Leeqkunan yachayta munanku

¿Lliw hunt’aq cristianochu hanaq pachaman rin?

▪ Jesusmi nirqan: “Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq, aswanpas wiñay kawsayniyoq kananpaq”, nispa (Juan 3:16). Chhaynaqa, ¿llapa Diosta serviq runakunachu hanaq pachaman rinqaku? Manan.

Jesuspa nisqanpi yuyaykuy, nirqanmi: “Manan pipas hanaq pachamanqa wicharqanchu, aswanpas hanaq pachamanta uraykamuq Runaq Churillanmi”, nispa (Juan 3:13). Chaypin yachanchis ñawpa tiempopi Diospa hunt’aq serviqninkuna Noé, Abrahán, Moisés Davidpas wañuspaqa manan hanaq pachamanchu rirqanku (Hechos 2:34). Chhaynaqa, ¿maymanmi rirqanku? Paykunaqa panteonpi p’ampasqan kashanku kawsarinpunanku p’unchay chayamunankama, chaypiqa manan imatapas yachankuchu nitaq sientenkuchu (Eclesiastés 9:5, 6; Hechos 24:15).

Kay pachaman hamuspañan Jesús hanaq pachaman ripuymantaqa rimarqan. Apostolninkunamanmi prometerqan hanaq pachaman rispa huk cheqasta paykunapaq preparamunanta (Juan 14:2, 3). Chay yachachikuytaqa chayllaraqmi uyarisharqanku. Qhepamanmi apóstol Pablo nirqan Jesús wañusqanwan, kawsarimpusqanwan, hanaq pachaman kutipusqanwan ima qatikuqninkunapaq ‘huk mosoq [...] ñanta kicharisqanmanta’, chay ñannintaqa manaraqmi pipas risqaraqchu (Hebreos 10:19, 20).

Chhaynaqa, ¿chay tiempomantapachachu llapa Diospaq hunt’aq cristianokuna hanaq pachaman rinkuman? Manan. Hanaq pachapaq kawsaripuyqa wakin runakunallapaqmi, paykunatan encargakurqan huk llank’ayta aparinankupaq. Reinonpi kamachimunankumantan Jesús apostolninkunata nirqan: “Juzgaspa kamachinaykichispaq tiyaykunkichis”, nispa (Lucas 22:28-30). Chhaynaqa huk llank’aytan aparinanku karqan: Jesuswanmi hanaq pachamanta kamachimunanku karqan.

Ichaqa manan apostolkunallachu chay llank’ayta aparinankupaqqa akllasqa karqanku. Huk rikhuriypin apóstol Juan Jesusta hanaq pachapi rikurqan huk t’aqa kawsarimpuq runakunatawan, paykunamantan qelqarqan kay pachata kamachimunankupaq reykunata sacerdotekunata Dios churasqanta (Apocalipsis 3:21; 5:10). ¿Hayk’a runakunatan rikurqan? Imaynan huk nacionpiqa pisilla gobiernopi kamachimunku, chhaynallataqmi hanaq pacha gobiernopipas. Diospa Corderon Jesusmi 144.000 reykunapiwan kamachimunqa. Paykunaqa “runakuna ukhumanta ñawpaqkaq ruru hinan Diospaq Corderopaqwan rantisqa karqanku” (Apocalipsis 14:1, 4, 5).

144.000 runakunaqa pisillan kanku ñawpaq tiempopi kay tiempopipas Diosta hunt’aq sonqowan serviq cristianokunamantaqa. Ichaqa pisilla kasqankuqa allillanmi, paykunaqa Diospa kamachisqan llank’ayta aparinankupaqmi hanaq pachaman rinqaku. Yuyaykuy huk wasita hatarichinaykipi, chaypaq, ¿llapan allin albañilkunatachu contratawaq? ¿Manan riki? aswanpas chaypaq necesitakusqallantan. Chaynallataqmi Diospas manan llapan hunt’aq sonqo cristianokunamanchu chay sumaq llank’ayta qon.

Chay hanaq pacha gobiernoqa runakunapaq qallariypi Diospa munasqantan hunt’anqa. Jesuswan 144.000 cristianokunapiwanmi kay Hallp’ata sumaq paraisoman tukuchinqa. Chaypin hunt’aq sonqowan Diosta serviq cristianokuna kusisqa wiñaypaq tiyanqaku (Isaías 45:18; Apocalipsis 21:3, 4). Chaypin Diospa yuyarisqan runakunapas kawsarimpunqaku (Juan 5:28, 29).

Ñawpa tiempopipas kay tiempopipas llapa hunt’aq sonqowan Diosta serviq runakunapaqmi chay wiñay kawsay suyakuyqa (Romanos 6:23). Pisillan hanaq pachapi tiyanqaku huk sumaq llank’ayta aparinankupaq, ichaqa yaqa llapa runakunan kay Hallp’api tiyanqaku sumaq paraisopi.