‘Eke He‘etau Kau Lautohí . . .

‘Oku Ō ‘a e Kau Kalisitiane Faitōnunga Kotoa pē ki Hēvani?

▪ Kuo lau ‘e he tokolahi ‘a e lea fakafiemālie ‘a Sīsuú: “Na‘e ‘ofa pehe ‘a e ‘Otua ki māmāni, ko ia na‘a ne foaki hono ‘Alo tofu-pe-taha-ne-fakatupu, koe‘uhi ko ia kotoa pe ‘oku tui pikitai kiate ia ke ‘oua na‘a ‘auha, kae ma‘u ‘a e mo‘ui ta‘engata.” (Sione 3:16) Ne ‘uhinga ‘a Sīsuú ko e kau lotu faitōnunga kotoa pē ‘a ‘ene Tamaí, ‘a Sihova ko e ‘Otuá, te nau ō ki hēvani ke ma‘u ai ‘a e mo‘ui ta‘engatá he fiefia mo‘oni?

Fakatokanga‘i ange ‘a e fakamatala fakatupu-fakakaukau ‘a Sīsuú: “Kuo te‘eki ke ‘alu hake ha toko taha ‘o hu ki langi, ngata pe ‘iate ia na‘e ‘alu hifo mei he langi, ko e Fanautama ‘a Tangata.” (Sione 3:13) ‘Oku fakahu‘unga he me‘á ni ko e kau lotu faitōnunga he kuohilí, hangē ko Noa, ‘Ēpalahame, Mōsese, mo Tēvitá, na‘e ‘ikai te nau ō ki hēvani. (Ngāue 2:34) Ko fē leva ne nau ō kotoa ki aí? ‘I hono fakanounoú: Ko e kau faitōnunga ‘o e kuonga mu‘á ‘oku nau ‘i he fa‘itoká, ‘o mohe ‘i he maté, ‘ikai toe ‘ilo ha me‘a, ‘o tatali ai ki he toetu‘ú.—Koheleti 9:5, 6; Ngāue 24:15.

Ko e ‘uluaki fakamatala ‘a e Tohi Tapú ki he mo‘ui fakahēvani hili ‘a e maté ne toe fai mo ia foki ‘e Sīsū. Na‘á ne tala ki he‘ene kau ‘apositoló te ne teuteu ha potu mo‘onautolu ‘i hēvani. (Sione 14:2, 3) Ko e me‘a eni na‘e fo‘ou ki he kakai ‘a e ‘Otuá. Ne fakamatala ki mui ‘a e ‘apositolo ko Paulá ‘o pehē, ‘i he hili e pekia ‘a Sīsū mo ‘ene toetu‘u ki hēvaní, ko Sīsū ‘ne ne tofa ma‘a ‘ene kau ākongá ha hala fo‘ou mo mo‘ui’—ko ha hala kuo te‘eki ai ke fononga ai ha toe tangata kehe ki mu‘a.—Hepelu 10:19, 20.

‘Oku ‘uhinga ení mei ai ‘o faai mai ‘e ō ‘a e fa‘ahinga kotoa pē ki hēvani? ‘Ikai, he ko e toetu‘u ki hēvaní ‘oku felāve‘i vāofi ia mo ha vāhenga-ngāue kuo ‘oange pē ki he ni‘ihi ‘o e fa‘ahinga ‘o e tangatá. ‘I honau efiafi faka‘osi fakatahá, na‘e tala ai ‘e Sīsū ki he‘ene kau ‘apositoló te nau ‘nofo ki ha ngaahi taloni, ‘o fakamaau’ ‘i hono Pule‘anga fakahēvaní. Ko ia ai, ko e pule fakataha mo Sīsū ‘i hēvaní na‘e pau ke hoko ia ko honau vāhenga-ngāue.—Luke 22:28-30.

Tuku kehe e kau ‘apositoló, ‘e toe ‘oange ki he ni‘ihi kehe he fa‘ahinga ‘o e tangatá ‘a e vāhenga-ngāue fakaofo ko ení. ‘I ha vīsone, ne mamata ai ‘a e ‘apositolo ko Sioné kia Sīsū fakataha mo ha kulupu ‘o e fa‘ahinga kuo toetu‘ú ‘i hēvani kuo fakamatala‘i “ko e pule‘anga mo e ngaahi taula‘eiki: Pea te nau Hau ‘i mamani.” (Fakahā 3:21; 5:10) Ko e toko fiha ‘o kinautolu te nau ‘i aí? Hangē pē ko ia ‘i he founga-pule kotoa pē, ko ha tokolahi fakangatangata pē ‘oku pulé. ‘Oku pehē pē foki e Pule‘anga fakahēvani ko ení. Ko Sīsū, ‘a e Lami ‘a e ‘Otuá, ‘e pule fakataha mo e kaungāpule ‘e toko 144,000 “na‘e fakatau mei he kakai.”—Fakahā 14:1, 4, 5.

Ko e mo‘oni, ko e toko 144,000 ko ha fika si‘isi‘i ia ‘i he fakahoa atu ki he tokolahi ‘o e fa‘ahinga faitōnungá kotoa, he kuohilí mo e lolotongá ni. Ka ‘oku mahinongofua eni koe‘uhí ko e toko 144,000 ‘oku nau toetu‘u ki hēvaní ki ha vāhenga-ngāue toputapu makehe ‘o e ngāué. Kapau ‘oku fiema‘u ke ke langa ha fale, te ke aleapau mo e kau langa pōto‘i kotoa pē ‘i ho feitu‘ú? ‘Ikai. Te ke fiema‘u e tokolahi pē ko ē ‘oku fiema‘u ki he ngāué. ‘I he founga meimei tatau, ‘oku ‘ikai fili e fa‘ahinga faitōnunga kotoa pē ‘e he ‘Otuá ki he monū makehe ‘o e pule fakataha mo Kalaisi ‘i hēvaní.

Ko e founga-pule fakahēvani ko ení te ne fakahoko e mu‘aki taumu‘a ‘a e ‘Otuá ki he fa‘ahinga ‘o e tangatá. Ko Sīsū mo hono kaungāpule ‘e toko 144,000 te nau tokanga‘i hono liliu e māmaní ki ha palataisi fakaemāmanilahi, ‘a ia ‘e mo‘ui fiefia ta‘engata ai e fu‘u tokolahi ta‘efa‘alaua ‘o e fa‘ahinga faitōnungá. (Aisea 45:18; Fakahā 21:3, 4) ‘E kau heni ‘a e fa‘ahinga ko ia ‘oku ‘i he manatu ‘a e ‘Otuá, ‘a ia te nau toetu‘ú.—Sione 5:28, 29.

Ko e kau lotu faitōnunga kotoa pē ‘a Sihova—he kuohilí pe lolotongá ni—‘e lava ke nau ma‘u ‘a e me‘a‘ofa fakaofo ko e mo‘ui ta‘engatá. (Loma 6:23) Ko ha tokosi‘i te nau ma‘u e mo‘ui ‘i hēvani ki ha vāhenga-ngāue makehe, pea ko e tokolahi tahá te nau ma‘u e mo‘ui he māmaní ‘i ha palataisi fakaemāmanilahi.