Ŵaŵazgi Ŵithu Ŵakufumba Kuti . . .

Kasi Ŵakhristu Wose Ŵakugomezgeka Ŵakuluta Kucanya?

▪ Ŵanandi ŵali kuŵazgapo mazgu ghakupembuzga agho Yesu wakayowoya, ghakuti: “Ciuta wakacitemwa comene caru, mwakuti wakapeleka Mwana wake wapadera yekha, ntheura kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.” (Yohane 3:16) Kasi apa Yesu wakang’anamuranga kuti ŵanthu wose awo ŵakusopa Yehova Ciuta ŵazamuluta kucanya kuti ŵakasangwe na umoyo wamuyirayira?

Tiyeni tighanaghanirepo fundo yinyake iyo Yesu wakayowoya, wakati: “Palije munthu uyo wali kukwelera kucanya, kweni uyo wakakhira kufuma kucanya, Mwana wa munthu.” (Yohane 3:13) Mazgu agha ghakung’anamura kuti ŵanthu ŵakugomezgeka ŵa mu nyengo yakale nga ni Nowa, Abrahamu, Mozesi, na Davide ŵakaluta kucanya yayi. (Milimo 2:34) Ipo kasi ŵakaluta nkhu? Mwakudumura, ŵanthu ŵakugomezgeka ŵa mu nyengo yakale ŵali mu malaro, ŵakumanyako kalikose yayi, ndipo ŵakulindilira kuzakawuskika.—Mupharazgi 9:5, 6; Milimo 24:15.

Wakaŵaso Yesu uyo wakamba kuyowoya kuti ŵanthu ŵanyake ŵazamuluta kucanya para ŵafwa. Wakaphalira ŵapositole ŵake kuti wakuluta kucanya kukaŵanozgera malo. (Yohane 14:2, 3) Iyi yikaŵa fundo yiphya ku ŵanthu ŵa Ciuta. Pamanyuma mpositole Paulosi wakalongosora kuti Yesu wakati wafwa, wawuskika, na kuluta kucanya, ‘wakajulira ŵasambiri ŵake nthowa yiphya na yamoyo’ iyo pakaŵavya munthu uyo wali kwendamo nakale.—Ŵahebere 10:19, 20.

Kasi ici cikang’anamuranga kuti kufuma nyengo iyi kuya munthazi, waliyose uyo ngwakugomezgeka walutenge kucanya? Yayi, cifukwa awo ŵakuluta kucanya ŵali na mulimo unyake uwo wapika ku ŵanthu ŵacoko waka. Mu usiku waumaliro pambere wandakomeke, Yesu wakaphalira ŵapositole ŵake kuti ‘ŵamukukhala pa vizumbe na kweruzga’ mu Ufumu wake wakucanya. Ntheura ŵakapika mulimo wa kukawusa na Yesu kucanya.—Luka 22:28-30.

Padera pa ŵapositole aŵa, ŵanthu ŵanyake ŵali kupikaso mulimo uwu. Mu mboniwoni, mpositole Yohane wakawona Yesu wali kucanya pamoza na gulu ilo likawuskika, ilo likulongosoreka kuti ni ‘ufumu na ŵasofi ndipo ŵawusenge caru capasi.’ (Uvumbuzi 3:21; 5:10) Kasi ŵakaŵa ŵalinga? Nga umo vikuŵira na boma lililose, mbacoko waka ŵakuwusa. Ndimo viliriso na boma lakucanya. Yesu, uyo ni Mwanamberere wa Ciuta, wakuwusa na ŵanthu ŵakukwana 144,000 awo “ŵakagulika pakati pa ŵanthu.”—Uvumbuzi 14:1, 4, 5.

Mbunenesko kuti 144,000 ni nambara yicoko comene pakuyaniska na ya ŵanthu ŵakugomezgeka ŵa mu nyengo yakale na yasono. Kweni nchakupulikikwa cifukwa ŵa 144,000 ŵakuwuskika na kuluta kucanya kuti ŵakacite uteŵeti wapadera ndiposo wakupatulika. Mwaciyelezgero, para mukukhumba kuzenga nyumba, kasi mungalemba nchito ŵanthu wose awo ŵakumanya kuzenga makora mu cigaŵa cinu? Yayi. Mungalemba ŵanthu mwakuyana na ukuru wa nchito. Mwakuyana waka, mbanthu ŵakugomezgeka wose yayi awo Ciuta waŵasankha kukacita mulimo wapadera wa kukawusa na Khristu kucanya.

Boma lakucanya ili lizamuwezgerapo ivyo Ciuta wakakhumbiranga ŵanthu. Yesu na ŵa 144,000 ŵazamuwoneseska kuti caru casintha kuŵa paradiso, umo muzamukhala ŵanthu ŵanandi comene awo ciŵelengero cawo cikumanyikwa yayi. Ndipo ŵazamukhala mwakukondwa kwamuyirayira. (Yesaya 45:18; Uvumbuzi 21:3, 4) Ŵanthu aŵa ŵakusazgapo awo Ciuta wazamuŵawuska cifukwa cakuti wakuŵakumbuka.—Yohane 5:28, 29.

Munthu waliyose uyo wakusopa Yehova mwakugomezgeka, kwali wakaŵako mu nyengo yakale, panji sono, wazamupokera umoyo wamuyirayira. (Ŵaroma 6:23) Ŵanthu ŵacoko waka ŵamupika umoyo wamuyirayira kucanya uko ŵamucita uteŵeti wapadera. Ndipo ŵanthu ŵanandi ŵazamupokera umoyo wamuyirayira mu paradiso pa caru capasi.