Bun nyunsu gi den pôtiwan

GADO WORTU e gi wi a dyaranti disi: „A no fu ala ten Gado o frigiti den pôtiwan” (Psalm 9:18). Bijbel e taki tu fu wi Mekiman: „Yu e opo yu anu èn yu e gi ala libisani san den e angri fu kisi” (Psalm 145:16). A howpu disi di skrifi na ini Gado Wortu a no wan dren nomo. Na Almakti Gado kan du san de fanowdu fu tyari wan kaba kon na pôtifasi. San den pôtiwan abi fanowdu?

Wan Afrikan uma di abi sabi fu na ekonomia ben taki dati a moro bun sani di pôti kondre abi fanowdu na wan „makti tiriman di abi switifasi”. Sobun, fu man tyari wan kaba kon na pôtifasi, wan sma de fanowdu di abi a makti nanga a switifasi fu du dati. Wi kan taki tu dati wan tiriman di o tyari wan kaba kon na pôtifasi na ala sei, musu de wan tiriman di e tiri heri grontapu, fu di a de so nofo tron taki son kondre abi en moro bun leki tra kondre. Boiti dati, wan tiriman di o man tyari wan kaba kon na pôtifasi musu man tyari wan kaba kon na a sani di meki taki pôtifasi de. A sani dati na a denki di sma e denki densrefi nomo. Pe wi kan feni so wan bun tiriman?

Gado ben seni Yesus kon nanga a bun nyunsu gi den pôtiwan. Di Yesus opo tanapu fu leisi na ini Gado Buku fu san ede Gado seni en kon, dan a taki: „A yeye fu Yehovah de na mi tapu, bika a salfu mi fu meki a bun nyunsu bekènti na den pôtisma.”​—Lukas 4:16-18.

San na a bun nyunsu?

Gado poti Yesus leki kownu. Disi na bun nyunsu trutru. En na a moro bun tiriman di man tyari wan kaba kon na pôtifasi fu di (1) a o tiri ala sma èn a abi a makti fu tyari kenki kon; (2) a abi sari-ati gi den pôtiwan èn a e leri den bakaman fu en fu yepi den; èn (3) a man tyari wan kaba kon na sani di meki taki pôtifasi de, dati na a gwenti di wi abi fu denki wisrefi nomo. Meki wi go luku den dri sani disi di abi fu du nanga a bun nyunsu.

1. Yesus abi a makti fu tiri ala pipel Gado Wortu e taki fu Yesus: „A gi en a makti fu tiri . . . so taki ala den pipel, nanga den sma di de fu den difrenti kondre èn di e taki difrenti tongo, ben kan dini en” (Danièl 7:14). Prakseri omeni wini sma o kisi te wán tirimakti nomo o tiri ala sma. Te dati de so, dan nowan sma o strei noso feti moro fu kisi den gudu fu grontapu. Ibriwan sma o kisi den srefi wini. Yesus srefi ben gi a dyaranti taki a o de wan Tiriman di ben o tiri grontapu èn di ben o abi a makti fu tyari kenki kon. A ben taki: „Mi kisi ala makti na ini hemel èn na grontapu.”​—Mateyus 28:18.

2. Yesus abi sari-ati gi den pôtiwan Na a ten fu Yesus en diniwroko na grontapu, a ben sori taki a abi sari-ati gi den pôti sma. Fu eksempre, wan uma di ben gebroiki ala en gudu fu pai datrayepi, ben fasi Yesus en krosi fu di a ben howpu taki a ben o kon betre. Na uma disi ben lasi brudu 12 yari kaba èn a no de fu taki dati a ben swaki. Soleki fa a Wet ben taki, dan a ben o meki iniwan sma di fasi en, kon de wan sma di no krin. Ma Yesus ben abi switifasi gi en. A ben taki: „Mi umapikin, na a bribi fu yu meki yu kon betre. Meki sani waka bun gi yu; tan abi wan bun gosontu, bika yu no abi a takru siki moro.”​—Markus 5:25-34.

Den leri fu Yesus abi a krakti fu kenki sma, so taki den srefi abi sari-ati tu gi trawan. Fu eksempre, luku san Yesus ben taigi wan man di ben wani kon sabi san a musu du fu plisi Gado. A man ben sabi taki Gado wani wi fu lobi tra sma, ma a ben aksi Yesus: „Suma na den tra sma di mi musu lobi?”

Dan Yesus fruteri wan agersitori di furu sma sabi. Na ini na agersitori wan man ben teki  waka fu Yerusalem go na Yerikow èn fufuruman ben ròs en èn den libi en drape „fu dede”. Wan priester di ben waka a pasi dati tu, waka pasa na abrasei. Wan Leifisma ben du a srefi. „Ma wan Samariasma di ben waka a pasi dati, kon si a man èn di a si en, a firi sari gi en.” A krin den soro fu a man, a tyari en go na wan presi pe sma e yuru kamra èn a pai a sma di ben abi a presi fu sorgu gi a man di ben kisi mankeri. „Suma . . . ben sori taki den lobi a man di fufuruman ben ròs?”, na so Yesus ben aksi. A man taki: „A sma di ben sori taki a ben abi sari-ati nanga a man.” Dan Yesus taki: „Du a srefi sani tu.”​—Lukas 10:25-37.

Sma di tron Kotoigi fu Yehovah e studeri den leri disi fu Yesus èn den kenki a fasi fa den e denki fu a yepi di den musu yepi sma di de na nowtu. Fu eksempre, wan uma fu Latvia skrifi wan buku pe a ben fruteri fa a ben siki di a ben wroko na a strafuman-kampu na ini Potma na a ten fu 1965. „Na a heri pisi ten di mi ben siki, [den Kotoigi] di ben luku sikisma ben sorgu bun gi mi. Mi no ben kan winsi fu kisi moro betre yepi leki dati.” A taki moro fara: „Yehovah Kotoigi si en leki den plekti fu yepi ala sma awansi fu sortu kerki den de noso fu sortu kondre den de” (Women in Soviet Prisons).

Di na ekonomia situwâsi fu den Kotoigi fu Yehovah na ini Ancón na Ekwador ben meki taki son Kotoigi kon de sondro wroko noso moni, dan den tra Kotoigi bosroiti fu du wan sani fu yepi den fu kon abi moni. Den ben sreka nyanyan di den ben o seri gi fisiman di ben drai kon baka na syoro te den kaba fisi heri neti (prenki na a reti-anusei). Ala sma na ini a gemeente ben yepi, sosrefi den pikin-nengre. Den bigin na a ten fu wán yuru ibri mamanten, so taki a nyanyan ben o sreka kaba te den boto doro fo yuru mamanten. A moni di den Kotoigi ben meki, den ben prati èn ibri sma ben kisi san a ben abi fanowdu.

Den sortu ondrofenitori disi e sori wi taki na eksempre fu Yesus èn den leri fu en abi a krakti fu kenki a denki di sma abi fu a yepi di den musu yepi trawan.

3. Yesus abi a makti fu kenki den fasi fu sondu libisma Wi alamala sabi taki libisma abi a gwenti fu denki densrefi nomo. Bijbel e kari dati sondu. Srefi na apostel Paulus ben skrifi: „Mi kon si taki disi na a wet di de na ini mi: te mi wani du bun, dan ogri de na ini mi.” Baka dati a ben taki: „Suma sa frulusu mi fu a skin di e dede na a fasi disi? Mi e taki Gado tangi nanga yepi fu wi Masra Yesus Krestes!” (Romesma 7:21-25) Na ini den tekst disi Paulus sori fa Gado ben o meki Yesus frulusu den tru anbegiman fu den fasi di den kisi leki sondusma. Wan fu den fasi disi na a denki di sma e denki densrefi nomo èn na disi e meki taki pôtifasi de. Fa Gado o du disi?

Syatu baka a dopu fu Yesus, Yohanes a Dopuman ben taigi sma disi fu Yesus: „Luku! A Pikin Skapu fu Gado di e puru a sondu fu grontapu!” (Yohanes 1:29). Heri esi grontapu o lai nanga sma di kon fri fu a sondu di den kisi èn fu a denki di den e denki densrefi nomo (Yesaya 11:9). Na a ten dati, Yesus sa puru a sani kaba di e meki taki pôtifasi de.

A e gi wi prisiri trutru fu denki fu a ten te ala sma o abi san den abi fanowdu! Gado Wortu e taki: „Ibriwan sma o sidon na ondro en eigi droifibon nanga en eigi figabon. Nowan sma o meki den frede” (Mika 4:4). Na wan moi fasi den wortu dati e taki fu wan ten te ala sma o abi wroko di e gi den prisiri, te sani o waka bun nanga den èn te den o nyan bun fu wan grontapu pe pôtifasi no de. Den sani disi o meki Yehovah kisi prèise.