Sambilileni Icebo ca kwa Lesa

Bushe Abafwa Kuti Baba no Mweo na Kabili?

Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti batemwa nga nshi ukulanshanya na imwe aya masuko.

1. Bushe abafwa bakabuuka?

Ilyo Yesu afikile mu Betani, itauni lyali mupepi na Yerusalemu, ninshi palipita ne nshiku shine ukutula apo umunankwe Lasaro afwilile. Yesu aile ku nshiishi na Marita na Maria, bankashi ya kwa Lasaro uwafwile. Tapakokwele, abantu abengi balilongene. Elenganyeni ifyo Marita na Maria basansamwike ilyo Yesu abuushishe Lasaro!—Belengeni Yohane 11:20-24, 38-44.

Marita asumine ukuti abafwa bakabuuka. Ukufuma fye na ku kale, ababomfi ba kwa Yehova aba cishinka batetekela ukuti ku ntanshi, Lesa akabuusha abafwa pa kuti bakabe no mweo na kabili no kwikala pano calo.—Belengeni Yobo 14:14, 15.

2. Bushe abantu baba shani nga bafwa?

Nangu cingati “umupashi” e ulenga abantu ne nama ukuba abomi, ifwe tatuli mipashi iikala mu mibili. (Lukala Milandu 3:19; Ukutendeka 7:21, 22) Tuli fibumbwa ifyapangwa ku lukungu. (Ukutendeka 2:7; 3:19) Bongobongo yesu nga yafwa, ninshi na matontonkanyo yesu yaloba. E mulandu wine, ilyo Lasaro bamubuushishe, talandilepo nangu cimo pa fyalecitika ilyo afwile pantu abafwa tabaishiba akantu nangu kamo.—Belengeni Amalumbo 146:4; Lukala Milandu 9:5, 10.

Ukwabula no kutwishika abafwa tabacula. Kanshi icisambilisho ca kuti Lesa alalungulusha abantu mu mulilo nga bafwa ca bufi. Cilaseebanya Lesa, kabili cilamukalifya.—Belengeni Yeremia 7:31.

  3. Bushe kuti twalanda na bafwa?

Abafwa te kuti balande. (Amalumbo 115:17) Lelo bamalaika ababifi nga balanda na bantu, nalimo kuti babepa abantu ukuti umupashi wa muntu uwafwa e ulelanda. (2 Petro 2:4) Yehova alikaanya ukulanda na bafwa.—Belengeni Amalango 18:10, 11.

4. Ni bani bakabuushiwa?

Mu calo cipya, abantu abengi nga nshi abafwa bakabuuka no kuba no mweo na kabili. Na bantu bamo abalecita ifyabipa abashaishibe Yehova nabo bakabuuka.—Belengeni Luka 23:43; Imilimo 24:15.

Abakabuushiwa bakasambilila icine pali Lesa kabili bakalanga ukuti balicetekela Yesu ilyo bakalamumfwila. (Ukusokolola 20:11-13) Abakalacita ifisuma nga babuushiwa bakaipakisha ukwikala umuyayaya pe sonde. Lelo bamo bakatwalilila ukucita ifyabipa. Aba bena ninshi “bakabuukila ku bupingushi.”—Belengeni Yohane 5:28, 29.

5. Bushe ukubuusha abafwa kutusambilisha finshi pali Yehova?

Ukubuuka kukabako pantu Lesa alitumine Umwana wakwe ukwisatufwila. Kanshi ukubuusha abafwa kutusambilisha ukuti Yehova alitutemwa kabili wa cikuuku nga nshi.—Belengeni Yohane 3:16; Abena Roma 6:23.

Nga mulefwaya ukwishibilapo na fimbi, belengeni ifipandwa 6 na 7 ifyaba mu citabo citila Bushe Cinshi Baibolo Isambilisha? icalembwa ne Nte sha kwa Yehova.

[Icikope pe bula 16]

Adamu bamupangile ku lukungu