Magtuon sa Pulong sang Dios

Mabanhaw Bala ang mga Patay?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Mabanhaw bala ang mga patay?

Pag-abot ni Jesus sa Betania nga malapit sa Jerusalem, apat na ka adlaw nga napatay ang iya abyan nga si Lazaro. Nagkadto si Jesus sa lulubngan upod sanday Marta kag Maria, nga mga utod ni Lazaro. Sang ulihi, nagdugok ang mga tawo. Hunahunaa ang kalipay nanday Marta kag Maria sang ginbanhaw ni Jesus si Lazaro.—Basaha ang Juan 11:20-24, 38-44.

Nagapati si Marta nga mabanhaw ang mga patay. Nahibaluan man sang matutom nga mga alagad ni Jehova nga sa palaabuton banhawon sang Dios ang mga patay para magkabuhi liwat sa duta.—Basaha ang Job 14:14, 15.

2. Ano ang kahimtangan sang mga patay?

Paagi sa puersa sang kabuhi, ukon “espiritu,” nagapabilin nga buhi ang mga tawo kag sapat. Pero indi kita mga espiritu nga nagapuyo sa lawas. (Manugwali 3:19, NW; Genesis 7:21, 22) Gintuga kita halin sa yab-ok. (Genesis 2:7; 3:19) Kon mapatay kita, nagakadula ang aton panghunahuna. Gani, sang nabanhaw si Lazaro, wala sia sing nasugid parte sa iya kamatayon, kay ang mga patay wala sing nahibaluan.—Basaha ang Salmo 146:4; Manugwali 9:5, 10.

Maathag nga ang patay wala nagaantos. Gani butig ang panudlo nga ginapaantos sang Dios ang mga patay. Nagapakahuya ini sa Dios. Ang pagpaantos sa mga tawo makangilil-ad sa iya.—Basaha ang Jeremias 32:35.

  3. Maistorya bala naton ang mga patay?

Ang mga patay indi makahambal. (Salmo 115:17) Pero ang malaut nga mga anghel nagapakunokuno nga espiritu sang mga napatay para maistorya nila ang mga tawo. (2 Pedro 2:4) Ginadumilian ni Jehova ang pagpakighambal sa mga patay.—Basaha ang Deuteronomio 18:10, 11.

4. Sin-o ang banhawon?

Sa bag-ong kalibutan, minilyon nga napatay ang banhawon. Bisan ang mga nakahimo sing malain bangod wala nila makilala si Jehova banhawon man.—Basaha ang Lucas 23:43; Binuhatan 24:15.

Matun-an sang mga banhawon ang kamatuoran parte sa Dios kag mapakita nila ang pagtuo kay Jesus paagi sa pagtuman sa iya. (Bugna 20:11-13) Ang mga ginbanhaw nga nagahimo sing maayo, makatigayon sing kabuhi nga wala sing katapusan sa duta. Pero, ang iban nga ginbanhaw nga nagahimo gihapon sing malain ‘hukman.’—Basaha ang Juan 5:28, 29.

5. Ano ang matun-an naton parte kay Jehova bangod sa pagkabanhaw?

Nangin posible ang pagkabanhaw bangod ginpadala sang Dios ang iya Anak para ihatag sa aton ang iya kabuhi. Pamatuod ini sang gugma kag wala tupong nga kaayo ni Jehova.—Basaha ang Juan 3:16; Roma 6:23.

Para sa dugang nga impormasyon, basaha ang kapitulo 6 kag 7 sini nga libro, Ano Gid ang Ginatudlo Sang Biblia? nga ginhimo sang mga Saksi ni Jehova.

[Retrato sa pahina 16]

Gintuga si Adan halin sa yab-ok