Varesi tava pura . . .

Vakriste navenye wovalimburukwi kuza meguru ndi?

▪ Wovanzi va resa nonkango daJesus dokuhengagwida edi asi: ‘Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.’ (Johanesa 3:16) Jesus ngoso kwa tembe asi vakareli navenye wovalimburukwi woGuhwe, Jehova Karunga, ngava za meguru va ka gwane mwenyo gwanarunye moruhafo rousili ndi?

Koneka nonkango daJesus dokupindura magano edi asi: “Nagumwe si ga ronda meguru, ntudi MunwaMuntu no, ogu ga tunda meguru.” (Johanesa 3:13) Eyi kulikida asi vakareli wovalimburukwi womosiruwo sanare, ngwendi Nowa naAbirahamu naMosesa ntani naNdafita, kapi va za meguru. (Yirugana 2:34) Kupi nye oku va zire? Pausupi: Valimburukwi owo vanare moveli monontoko kuna rara, va ndindire evhumbuko.—Muudisi 9:5, 6; Yirugana 24:15.

Jesus yige gokuhova kutumbura asi koveli vamwe ngava ka parukira meguru konyima zonomfa. Age kwa tanterere vapositoli vendi asi nga ka va wapaikira uturo meguru. (Johanesa 14:2, 3) Esi kwa kere sininke sosipe kovantu vaKarunga. Mupositoli Paurusa ga ya fatwilire asi konyima zonomfa daJesus nokumumvhumbwira meguru, age kwa ‘pongwera varongwa vendi nzira zompe zomwenyo,” ezi va dira kugenda rumwe vantu.—Vahebeli 10:19, 20.

Ngoso eyi kuna kutanta asi kutunda pena vantu navenye wovalimburukwi ngava za meguru ndi? Hawe, morwa evhumbuko lyokukaparukira meguru kuna kara situmbukira esi va gava kovantu vamwe tupu. Mesiku lyokuhulilira eli va kere kumwe, Jesus kwa tanterere vapositoli vendi asi awo ngava ‘ka hingira poyipundi, va ka pangure’ moUhompa wendi wemeguru. Yipo nye, kukapangera kumwe naJesus meguru kwa kere situmbukira sawo.—Rukasa 22:28-30.

Kugusa ko vapositoli, vantu vamwe nawo hena va va pa situmbukira oso sokutetukisa. Memoneko, mupositoli Johanesa kwa mwene meguru Jesus nombunga sovavhumbuki pokuvasingonona ‘ngovahompa novapristeli mokukapangera evhu nalinye.’ (Ehororo 3:21; 5:10) Vangapi va kere? Ngwendi moomu ya kara mwankenye epangero, sivaro sosinunu tupu ava ava pangere. Ya lifana noUhompa ou wemeguru. Jesus, Nzwigona zaKarunga, ngazi pangera kumwe novantu 144 000 ava va “zowora mo movantu.”—Ehororo 14:1, 4, 5.

Yosili, 144 000 kuna kara sivaro sosinunu pokusihetakanesa nosivaro sovalimburukwi navenye womosiruwo sanare nesi setu. Eyi ya zera morwa 144- 000 awo kuvavhumbwira keparu lyemeguru morwa kwa va pa sirugana sokupongoka sokulikarera. Nsene to tungu nzugo, kuvhura o zigide navenye ava va kara nediwo lyokutunga momukunda goge ndi? Hawe. Ove ngo hepa tupu vaava vana gwanene kosirugana oso. Mokulifana, Karunga kapi ga horowora vantu navenye wovalimburukwi mokukapangera kumwe naKristusa meguru.

Epangero eli lyemeguru ngali ka sikisa mo sitambo saKarunga kovantu. Jesus nava nga ka pangera kumwe nawo 144 000 ngava ka gendesa sirugana sokukaninka evhu li ka kare paradisa, omu emukurumbunga lyovalimburukwi ngali ka parukira narunye moruhafo. (Jesaya 45:18; Ehororo 21:3, 4) Amo ngamu ka kwatera mo evhumbuko lyanavenye ava va kara momagano gaKarunga.—Johanesa 5:28, 29.

Nkenye mukareli gomulimburukwi gwaJehova, a kare asi gomosiruwo sanare ndi santani, nga ka gwana uhwi wouwa womwenyo gwanarunye. (Varoma 6:23) Wovasesu tupu ngava ka parukira meguru morwa situmbukira sawo sokulikarera, ano emukurumbunga ngali ka parukira apa pevhu moparadisa.