Ovatangi Vapula . . .

Okuti Ovakristau aveho vekolelo mavaende keulu?

▪ Ovanyingi vehole okutanga onondaka mbuungumanesa mba Jesus mbati: “Huku una oluembia olunene novanthu, waava omona wae wongunga, opo kese omunthu ukala nekolelo mwe ahakanyimueko, mahi akakale nomuenyo uhapu.” (João 3:16) Okuti Jesus ankho uhanda okuti ovafendi aveho vekolelo va Tate yae Jeova Huku, mavaende keulu opo vakakale nomuenyo uhapu nehambu liotyotyili?

Nkhele soka konondaka ombu mba Jesus mbati: “Na umwe omunthu walonda keulu, oyouna vala watunda keulu, Omona womulume.” (João 3:13) Otyo tyilekesa okuti ovafendi vokohale vekolelo, nga Noe na Abraiau na Moisesi na David, kavaile keulu. (Atos 2:34) Iya opi aveho vaya? Monondaka mbehehi: Ovanthu vekolelo vo kohale vekahi melangalo, velele mononkhia, tyihei natyike, vakevelela etutilo.—Eclesiastes 9:5, 6; Atos 24:15.

O Jesus vala wahimbika okupopia okuti vamwe mavaende keulu tyina vamankhi. Oe wapopila ono apostolu mbae okuti mekevepakela omphangu keulu. (João 14:2, 3) Otyo ankho otyipuka otyipe kovanthu va Huku. Iya apostolu Paulu ahangununa okuti, konyima yononkhia mba Jesus netutilo liae aende keulu, ‘waikula ondyila omphe yomuenyo pala ovalongwa vae’. Ondyila oyo, ankho kamuneende nawike.—Hebreus 10:19, 20.

Okuti otyo tyilekesa okuti okuhimbikila pono apostolu, ovanthu aveho vekolelo mavaende keulu? Au, mokonda etutilo liokuenda keulu o pala vala vamwe vaholovonwa mavakapewa otyilinga. Motyinthiki tyahulililako vakala kumwe, Jesus wapopila ono apostolu mbae okuti ‘mavakapumphama kovipundi vioutumini’ Mouhamba wae keulu. Ngotyo, okutumina na Jesus keulu, ankho otyilinga mavapewa.—Lucas 22:28-30.

Ankho ha no apostolu vala, kuna vali ovanthu ovakuavo mavapewa otyilinga otyo otyiwa unene. Memonekelo limwe, apostolu João wamona Jesus keulu notyiha tyovanthu vatutiliswa vatiwa ‘ouhamba novanakwa mavakatumina kombanda yoohi.’ (Revelação 3:21; 5:10) Ankho veñgapi vekahiko? Ngetyi tyikahi omautumini aeho, vatumina kevehi. Nouhamba wo keulu otyipuka tyike. Jesus, Ondyona ya Huku, matumina vala novanthu 144.000 ‘valandwa pokati kovanthu aveho.—Revelação 14:1, 4, 5.

Tyotyili, o 144.000 kavehi okuveeleka novanthu aveho vekolelo, vo kohale no vo hono. Anthi, vo 144.000 mavatutiliswa pala omuenyo wokeulu mokonda yotyilinga tyikola mavakalinga. Inkha uhanda okutunga ondyuo, okuti mokongo aveho potyilongo vena ounongo wokutunga? Au. Ñgeno wakonga vala vana wesukisa. Tupu, Huku kaholovonene ovanthu aveho vekolelo, pala otyilinga tyokukatumina na Kristu keulu.

Ouhamba oo wokeulu makafuisapo etyi Huku ahandelele ovanthu ponthyimbi. Jesus no 144.000 makatumina navo, mavakaendesa ovilinga viokupilulula oohi aiho opo ikale omphangu yombembwa, muna ovanthu aveho vekolelo veheviliwa okuvalulwa mavakakala apeho nehambu. (Isaías 45:18; Revelação 21:3, 4) Povanthu ovo pakutikinya vana vekahi mehinangelo lia Huku, mavakatutiliswa.—João 5:28, 29.

Kese muumbili wekolelo wa Jeova, kohale ine o hono, upondola okutambula otyali otyo otyiwa unene tyomuenyo uhapu. (Romanos 6:23) Ovanthu vehehi mavakatambula omuenyo keulu pala otyilinga tyakolela, iya otyinyingi otyinene mavakatambula omuenyo momphangu yombembwa kombanda yoohi.