Maan e suan Ɲanmiɛn Ndɛ’n nun like

?Be nga be wuli’n be liɛ w’a wie mlɔnmlɔn?

Ndɛ akpasua nga tɛ kosan wie mɔ atrɛkpa’n amun fa usali amun wun’n be su. Yɛ ɔ kle e Biblu’n i bue nga e kwla kanngan nun naan y’a wun kosan sɔ’m be su tɛlɛ’n. Zoova i Lalofuɛ’m be klo kɛ bé yíyí ndɛ sɔ’m be nun klé amun.

1. ?E kwla wun be nga be wuli mun ekun?

Kɛ Zezi jú klɔ ng’ɔ mantan Zerizalɛmu mɔ be flɛ i Betani’n i wun lɛ’n, nn i janvuɛ Lazali wuli w’a di cɛn nnan. Zezi nin Lazali i niaan bla Mali nin Marti be ɔli asieliɛ’n su lɔ. W’a cɛman naan sran’m b’a su be su. Kɛ be juli lɔ mɔ Zezi cɛnnin Lazali’n i fɛ ng’ɔ yoli Marti nin Mali’n, amun bu i sin kan nian.—An kanngan Zan 11:20-24, 38-44 nun.

Marti si kɛ be nga be wuli’n bé cɛ́n. Zoova i sufuɛ nanwlɛfuɛ’m be si titi kɛ cɛn wie lele’n, Ɲanmiɛn cɛ́n be nga be wuli mun ekun asiɛ’n su.—An kanngan Ebre Mun 11:17-19 nun.

2. ?Be nga be wuli’n be liɛ’n ti sɛ?

Klɔ sran lemɛn i sin like kun m’ɔ wuman ɔn. (Jue Mun 146:4) Be fali fa yɛ be yili e ɔ. (Bob. 2:7; 3:19) Kɛ sran’n ko wu’n, nn like kwlaa ng’ɔ sunnzunnin kɛ ɔ́ yó’n i kwlaa w’a ka lɛ w’a mlin cɛn kunngba sɔ’n nun. I ti yɛ kɛ be cɛnnin Lazali’n w’a kanman blɛ m’ɔ o wie nun’n i su ndɛ’n niɔn. Afin be nga be wuli’n be wunman sa fi wlɛ.—An kanngan Jue Mun 146:4 ɔ nin Akunndanfuɛ’n 9:5, 10 nun.

Nanwlɛ, be nga be wuli’n be fɛman. Ɔ maan kɛ sran’m be se kɛ Ɲanmiɛn kle sran nga be wuli’n be ɲrɛnnɛn’n, ɔ ti ato. Ɲanmiɛn i suɛn yɛ be tɔn ɔn. Kɛ Ɲanmiɛn ti i kɛ be kle sran’m be ɲrɛnnɛn sin nun’n, ɔ yo i kain.—An kanngan Zeremi 7:31 nun.

  3. ?E nin be nga be wuli mun’n e kwla ijɔ?

Be nga be wuli’n be kwlá ijɔman. (Jue Mun 115:17) Sanngɛ kɛ mmusu’m be nin sran mun ijɔ’n, be kwla laka be kɛ sran nga be wuli mun yɛ be nin be su ijɔ ɔ. (Zid 6) Zoova waan nán sran’m be kunndɛ kɛ be nin be nga be wuli’n bé íjɔ.—An kanngan Mmla’n 18:10, 11 nun.

4. ?Wan mun yɛ bé cɛ́n be ɔ?

Mɛn uflɛ ng’ɔ́ bá lɛ’n nun’n, bé cɛ́n sran miliɔn kpanngban mɔ be o ndia’n nun’n. Be nga bɔbɔ be siman Zoova ti be yoli sa tɛtɛ’n, be nun wie’m bé cɛ́n.—An kanngan 2 Piɛr 3:13 ɔ nin Sa Nga Be Yoli’n 24:15 nun.

Be nga bé cɛ́n be’n bé ɲán Ɲanmiɛn i su ndɛ nanwlɛ suanlɛ’n, ɔ nin Zezi i su lafilɛ’n i wun atin. (Sa Nglo Yilɛ 20:11-13) Kɛ be ko cɛn sran mun’n, sɛ be yo ninnge kpakpa’n, bé kwlá ɲán anannganman nguan asiɛ’n su. Sanngɛ be nun wie’m be su yaciman sa tɛtɛ yolɛ’n. I sɔ’n ti’n, “bé fá be kɔ́ jɔlɛ difuɛ’n i ja su.”—An kanngan Zan 5:28, 29 nun.

5. ?Ngue yɛ sran cɛnlɛ’n kle e Zoova su ɔ?

Kɛ mɔ Ɲanmiɛn sunmɛnnin i Wa’n asiɛ’n su wa m’ɔ wuli’n mannin e’n, i ti yɛ be kwla cɛn sran mun ɔn. Zoova i sran klolɛ’n ɔ nin i aklunye’n ti yɛ ɔ yoli sɔ ɔ.—An kanngan Zan 3:16 nin Rɔmfuɛ Mun 6:23 nun.

[Foto, bue 23]

Sɛ amun kunndɛ kɛ amún sí nun ekun’n, amun kwla nian fluwa ?Ngue like yɛ Biblu’n kle i sakpasakpa ɔ? i ndɛ tre 6 nin 7 nun. Zoova i Lalofuɛ mun yɛ be yili ɔ.

[Foto, bue 22]

Fa yɛ be fa yili Adam ɔn.