Umbuto Lovela Kubafundzi . . .

▪ Bantfu labanyenti bayawati emavi aJesu ladvudvutako latsi: “Nkulunkulu walitsandza live kakhulu kangangekutsi wadzimate wanikela ngeNdvodzana yakhe lekukuphela kwayo, kuze kutsi nome ngubani lokholwa ngiyo angabhubhi, kodvwa abe nekuphila lokuphakadze.” (Johane 3:16) Jesu abesho kutsi tonkhe tikhonti letetsembekile taNkulunkulu Jehova betitawuya ezulwini yini kute tiphile phakadze ngenjabulo?

Asewunake nankha emavi aJesu lasenta sicabangisise: “Kute lowase wenyukela ezulwini ngaphandle kweNdvodzana yeMuntfu, leyehla ezulwini.” (Johane 3:13) Loku kusho kutsi tikhonti letetsembekile tasendvulo njengaNowa, Abrahama, Mosi, kanye naDavide, atizange tiye ezulwini. (Imisebenti 2:34) Tayaphi-ke? Ngalamafisha nje, letikhonti letetsembekile tasendvulo tilele emathuneni, tisesimeni sekungati lutfo, futsi tilindzele kuvuswa.​—Umshumayeli 9:5, 6; Imisebenti 24:15.

Jesu ngumuntfu wekucala lowatsi labanye bantfu bebatawuphila ezulwini ngemuva kwekufa. Watjela baphostoli bakhe kutsi utawubalungisela indzawo ezulwini. (Johane 14:2, 3) Lena bekuyintfo lensha kubantfu baNkulunkulu. Ngekuhamba kwesikhatsi, Pawula wachaza kutsi ngemuva kwekufa kwaJesu kanye nekuvuselwa kwakhe ezulwini, ‘wabavulela indlela lensha’​—lokuyindlela lengazange ike ihanjwe ngumuntfu.​—Hebheru 10:19, 20.

Loku kusho kutsi kusukela ngaleso sikhatsi bonkhe labetsembekile bebatawuya ezulwini yini? Cha, ngobe luvuko lwasezulwini lwentiwa ngesizatfu semsebenti labanye bantfu labaniketwe wona. Ngebusuku bekugcina labucitsa nebaphostoli bakhe, Jesu wabatjela kutsi ‘bayawuhlala etihlalweni behlulele’ eMbusweni wakhe wasezulwini. Ngako-ke, bebatawuba nemsebenti wekubusa kanye naJesu ezulwini.​—Lukha 22:28-30.

Ngaphandle kwebaphostoli, labanye bantfu nabo bebatawuniketwa lomsebenti lojabulisako. Embonweni, umphostoli Johane wabona Jesu kanye nelicembu lalabo labavuselwe ezulwini labachazwa ngekutsi ‘ngemakhosi nebaphristi labayawubusa etikwemhlaba wonkhe.’ (Sembulo 3:21; 5:10) Bebabangakhi? Njengakubo bonkhe bohulumende, liba lincane linani lebantfu lababusako. Kunjalo-ke nangeMbuso wasezulwini. Jesu, loliWundlu laNkulunkulu, utawubusa nalabangu-144 000 ‘labahlengwe kubo bonkhe bantfu.’​—Sembulo 14:1, 4, 5.

Kuliciniso kutsi leli linani lelincane nalicatsaniswa nelinani letikhonti letetsembekile, tasendvulo kanye netalamuhla. Kodvwa loku kuyacondzakala ngobe laba labangu-144 000 bavuselwa ezulwini kute bayewukwenta umsebenti longcwele. Kube bewufuna kwakha indlu, bewutawubacasha bonkhe yini bakhi labanelikhono endzaweni yakini? Cha. Bewutawucasha kuphela labo lobadzingako kute kwentiwe lomsebenti. Ngendlela lefananako, akusibo bonkhe bantfu labetsembekile Nkulunkulu labakhetsile kute babuse naKhristu ezulwini.

Lohulumende wasezulwini utawufeza injongo yasekucaleni Nkulunkulu labenayo ngebantfu. Jesu kanye nalabangu-144 000 latawubusa nabo batawucondzisa emsebentini wekugucula wonkhe umhlaba kutsi ube lipharadisi, lapho tikhonti letetsembekile letinyenti kakhulu titawuphila phakadze ngenjabulo. (Isaya 45:18; Sembulo 21:3, 4) Loku kutawufaka ekhatsi labo labasenkhumbulweni yaNkulunkulu, futsi labatawuvuswa.​—Johane 5:28, 29.

Tonkhe tikhonti taJehova letetsembekile​—tasendvulo netalamuhla—​tingasitfola lesipho lesijabulisako sekuphila lokuphakadze. (Roma 6:23) Labambalwa batawuphila ezulwini kute bente umsebenti lokhetsekile, bese kutsi linyenti litfole kuphila emhlabeni lolipharadisi.