តើមនុស្សស្លាប់មានសេចក្ដីសង្ឃឹមឬទេ?
សូមរៀនពីបណ្ដាំរបស់ព្រះ
តើមនុស្សស្លាប់មានសេចក្ដីសង្ឃឹមឬទេ?
អត្ថបទនេះលើកឡើងនូវសំណួរមួយចំនួនដែលអ្នកប្រហែលជាធ្លាប់សួរ ហើយបង្ហាញចម្លើយដែលអ្នកអាចអានពីគម្ពីររបស់អ្នក។ សាក្សីព្រះយេហូវ៉ានឹងរីករាយពិភាក្សាចម្លើយទាំងនេះជាមួយនឹងអ្នក។
១. តើមនុស្សស្លាប់មានសេចក្ដីសង្ឃឹមអ្វី?
ពេលដែលលោកយេស៊ូមកដល់ភូមិបេថានី ជាភូមិដែលនៅជិតក្រុងយេរូសាឡិម ឡាសារដែលជាមិត្តសម្លាញ់របស់លោកបានស្លាប់អស់បួនថ្ងៃហើយ។ លោកយេស៊ូបានធ្វើដំណើរទៅទីបញ្ចុះសពរបស់គាត់ជាមួយម៉ាថានិងម៉ារៀដែលជាបងស្រីរបស់គាត់។ មិនយូរក្រោយមក បណ្ដាជនបានមកជួបជុំគ្នានៅទីនោះដែរ។ ពេលដែលលោកយេស៊ូប្រោសឡាសារឲ្យរស់ឡើងវិញ តើអ្នកអាចស្រមៃគិតអំពីអំណររបស់ម៉ាថានិងម៉ារៀឬទេ?—សូមអាន យ៉ូហាន ១១:២០-២៤, ៣៨-៤៤
ម៉ាថាបានជឿរួចទៅហើយថាមនុស្សស្លាប់នឹងមានជីវិតរស់ឡើងវិញ។ អ្នកបម្រើស្មោះត្រង់របស់ព្រះយេហូវ៉ាតែងតែដឹងថា នៅពេលអនាគត ព្រះនឹងប្រោសមនុស្សស្លាប់ឲ្យមានជីវិតរស់ឡើងវិញនៅលើផែនដីម្ដងទៀត។—សូមអាន យ៉ូប ១៤:១៤, ១៥
២. តើមនុស្សស្លាប់មានស្ថានភាពបែបណា?
មនុស្សមិនមានព្រលឹងអមតៈទេ។ (អេសេគាល ១៨:៤) ព្រះបានបង្កើតយើងពីធូលីដី។ (លោកុប្បត្តិ ២:៧; ៣:១៩) ពេលយើងស្លាប់ទៅខួរក្បាលយើងលែងដំណើរការ ហើយគំនិតរបស់យើងក៏សូន្យទៅដែរ។ ហេតុនេះហើយ ក្រោយពីឡាសារបានត្រូវប្រោសឲ្យរស់ឡើងវិញ គាត់មិនបាននិយាយអ្វីដែលបានកើតឡើងពេលដែលគាត់ស្លាប់នោះទេ ព្រោះពេលដែលមនុស្សស្លាប់ទៅឥតដឹងអ្វីឡើយ។—សូមអាន ទំនុកតម្កើង ១៤៦:៤; សាស្ដា ៩:៥, ១០
យ៉ាងច្បាស់ណាស់ មនុស្សស្លាប់មិនអាចមានការឈឺចាប់ទេ។ ដូច្នេះ សេចក្ដីបង្រៀនដែលថាព្រះធ្វើទារុណកម្មមនុស្សក្រោយពីពួកគេស្លាប់ទៅគឺជាសេចក្ដីបង្រៀនខុស។ នេះជាការបង្កាច់បង្ខូចព្រះមែន។ ព្រះមិនដែលគិតចង់ដុតមនុស្សក្នុងភ្លើងទេ ព្រោះនេះជាការគួរឲ្យស្អប់ខ្ពើមណាស់ចំពោះលោក។—សូមអាន យេរេមា ៧:៣១
៣. តើយើងអាចនិយាយជាមួយនឹងមនុស្សស្លាប់បានឬទេ?
មនុស្សស្លាប់មិនអាចនិយាយបានទេ។ (ទំនុកតម្កើង ១១៥:១៧) ប៉ុន្តែ ពេលដែលទេវតាអាក្រក់និយាយជាមួយមនុស្ស ពួកវាប្រហែលជាបោកបញ្ឆោតយើងដោយអះអាងថាពួកវាជាព្រលឹងនៃមនុស្សដែលបានស្លាប់។ (ពេត្រុសទី២ ២:៤) ព្រះយេហូវ៉ាហាមយើងកុំឲ្យខំទាក់ទងឬនិយាយជាមួយមនុស្សស្លាប់។—សូមអាន ចោទិយកថា ១៨:១០, ១១
៤. តើអ្នកណានឹងត្រូវប្រោសឲ្យរស់ឡើងវិញ?
នៅពិភពលោកថ្មីដែលនឹងមកដល់ក្នុងពេលឆាប់ៗខាងមុខនេះ មនុស្សរាប់លាននាក់ដែលនៅក្នុងផ្នូរនឹងមានជីវិតរស់ឡើងវិញ។ សូម្បីតែមនុស្សខ្លះដែលប្រព្រឹត្តអំពើអាក្រក់ដោយសារពួកគេមិនបានស្គាល់ព្រះយេហូវ៉ា ក៏នឹងត្រូវប្រោសឲ្យរស់ឡើងវិញដែរ។—សូមអាន លូកា ២៣:៤៣; សកម្មភាព ២៤:១៥
មនុស្សដែលបានត្រូវប្រោសឲ្យរស់ឡើងវិញនឹងមានឱកាសរៀនសេចក្ដីពិតអំពីព្រះ និងបង្ហាញជំនឿទៅលើលោកយេស៊ូដោយស្ដាប់បង្គាប់លោក។ (ការបើកបង្ហាញ ២០:១១-១៣) ពួកអ្នកដែលមានជីវិតរស់ឡើងវិញ ហើយប្រព្រឹត្តការល្អនឹងអាចរស់ជារៀងរហូតនៅលើផែនដី។ ប៉ុន្តែ ក៏នឹងមានមនុស្សខ្លះដែលបន្តប្រព្រឹត្តអាក្រក់ក្រោយពីពួកគេបានត្រូវប្រោសឲ្យរស់ឡើងវិញដែរ។ ចំពោះមនុស្សបែបនេះ ពួកគេនឹង«រស់ឡើងវិញហើយទទួលការកាត់ទោស»។—សូមអាន យ៉ូហាន ៥:២៨, ២៩
៥. តើការប្រោសឲ្យរស់ឡើងវិញបញ្ជាក់យ៉ាងណាអំពីព្រះយេហូវ៉ា?
មូលហេតុដែលព្រះអាចប្រោសមនុស្សស្លាប់ឲ្យរស់ឡើងវិញបាន គឺដោយសារលោកបានចាត់បុត្ររបស់លោកឲ្យមកស្លាប់ដើម្បីយើង។ ការធ្វើដូច្នេះបញ្ជាក់អំពីគុណដ៏វិសេសលើសលប់របស់ព្រះយេហូវ៉ា។—សូមអាន យ៉ូហាន ៣:១៦; រ៉ូម ៦:២៣
ដើម្បីទទួលព័ត៌មានបន្ថែម សូមមើលជំពូកទី៦និង៧នៃសៀវភៅនេះដែលបានត្រូវបោះពុម្ពផ្សាយដោយសាក្សីព្រះយេហូវ៉ា។
[រូបភាពនៅទំព័រ៣១]
ព្រះបានបង្កើតអាដាមពីធូលីដី
