Okubuzwa Bafundi Bakamagazini Lo . . .

Woke AmaKrestu Athembekileko Aya Ezulwini?

▪ Abanengi bawafundile amezwi kaJesu atjhiyirako athi: “UZimu walithanda kangako iphasi, wabe wanikela ngeNdodana yakhe ekukuphela kwayo, khona kuzakuthi kiloyo okholwa ngiyo angabhubhi, kodwana abe nobuphilo obungapheliko.” (Jwanisi 3:16) Kghani uJesu bekatjho bona boke abakhulekeli abathembekileko bakaYise, uJehova uZimu, bazokuya ezulwini baphile ngokungapheliko ngethabo lamambala?

Tjheja amezwi kaJesu enza umuntu acabange: “Akakho okhe waya ezulwini ngaphandle kweNdodana yoMuntu, eyehla ezulwini yeza ephasinapha.” (Jwanisi 3:13) Lokhu kutjengisa bona abakhulekeli bakaZimu bangesikhathi esidlulileko, njengoNuwa, u-Abrahama, uMosisi noDavidi, zange baye ezulwini. (IZenzo 2:34) Alo-ke, bayephi? Ngokurhunyeziweko: Iinceku zakaZimu ezithembekileko zekadeni zisemathuneni, zilele ubuthongo bokufa, azizwa litho, zilinde ivuko.—UMtjhumayeli 9:5, 6; IZenzo 24:15.

UJesu mumuntu wokuthoma eBhayibhilini ukukhuluma ngokuphila ezulwini ngemva kokufa. Watjela abapostoli bakhe bona uyobalungiselela indawo ezulwini. (Jwanisi 14:2, 3) Lokhu bekuyinto etja ebantwini bakaZimu. Ngokukhamba kwesikhathi umpostoli uPowula wahlathulula bona ngemva kokufa nokuvuselwa kwakaJesu ezulwini, uJesu ‘wavulela abafundi bakhe indlela etja’—indlela okungekho omunye umuntu okhe wakhamba kiyo.—Hebheru 10:19, 20.

Kghani lokho bekutjho bona kusukela ngesikhatheso kuya phambili boke abathembekileko bazokuya ezulwini? Awa, ngombana ukuvuselwa ezulwini kuhlobene eduze nesabelo esinikelwa abantu abathileko kwaphela. Ngobusuku bamaswaphela anabapostoli bakhe, uJesu wabatjela bona ‘bazokuhlala eenhlalweni zobukhosi’ eMbuswenakhe wezulwini. Ngalokho, ukubusa ezulwini noJesu bekuzokuba sisabelo sabo.—Luka 22:28-30.

Ngaphandle kwabapostoli, nabanye abantu bebazokunikelwa isabelo esibabazekakwesi. Embonweni, umpostoli uJwanisi wabona uJesu anesiqhema sabavusiweko ezulwini asihlathulula ‘njengombuso nabapristi abazokubusa iphasi.’ (ISambulo 3:21; 5:10) Bangaki ebebalapho? Njengakomunye nomunye urhulumende, linani elilinganiselweko kwaphela elibusako. Kungokufanako nangoMbuso wezulwini lo. UJesu, iMvana kaZimu, ubusa naba-144 000 ‘abahlengwe ebantwini.’—ISambulo 14:1, 4, 5.

Liqiniso, i-144 000 linani labantu elincani nelimadaniswa nelabo boke abathembekileko, bekadeni nebagadesi. Kodwana lokho kuyazwisiseka ngombana aba-144 000 bavuselwa ezulwini ukwenza isabelo somsebenzi esicwengileko. Akhe sithi bewufuna ukwakha indlu, bewungaqatjha woke umuntu omumakhi endaweni yekhenu? Awa. Bewungaqatjha kwaphela inani elitlhogekako ukwenza umsebenzi loyo. Ngokufanako, akusibo boke abathembekileko abakhethwa nguZimu bona bafumane ilungelo elikhulu lokubusa noKrestu ezulwini.

Urhulumende wezulwini lo uzokufeza umnqopho kaZimu wemathomeni ngesintu. UJesu nazokubusa nabo aba-144 000 bazokunqophisa ukutjhugululwa kwephasi libe yiparadeyisi, lapho inani elikhulu labathembekileko lizokuphila khona ngokungapheliko ngethabo. (Isaya 45:18; ISambulo 21:3, 4) Lokho kuzokubandakanya nalabo abasemkhumbulweni kaZimu, abazokuvuswa.—Jwanisi 5:28, 29.

Woke umkhulekeli kaJehova othembekileko—wekadeni namtjhana wagadesi—angafumana isipho esibabazekako sokuphila okungapheliko. (Roma 6:23) Abambalwa bazokufumana ukuphila ezulwini ngebanga lesabelo esikhethekileko, inengi lizokufumana ukuphila ephasini eliyiparadeyisi.