Kestyon sorti kot nou lekter . . .

Eski tou bann Kretyen fidel i al dan lesyel?

▪ Bokou in lir parol rekonfortan Zezi ki ti dir: “Parski Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16, nou ki’n met an italik.) Eski Zezi ti pe dir ki tou serviter fidel Zeova son Papa ti pou al dan lesyel e viv pour touzour dan lazwa?

I enteresan pour not sa ki Zezi ti dir: “Personn pa’n deza mont dan lesyel, eksepte Fis-de-Lonm ki’n desann sorti dan lesyel.” (Zan 3:13) Sa i vedir ki bann serviter fidel dan lepase parey Noe, Abraam, Moiz ek David pa ti al dan lesyel. (Akt 2:34) Me, kote zot ti ale alor? Senpleman: sa bann serviter dan lepase i dan latonm pe dormi dan lanmor. Zot pa konn nanryen e zot pe esper rezireksyon.​—Eklezyast 9:5, 6; Akt 24:15.

Dapre Labib, Zezi i sa premye dimoun ki ti koz lo lavi dan lesyel apre lanmor. I ti dir son bann zapot ki i ti pou prepar en plas pour zot dan lesyel. (Zan 14:2, 3) Sa ti en keksoz nouvo pour pep Bondye. Pli tar, apre ki Zezi ti’n mor e resisite pour al dan lesyel, zapot Pol ti eksplike ki Zezi ti’n ‘ouver en semen nouvo e vivan’ andotmo en semen ki personn pa ti’n deza pran oparavan.​—Ebre 10:19, 20.

Me, eski sa i vedir ki depi sa letan tou bann serviter fidel ti pou al dan lesyel? Non, parski zis serten ki ti pou al dan lesyel akoz zot in ganny en travay spesyal pour fer. Pandan son dernyen repa, Zezi ti dir son bann zapot ki zot ti pou ‘asiz lo tronn pour zize’ dan son Rwayonm ki dan lesyel. Alor, zot ti pou annan sa privilez pour diriz avek Zezi dan lesyel.​—Lik 22:28-30.

Apard ki bann zapot, lezot imen osi ti pou annan sa responsabilite. Dan en vizyon, zapot Zan ti vwar Zezi dan lesyel avek en group dimoun ki ti ganny resisite e se zot menm zot sa ‘rwayonm pret ki pou rennyen lo later.’ (Revelasyon 3:21; 5:10) Konbyen zot i ti annan? Parey dan nenport gouvernman, zis en ptigin ki gouvernen. I osi menm zafer pour Rwayonm Bondye ki dan lesyel. Zezi, Lanyo Bondye, pe diriz ansanm avek 144,000 dirizan ki’n ganny “sove parmi bann zonm.”​—Revelasyon 14:1, 4, 5.

I vre, 144,000 i en ptigin konpare avek sa kantite serviter fidel dan lepase e dan nou letan. Me i fer sans akoz sa 144,000 ki pou ganny resisite pour al dan lesyel pou annan en misyon spesyal e sakre pour zot akonplir. Si ou ti bezwen fer en lakaz, eski ou ti pou fer kontra avek tou bann mason dan ou rezyon? Non. Ou ti pou zis bezwen lakantite ki neseser pour fer sa louvraz. Pareyman, Bondye pa’n swazir tou serviter fidel pour desarz sa responsabilite spesyal pour diriz avek Zezi dan lesyel.

Sa gouvernman dan lesyel pou akonplir plan ki Bondye i annan pour bann imen depi o konmansman. Zezi ek sa 144,000 ki pou diriz ansanm avek li pou responsab pour fer later antye vin en Paradi, kot en kantite serviter fidel pou viv pour touzour dan lazwa. (Izai 45:18; Revelasyon 21:3, 4) Sa pou enkli bann ki dan memwar Bondye ki pou ganny resisite.​—Zan 5:28, 29.

Tou bann serviter fidel Zeova, ki swa dan lepase oubyen dan nou letan i kapab ganny lavi eternel, sa kado merveye. (Romen 6:23) Zis en ptigin ki pou viv dan lesyel e annan en travay spesyal, me lamazorite pou viv lo later ki pou’n vin en Paradi.