Lee-naʼin nia pergunta . . .

Ema kristaun hotu neʼebé laran-metin bá lalehan kuandu mate ka lae?

▪ Ema barak lee ona Jesus nia liafuan neʼe: “Maromak hadomi tebes mundu toʼo fó Nia Oan-Mane mesak, atu ema hotu neʼebé fiar iha nia la bele lakon, maibé hetan moris rohan-laek.” (Joao 3:16) Jesus nia liafuan neʼe hatudu katak ema hotu neʼebé ho laran-metin adora ninia Aman, Maromak Jeová, sei bá lalehan no hetan moris rohan-laek iha neʼebá ka lae?

Haree toʼok buat neʼebé Jesus hatete: “Ema ida ladauk saʼe ba lalehan; maibé ida deʼit neʼebé tun husi lalehan, katak Oan-Mane.” (Joao 3:13) Ida-neʼe hatudu katak fiar-naʼin iha tempu uluk hanesan Noé, Abraão, Moisés, no David la bá lalehan. (Apostolu 2:34) Se nuneʼe, sira hotu iha neʼebé? Bíblia hatudu katak Maromak nia atan sira-neʼe hotu hanesan toba deʼit iha rate, sira la hatene buat ida no hein atu hetan moris-hiʼas fali.—Joao 11:11-13; Apostolu 24:15.

Jesus mak ema primeiru neʼebé hatete katak iha ema balu neʼebé sei bá lalehan depois sira mate. Nia fó-hatene ba ninia apóstolu sira katak nia sei hadiʼa fatin ba sira iha lalehan. (Joao 14:2, 3) Neʼe mak buat foun neʼebé Jesus fó-hatene ba Maromak nia atan sira. Apóstolu Paulo mós esplika katak depois Jesus mate no hetan moris-hiʼas ba lalehan, nia loke “dalan foun” ba ninia dixípulu sira, neʼe katak liuhusi Jesus, sira iha esperansa atu bá lalehan.—Ebreu 10:19, 20.

Neʼe katak husi tempu neʼebá, ema kristaun hotu neʼebé laran-metin bá lalehan ka lae? Lae, tanba Maromak fó knaar espesiál ba ema balu deʼit no sira sei hetan moris-hiʼas no saʼe ba lalehan. Iha Jesus nia kalan ikus hamutuk ho ninia apóstolu sira, nia hatete katak sira sei ‘tuur iha kadunan atu tesi lia’ iha Maromak nia Reinu, ka Ukun iha lalehan. Nuneʼe, sira simu knaar espesiál atu ukun hamutuk ho Jesus iha lalehan.—Lucas 22:28-30.

Maibé Maromak fó mós knaar furak neʼe ba ema seluk, laʼós ba apóstolu sira deʼit. Iha apóstolu João nia vizaun, nia haree Jesus hamutuk ho ema husi “rasa, lia, povu no nasaun sira hotu” neʼebé hetan moris-hiʼas ona iha lalehan no sira sai ‘reinu no amlulik atu ukun raiklaran tomak’. (Apokalipse 3:21; 5:9, 10) Sira hamutuk ema naʼin-hira? Hanesan iha ema nia governu, iha ema uitoan deʼit neʼebé simu knaar atu ukun. Ida-neʼe mós hanesan ho Maromak nia Ukun iha lalehan. Jesus, Maromak nia Bibi-Oan, sei ukun hamutuk ho ema naʼin-144.000 neʼebé Maromak hili husi “ema sira leet”.—Apokalipse 14:1, 4, 5.

Loos duni katak ema naʼin-144.000 mak ema uitoan deʼit se kompara ho fiar-naʼin sira iha tempu uluk toʼo agora. Maibé hanesan Bíblia esplika ona ema naʼin-144.000 neʼebé hetan moris-hiʼas ba lalehan iha knaar sagradu neʼebé sira sei halo iha neʼebá. Se Ita atu harii uma ida, Ita sei uza badain sira hotu neʼebé iha Ita-nia área ka lae? Lae. Ita sei uza deʼit badain balu atu halo serbisu neʼebé Ita presiza atu harii uma ida. Hanesan neʼe mós, Maromak hili fiar-naʼin balu deʼit atu halo knaar espesiál hodi ukun hamutuk ho Kristu iha lalehan.

Liuhusi Maromak nia Ukun iha lalehan, Jesus no sira naʼin-144.000 sei halo serbisu hodi kumpre Maromak nia hakarak uluk nian ba ema. Ukun-naʼin sira-neʼe sei tau matan ba serbisu neʼebé ema halaʼo hodi mundu tomak sai furak hanesan jardín Eden. Iha tempu neʼebá, ema-lubun boot neʼebé laran-metin ba Maromak sei haksolok hodi hetan moris ba nafatin iha rai. (Isaías [Yesaya] 45:18; Apokalipse 21:3, 4) Ema sira-neʼe mós inklui sira neʼebé sei hetan moris-hiʼas.—Joao 5:28, 29.

Ema ida-idak neʼebé laran-metin hodi adora Maromak Jeová iha tempu uluk no ohin loron iha esperansa atu simu prezente moris ba nafatin. (Roma 6:23) Ema balu sei moris iha lalehan atu halaʼo knaar espesiál ida, maibé ema-lubun boot sei simu moris iha mundu neʼebé sei sai furak hanesan jardín Eden.