Tuku katsiputunkgo tiku likgalhtawakgakgo

¿Xlikana pi putum tiku ni makgxtakgkgo Dios ankgo kʼakgapun?

▪ Lhuwa tiku likgalhtawakgakgonita umakgolh lu tlan tachuwin nema Jesús tiwa: «Lhuwa chuna mpaxkilh Dios ntachixkuwitat, wa ntilimastalh nchastum xKam, lakimpi xlipaks wa nti nkanajlaniy, ni katitsankgalh, [...] wata nakgalhiy xlatamat wa ntu xaliankgaIhin» (Juan 3:16). ¿Xwamputun Jesús pi putum xlakskujni xTlat, Jehová naʼankgo kʼakgapun chu putum kilhtamaku lipaxaw nalatamakgo?

Kaʼakxilhti tuku wa Jesús xlakata uma: «Na ti ni atawakay nkakgapun, [...] xman wa nti ntaktachi nkakgapun, wa cha Xkam nchixku» (Juan 3:13). Uma wamputun pi tiku ni makgxtakgolh Dios makgasa la Noé, Abrahán, Moisés o David, ni ankgolh akgapun akxni nikgolh (Hechos 2:34). ¿Niku ankgolh? Anta wilakgolh niku kamaʼaknukan, o kaʼakgtapukan nin, lhtatamakgolh chu nitu katsikgo, kgalhimakgolh akxni nakamalakastakwanikan (Eclesiastés 9:5, 6; Hechos 24:15).

Biblia wan pi Jesús wantiku pulana lichuwinalh pi xʼama an kʼakgapun akxni xnilh. Kawanilh xʼapóstoles pi xʼama kakaxtlawani kʼakgapun niku natawilakgoyacha (Juan 14:2, 3). Uma xasasti tamasiyun nema Jesús kamasiyanilh xlakskujni Dios. Alistalh Pablo wa pi akxni nilh Jesús, malakastakwanika chu alh kʼakgapun wililh “xasasti tiji latamat wantuku xla kamalakkini” xtamakgalhtawakgen, tiji nema niti axtlawan (Hebreos 10:19, 20).

¿Xwamputun pi ama kilhtamaku putum tiku ni xmakgxtakgkgolh Dios xʼankgolh kʼakgapun? Ni, xlakata tiku nalakastakwanankgo chu naʼankgo kʼakgapun wi tuku naʼankgo tlawakgo chu kaj makgapitsi kalaksakkan. Awatiya katsisni nema xkatawi xʼapóstoles Jesús kawanilh pi xʼamakgolh tawilakgo «klaktawilh mapakgsina lantla naputsananikgoyatit» latamanin kxTamapakgsin xalak akgapun. Wa uma tuku xʼamakgolh tlawakgo, xtamapakgsinankgocha Jesús kʼakgapun (Lucas 22:28-30).

Nikaj watiya apóstoles xʼamakgolh tlawakgo uma taskujut. Apóstol Juan akxilhli pi Jesús xwilacha kʼakgapun na xtawilakgolh makgapitsi tiku xkamalakastakwanikanit, Juan wan pi «akgtum tamapakgsin chu sacerdotes [...] [tiku] namapakgsinankgo kkatiyatni» (Apocalipsis [Revelación] 3:21; 5:10, NM). ¿Niku kgalhlit kaʼakxilhli? Xtachuna la kʼakgtum país ni lhuwa tiku mapakgsinankgo, nachuna tiku namapakgsinankgo kʼakgapun: Jesús, xBorrego Dios chu 144,000 xatalaksakni tiku natamapakgsinankgo «wa nti ntilakgmaxtukgoka kxlakgstipankan ntachixkuwitat» (Apocalipsis 14:1, 4, 5).

Xlikana pi 144,000 ni lhuwa komo natamalakxtumiyaw xlakskujnin Dios nema latamakgolh makgasa chu la uku. Pero talakaskin pi umakgolh latamanin naʼankgo kʼakgapun xlakata wi tuku naʼankgo tlawakgo kʼakgapun chu xasanto. Akgtum liʼakxilhtit, kalilakpuwanti pi tlawaputuna minchiki. ¿Xkaskini putum patsapsna tiku wilakgolh kkachikin xlakata namakgtayakgoyan? Ni. Kajwatiya xkawani tiku nakamaklakaskina. Na chuna Dios, ni putum kamaxki uma talakgalhaman natamapakgsinankgo Cristo kʼakgapun.

Uma tamapakgsin xalak akgapun namakgantaxti tuku lakapastaknit Dios natlawa xlakata latamanin. Jesús chu 144,000, kʼakgapun namapaksikgo Katiyatni, chu akgtum paraíso natlawakgo niku lhuwa xlakskujni Dios tiku ni makgxtakgkgo nalipaxuwakgo chu nakgalhikgo latamat nema ni kgalhi xlisputni (Isaías 45:18; Apocalipsis 21:3, 4). Dios katsi tiku nakamalakastakwani chu nalatamakgo Katiyatni (Juan 5:28, 29).

Putum xlakskujni Dios tiku ni makgxtakgkgolh xala makgasa chu xala uku tlan namakglhtinankgo latamat nema ni kgalhi xlisputni (Romanos 6:23). Kaj ni lhuwa nalatamakgo kʼakgapun xlakata wintuku lu xlakaskinka namakgantaxtikgo, pero tlakg lhuwa nalatamakgo unu kKatiyatni nema akgtum paraíso nawan.