Kunsa liytʼirinakax yatiñ munapxi

¿Diosar jan jithiqtas yupaychirinakax taqpachanit alaxpachar sarapxpacha?

▪ Walja jaqinakaw Jesusan aka chuymachtʼkir arunakap liytʼapxpacha: “Diosax akapachar wal munatap laykuw mä sapa Yuqapar khitani, taqi khitinakatix jupar iyawsapki ukanakax jan chhaqañapataki, jan ukasti wiñay jakañanïñapataki” (Juan 3:16). ¿Taqi khitinakatï Jehová Dios Awkipar yupaychapki ukanakax wali kusisita ukat wiñay jakañatakiw alaxpachar sarapxani sañt uka arunakampix munpachäna?

Jesusax siskäna uka arunakat amuytʼañäni: “Janiw khitis alaxpacharux makhatkiti, jan ukasti khititix alaxpachat saraqanki ukakiwa, ukasti Jaqin Yuqapawa” (Juan 3:13). Uka arunakarjamaxa, Diosar jan jithiqtas Noé, Abraham, Moisés ukat David luqtirinakapax janiw alaxpachar sarapkänti (Hechos 2:34). Ukhamax ¿kawkirus sarapxpacha? Imatäpki ukankasipkiwa, janiw kuns amuyapkiti, ikisipkaspas ukhamäsipkiwa, kunürutï jiwatanakar jaktayañ urux purinkani ukhakama (Eclesiastés 9:5, 6; Hechos 24:15).

Ukat Biblian qillqatarjamaxa, Jesusax jaktxäna ukhaw alaxpachar sarañat parläna. “Mä utjäwi jumanakatak wakichiriw sarä” sasaw arkirinakaparux säna (Juan 14:2, 3). Uka yatichäwix Diosan yupaychirinakapatakix machaqänwa. Mä qhawqha tiempo qhipatxa, Jesusax jiwasina, jaktasina ukat alaxpachar sarxasinxa, “machaq wiñay jakañ thak [...] jistʼararapistu” sasaw apóstol Pablox qhanañchäna. Ukhakamax janipuniw khitis alaxpachar sarkänti (Hebreos 10:19, 20).

¿Ukhat aksarux Diosar jan jithiqtas luqtirinakax taqinit alaxpachar sarapxañapa sañti munpacha? Janiwa, kunattix alaxpachar sarañax mä qhawqha jaqinakatakikiwa. Jiwañap jakʼankxäna uka arumaxa, Jesusax apostolanakaparux akham sänwa: “Tronon quntʼasipxäta, [...] taripapxañamataki” sasa. Ukhamasti, Jesusamp chika apnaqanipxañapatakiw alaxpachar sarapxañapäna (Lucas 22:28-30).

Janiw apostolanakakix sarapxañapäkänti. Mä visionanxa, apóstol Juanax Jesucristoru ukat jiwatat jaktayat mä qhawqha cristianonakaruw alaxpachankaskir uñjatayna, jupanakatxa akham sasaw qillqatayna: ‘Reyinaka, sacerdotenakrakwa tukuyatapxäna. Taqi aka uraqpacharu apnaqapxañapataki’ sasa (Apocalipsis 3:21; 5:10). ¿Qhawqhanirus uñjäna? Markanakansa, apnaqirinakax mä qhawqhanikiwa. Diosan Apnaqäwipax ukhamarakiwa, Diosan Corderopa Jesusaxa, 144.000 reyinakampiw apnaqanipxani, jupanakax jaqinak taypit alatäpxiwa (Apocalipsis 14:1, 4, 5).

Diosar jan jithiqtas nayra yupaychirinakaparu ukat jichha tiempon yupaychirinakapar jakthapsna ukaxa, 144.000 alaxpachar sarir jaqinakax jukʼanikïpxiwa. Ukhanik alaxpachar sarapxañapax walikiwa, kunattix jupanakaw mä qullan luräwi phuqapxani. Jumax mä uta utachayasiñs amtkasma ukham amuytʼañäni. Jakasta ukhanx walja suma albañilanak utjaspa ukax ¿taqinirut contratasma? Janiwa. Qhawqhaniy munaschi ukhakwa contratasma. Diosax ukhamarakiwa, janiw taqpach yupaychirinakapar alaxpachat Jesusamp chik apnaqanipxañapatak uka suma luräw churkiti.

Uka Apnaqäwiw kunatï Diosax qalltatpacha jaqinakatak amtkäna uka amtap phuqani. Jesusampi 144.000 alaxpachar saririnakampiw aka Uraqxar apnaqanipxani ukat mä paraisor tukuyapxani. Ukanwa Diosar jan jithiqtas yupaychapki ukanakax sumankañan kusisipxani ukat wiñayatak jakapxarakini (Isaías 45:18; Apocalipsis 21:3, 4). Ukat khitinakatï jiwatäpki ukat Diosax jupanakat amtasiski ukanakax jaktayatäpxaniwa (Juan 5:28, 29).

Jehová Diosan nayra yupaychirinakapasa ukat jichha tiempon yupaychirinakapasa wiñay jakañ katuqañ suytʼäwinïpxiwa (Romanos 6:23). Mä jukʼanikiw alaxpachan jakapxani, mä qullan luräw phuqañataki, ukat jila part jaqinakasti paraisor tukuyat Uraqinwa jakapxani.