botše badiidi ditaba tše dibotse. Ge Jesu a ema gomme a bala taelo yeo a e filwego ke Modimo, o itše: “Moya wa Jehofa o go nna, gobane o ntloleditše go tsebiša badiidi ditaba tše dibotse.”—Luka 4:16-18.

Ditaba tše Dibotse ke Eng?

Modimo o kgethile Jesu bjalo ka Kgoši. Tše ruri ke ditaba tše dibotse. Ke Mmuši yo a swanelegago go fediša bodiidi ka gobane (1) o tla buša batho ka moka e bile o na le matla a go gata mogato; (2) o dira dilo ka go kwela badiidi bohloko le go ruta balatedi ba gagwe gore ba ba hlokomele; gomme (3) a ka fediša sebaki sa bodiidi, e lego tshekamelo ya rena ya tlhago ya go dira dilo ka boithati. Anke re hlahlobeng dikarolo tše tše tharo tša ditaba tše dibotse.

1. Bolaodi bja Jesu ditšhabeng tšohle Lentšu la Modimo ge le bolela ka Jesu le re: “A newa pušo, . . . gore batho ba merafo, ditšhaba le maleme ka moka ba mo hlankele.” (Daniele 7:14) Na o ka akanya ka mehola e ka tlišwago ke go ba le mmušo o tee wo o bušago batho ka moka? Go ka se sa hlwa go lwelwa ditšweletšwa tša lefase. Batho ka moka ba tla holega ka tsela e lekanago. Jesu o neile kgonthišetšo ya gore e tla ba Mmuši yo a nago le matla a go gata mogato. O itše: “Ke neilwe matla ka moka legodimong le lefaseng.”—Mateo 28:18.

2. Kwelobohloko ya Jesu ka badiidi Jesu o ile a kwela badiidi bohloko bodireding bja gagwe ka moka bja lefaseng. Ka mohlala, mosadi yo a bego a dirišitše dilo tša gagwe ka moka bakeng sa go lefelela kalafo o ile a kgwatha seaparo sa Jesu, a holofela gore o tla fola. O be a swerwe ke bolwetši bja ngope ka nywaga e 12 gomme ga go pelaelo gore o be a na le tlhaelelo e kgolo ya madi. Go ya ka Molao, o be a tla šilafatša yo mongwe le yo mongwe yo a mo kgwathago. Eupša Jesu o ile a mmontšha botho. O ile a re: “Morwedi wa ka, tumelo ya gago e go fodišitše. Sepela ka khutšo gomme o fole bolwetšing bja gago bjo bohloko.”—Mareka 5:25-34.

Dithuto tša Jesu di na le matla a go fetoša dipelo tša batho e le gore le bona ba kgone go dira dilo ka kwelobohloko. Ka mohlala, ela hloko kamoo Jesu a arabilego monna yo a bego a nyaka go tseba kamoo a ka kgahlago Modimo ka gona. Monna yoo o be a tseba gore Modimo o nyaka gore re rate moagišani wa rena, eupša o ile a botšiša Jesu a re: “Ge e le gabotse, ke mang yo e lego moagišani wa ka?”

Ge Jesu a araba o ile a anega papišo ya gagwe e tumilego ya mabapi le monna yo a tšwago Jerusalema a eya Jeriko yoo a ilego a hlakolwa gomme a tlogelwa a le “makgatheng a lehu le bophelo.” Moperisita yo a bego a theoga ka tsela yeo o ile a  phamogela ka thoko e nngwe ya tsela. Molefi o ile a dira se se swanago. “Eupša Mosamaria yo mongwe yo a bego a sepela tseleng yeo a fihla go yena gomme ge a mmona, a mo hlomogela pelo.” O ile a hlatswa dintho tša monna yoo, a mo iša ntlong ya baeti gomme a lefa mohlokomedi wa ntlo ya baeti gore a hlokomele monna yo a gobetšego. Jesu o ile a botšiša a re: “Ke mang [go] bonagalago a itirile moagišani go monna yo a wetšego bahlakoding?” Karabo e bile e rego: “Ke yo a gaugetšego monna yoo.” Ke moka Jesu a re go yena: “Le wena o dire sona seo.”—Luka 10:25-37.

Batho bao ba fetogago Dihlatse tša Jehofa ba ithuta dithuto tše bjalo tša Jesu gomme ba fetoša boemo bja bona bja kgopolo mabapi le go thuša bao ba nyakago thušo. Ka mohlala, mongwadi yo mongwe wa Latvia o ngwadile ka pukung ya gagwe ya Women in Soviet Prisons mabapi le bolwetši bja gagwe bja nakong ya ge a be a šoma kampeng ya kotlo ya Potma bogareng bja bo-1960. “Nakong ka moka ya ge ke be ke babja [Dihlatse] e be e le baoki ba mafolofolo. Go be go se na tlhokomelo e nngwe e kaone yeo ke bego nka e hwetša go feta yeo.” O tlaleleditše ka gore: “Dihlatse tša Jehofa di lebelela go hlokomela motho yo mongwe le yo mongwe e le boikarabelo bja tšona, go sa šetšwe gore ke wa bodumedi bofe goba wa setšhaba sefe.”

Ge maemo a tša ditšhelete a be dira gore Dihlatse tše dingwe tša Jehofa kua Ancón, Ecuador, di hloke mošomo goba sa go iphediša, Dihlatsegotee le tšona di ile tša dira phetho ya go di kgobokeletša tšhelete; di ile tša rekišetša barei ba dihlapi dijo ge ba etšwa go rea dihlapi bošego ka moka (seswantšhong se se lego ka go le letona). Bohle ka phuthegong ba ile ba ba le tirišano, go akaretša le bana. Ba be ba thoma ka iri ya pele ka masa e le gore dijo di ka ba di lokile ka iri ya bone ge dikepe di etla. Tšhelete yeo e bego e kgobokeditšwe ke Dihlatse e ile ya abja go ya ka dinyakwa tša motho yo mongwe le yo mongwe.

Diphihlelo tše bjalo di bontšha gore mohlala wa Jesu le dithuto tša gagwe ruri di na le matla a go fetoša boemo bja batho bja kgopolo mabapi le go thuša bao ba nyakago thušo.

3. Matla a Jesu a go fetoša tlhago ya batho Tshekamelo ya batho ya go dira dilo ka boithati ke taba yeo e tsebjago lefaseng ka bophara. Beibele e e bitša sebe. Gaešita le moapostola Paulo o ngwadile gore: “Ka gona go nna ke hwetša molao wo wa gore ge ke kganyoga go dira se se lokilego, se sebe se gona go nna.” Ke moka o ile a tlaleletša ka gore: “Ke mang yo a tlago go ntlhakodiša mmeleng wo o hwago lehu le? A go lebogwe Modimo ka Jesu Kriste.” (Baroma 7:21-25) Mo Paulo o be a bolela ka tsela yeo Modimo, ka Jesu, a tlago go hlakodiša barapedi ba therešo ditshekamelong tša sebe tša tlhago, tšeo e nngwe ya tšona e lego boithati, sebaki se segolo sa bodiidi. Se se tla direga bjang?

Lebakeng le itšego ka morago ga kolobetšo ya Jesu, Johane Mokolobetši o ile a tsebiša Jesu ka gore: “Bonang Kwana ya Modimo yeo e tlošago sebe sa lefase!” (Johane 1:29) Go se go ye kae lefase le tla ba le tletše ka batho bao ba lokolotšwego sebeng sa leabela, go akaretša le tshekamelo ya go nyaka tša go ikhola. (Jesaya 11:9) Jesu o tla ba a fedišitše sebaki sa bodiidi.

Ruri go a thabiša go nagana ka nako ya ge batho ka moka ba tla ba le seo ba se tsomago! Lentšu la Modimo le re: “Yo mongwe le yo mongwe o tlo dula ka tlase ga morara wa gagwe le ka tlase ga mogo wa gagwe, go ka se be le yo a ba tšhošago.” (Mika 4:4) Mantšu ao a hlalosa ka tsela ya theto nako ya ge bohle ba tla ba le mošomo o kgotsofatšago, tšhireletšego le sebaka se se feletšego sa go thabela lefase ntle le bodiidi, e le gore Jehofa a retwe.