Onondaka Onongwa Pala Ovahepi

ONDAKA YA HUKU itutalaa okuti: “Mokonda omuhepi kamalimbiwa apeho.” (Salmo 9:18) Ombimbiliya yapopia konthele Yomupakeko wetu okuti: “Ikula eke liove, iya ohambukiswa ovipuka aviho viokuna omuenyo.” (Salmo 145:16) Ekevelelo olio liapopiwa Mondaka ya Huku, ha ndyoi vala. Huku wepondolo aliho malingi etyi tyesukisa opo amaneko oluhepo. Oityi omuhepi esukisa?

Omukai umwe welilongesa konthele yomalumono mo Afilika, wati movilongo viokuahepa muesukisa “omutumini wokankhenda.” Otyo tyilekesa okuti pala okumanako oluhepo tyihanda omutumini una epondolo uhanda okutyilinga nokuna oluembia. Tuyawisako okuti omutumini upondola okumanako oluhepo aluho una okutumina ouye auho, mokonda oluhepo olunene lutuka konkhalelo yovanthu yelikalela. Tupu, omutumini mamaneko oluhepo una okukala nepondolo liokulinga tyimwe konthele yelungavi lietu, lieta oluhepo. Opi omutimini ngoo apondola okuvasiwa?

Huku watumine Jesus opo aivise onondaka onongwa kovahepi. Etyi Jesus akatuka opo atange konthele yotyilinga atambula ku Huku, oe wati: “Ospilitu ya Jeova ikahi kuame, mokonda oe wanaka opo ndyiivise onondaka onongwa kovahepi.”—Lucas 4:16-18.

Onondaka Onongwa Oityi?

Huku waholovona Jesus opo akale Ohamba. Tyotyili otyo onondaka onongwa. Oe Omutumini wafuapo pala okumanako oluhepo mokonda (1) oe matumina ovanthu aveho, nokuna epondolo liokutyilinga; (2) oe makuatesako ovahepi nokankhenda nokulongesa ovalanduli vae okusuka navo; tupu (3) oe upondola okumanako elungavi lietu tuapiñgana, lieta oluhepo. Tutalei ovipuka ovio vitatu vionondaka onongwa.

1. Jesus matumina omalongo aeho Ondaka ya Huku ipopia konthele Jesus okuti: “Apewa outumini, . . . opo ovanthu aveho, novilongo, nomalaka vemuumbile.” (Daniel 7:14) Ove wasokale ouwa wokukala nomutumini wike pala ovanthu aveho? Nawike vali makaluila omalumono oohi. Kese umwe makakala novipuka oviwa. Jesus walaa okuti oe makakala Omutimini wouye nepondolo liokutyilinga. Oe wati: “Outumini auho keulu no pohi neupewa.”—Mateus 28:18.

2. Jesus una onkhenda novahepi Mokueenda kuovilinga viae viokuivisa pano pohi, Jesus wakalele nonkhenda novahepi. Mongeleka, omukai umwe ankho wamana olumono lwae aluho opo ahakulwe, wakuatele kotyikutu tya Jesus nonthumbi yokuti maveluka. Oe wamuene ononkhumbi mbokutunda ohonde omanima 12, iya otyo tyotyili atyimuvondeka unene. Ngetyi ankho tyipopia Ovitumino, ankho kese munthu ayama ukala tyasila. Mahi Jesus wakalele nonkhenda nae. Oe wati: “Mona wange ekolelo liove liekuvelukisa. Enda nombembwa veluka ouvela wove omuvi.”—Marcos 5:25-34.

Omalongeso a Jesus ena epondolo liokupilulula omitima viovanthu, iya navo avakala nonkhenda. Mongeleka, tala etyi Jesus akumbulula omulume ankho uhanda okunoñgonoka oñgeni mahambukiswa Huku. Omulume oo ankho utyii okuti Huku uhanda tukale nohole navakuetu, mahi, oe wapula Jesus okuti: “Olie mukuetu tyilityili?”

Mekumbululo, Jesus wapopia ongeleka yae yankhimana konthele yomulume wongendi ankho utunda ko Jelusalei okuenda ko Jerikoo,  avakwa ovipuka viae asiwa “enthuvia”. Omunakwa umwe ankho ulauka netapalo olio emuvasi akuate konthele onkhuavo yetapalo. Omu Levita nae otyo alinga. “Mahi, omu Samaria umwe, ankho weenda metapalo olio, wemuvasa, iya etyi emumona, akala nokankhenda nae.” Oe wasukala ovipute viomulume oo emutuala kondyuo imwe yovaenda, iya afete hekulu opo ayunge nawa omulume oo wavangua. Jesus apulu okuti: “Olie . . . walekesa okuti omukuavo yomulume watokela pomaoko ovifuanga?” Oe akumbulula okuti: “Oyouna wemulingila okankhenda.” Iya Jesus emuti: “Kalinge ngotyo.”—Lucas 10:25-37.

Ovanthu vakala Onombangi mba Jeova, velilongesa omalongeso oo a Jesus iya avapilulula ovituwa viavo konthele yokukuatesako vana vesukisa. Mongeleka, momukanda wae utiwa Women in Soviet Prisons (Ovakai Movikaleya ko Sovietika) omukai umwe ko Letonia wahoneka konthele youvela wae puetyi ankho aundapa kokaleya ko Potma, pokati kenima 1960, okuti: “Mokueenda kuomuvo auho navela, [Onombangi] ankho vanthyakula nombili. Ankho kutupu vali onkhalelo ongwa yokuhakulwa ndyipeleya.” Ayawisako okuti: “Onombangi mba Jeova ankho otyo vetyitala okuti otyilinga tyavo, tyokukuatesako ovanthu aveho, tyihatale ko nongeleya mbavo ine ovilongo viavo.”

Etyi Onombangi mbumwe mba Jeova mo Ancón ko Equador vesala tyihena onombongo, mokonda ankho yovitateka vionombongo mouye, ovakuatate vavo Onombangi, vatokola okuvevatela okuyawisa onombongo mbavo. Ankho vateleka okulia opo valandese kovalume valala nokufwa onohi (veli polutalatu kokulio). Aveho mewaneno velipaka kumwe, alo umwe ovana. Ankho vahimbika okuteleka ko 1 ola yo kombimba opo tyina omawato ehika ko 4 ola okulia kuapia. Onombongo Onombangi vaundapa, avaavununina kese umwe etyi esukisa.

Onongeleka ombo mbulekesa okuti etyi Jesus alinga netyi alongesa tyotyili tyina epondolo enene liokupilulula ovituwa viovanthu konthele yokukuatesako vana vesukisa.

3. Jesus una epondolo liokupilulula onkhalelo yovanthu Otyituwa tyovanthu tyokulinga ovipuka nelungavi tyiiwe ouye auho. Ombimbiliya ityiihana okuti onkhali. Alo umwe apostolu Paulu wahoneka okuti: “Ame ndyiivite otyitumino etyi konthele yange: tyina ndyihanda okulinga etyi tyaviuka, muame muna otyivi.” Ayawisako okuti: “Olie mandyovola kononkhia ombu? Ndyipandula Huku, menyina lia Jesus Kristu.” (Romanos 7:21-25) Apa Paulu walekesa oñgeni Huku, menyina lia Jesus, mayovola ovafendi vae votyotyili mononkhali vapiñgana, ngelungavi lieta oluhepo. Mavayovolwa ñgeni?

Lumwe konyima yombatisimu ya Jesus, João Batista wapopile konthele ya Jesus okuti: “Talei Ondyona ya Huku, ipola onkhali mouye!” (João 1:29) Apa katutu kombanda yoohi makukeyula ovanthu vayovolwa monkhali nelungavi vapiñgana. (Isaías 11:9) Jesus makanyimako etyi tyeta oluhepo.

Matyikakala ehambu ngatyi pomuwo opo, tyina aveho mavakakala netyi vesukisa! Ondaka ya Huku yati: “Tyotyili, kese umwe makapumphama mombuelo yomuvinyu wae no mombuelo yomukuyu wae, na umwe mekeveetesa owoma.” (Miquéias 4:4) Onondaka ombo, mbulekesa omuwo una aveho mavakala novilinga vihambukiswa, nepamo, nehambu liokukala mouye uhena oluhepo, pala enkhimano lia Jeova.