Basikubala Balabuzya . . .

Sena Banakristo Boonse Basyomeka Baunka Kujulu?

▪ Bantu banji bakabala majwi aa Jesu aaumbulizya aakuti: “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atakanyonyoonwi pele akabe abuumi butamani.” (Johane 3:16) Sena Jesu wakali kupandulula kuti boonse bakombi ba Jehova Leza basyomeka bayoounka kujulu kutegwa bakabe abuumi butamani bukkomanisya?

Amubone kaambo nkakaamba Jesu ikapa kukkala aansi kuyeeya naakati: “Kunyina muntu wakatanta kuya kujulu, pele buyo ooyo wakaseluka kuzwa kujulu, Mwana wamuntu.” (Johane 3:13) Eeci caamba kuti bakombi basyomeka bakaindi mbuli Nowa, Abrahamu, Musa, alimwi a Davida tiibakaunka kujulu pe. (Milimo 2:34) Ino bakaunka kuli? Mubufwaafwi: Bantu aaba basyomeka bakaindi bali muzyuumbwe, balifwide, tabazyi cintu cili coonse, balindila bubuke.—Mukambausi 9:5, 6; Milimo 24:15.

Jesu nguwakasaanguna kwaamba kuti bamwi bayookkala kujulu baakumana kufwa. Wakaambila baapostolo bakwe kuti wakali kuyoobabambila busena kujulu. (Johane 14:2, 3) Eeci cakaba ceenzu kubantu ba Leza. Mwaapostolo Paulo wakapandulula kuti naakamana kufwa Jesu akubusyigwa kuya kujulu, ‘wakajalwida basikwiiya bakwe nzila mpya alimwi iipona’—inzila iitanaindidwe amuntu uuli woonse.—Bahebulayo 10:19, 20.

Sena eeci caamba kuti bantu boonse basyomeka bayoounka kujulu? Peepe, nkaambo bubuke bwakujulu bweelela buyo bantu bamwi bapedwe mulimo. Imangolezya mubuzuba bwamamanino, Jesu wakaambila baapostolo bakwe kuti ‘bayookkala azyuuno zyabwami akubeteka’ mu Bwami bwakwe bwakujulu. Aboobo, kulela antoomwe a Jesu kujulu nguwakali kuyooba mulimo wabo.—Luka 22:28-30.

Kunze lyabaapostolo, bantu bamwi abalo bakali kuyoopegwa mulimo nguwenya ooyu mubotu. Mucilengaano, mwaapostolo Johane wakabona Jesu akabunga kabaabo bakabusyigwa kujulu ibaambwa kuti ‘bwami abapaizi ibayoolela nyika.’ (Ciyubunuzyo 3:21; 5:10) Ino bakali bongaye? Mbuli mumfwulumende iili yoonse, mbasyoonto buyo beendelezya. Ncimwi buyo a Bwami bwa kujulu. Jesu, mwanaambelele wa Leza uyoolela abasikulelanyina bali 144,000 “bakaulwa akati kabantu.”—Ciyubunuzyo 14:1, 4, 5.

Masimpe, mweelwe wabantu bali 144,000 musyoonto kweelana awabantu basyomeka bakaindi aba mazuba aano. Pele eeci cilamvwika nkaambo bantu bali 144,000 balabusyigwa kuya kujulu akupegwa mulimo uusetekene. Ikuti kamuyanda kuyaka ŋanda, sena inga mwabaita boonse bacizyi kuyaka? Peepe. Inga mwaita buyo bantu bayandika kweelana amulimo uyandika kucitwa. Mbubwenya buyo, Leza taakapa coolwe eeci cilibedelede cakulela a Kristo kujulu kubantu boonse basyomeka.

Mfulumende eeyi yakujulu iyoozuzikizya makanze aa Leza aakusaanguna kujatikizya bantu. Jesu antoomwe abasikulelanyina bali 144,000 bayooendelezya mulimo wakubambulula nyika yoonse kuba paradaiso, oomu bantu banji basyomeka mobayookkala cakukkomana kukabe kutamani. (Isaya 45:18; Ciyubunuzyo 21:3, 4) Eeci ciyoobikkilizya abaabo mbayeeyede Leza, ibayoobusyigwa alimwi.—Johane 5:28, 29.

Muntu woonse uusyomeka uukomba Jehova—wakaindi naa wamazuba aano—ulakonzya kutambula cipego citaliboteli cabuumi butamani. (Baloma 6:23) Basyoonto bayoopegwa buumi kujulu kutegwa bakabeleke mulimo uulibedelede, pele bunji bwabantu bayootambula buumi muparadaiso anyika.