Di Longe O Mak’â Nzambi

O Kuila Saí Kidielelu Phala Athu Afú?

O mbandu íii, ia-nda tambuijila o ibhuidisu i ua mesena o kuijiia, ia-nda kulondekesa se kuebhi ku u tena ku sanga o itambuijilu mu Bibidia iê. O Jimbangi ja Jihova, a mesena kiavulu ku di longa o itambuijilu íii ni eie.

1. Kidielelu kiahi kiala na-kiu athu afú?

Kioso Jezú kia bhixila mu sanzala ia Betanha ia zukamene ku Jeluzaleme, o kamba diê Lázalu ua kexile kiá izuua iuana ku’alunga. Jezú uai ku mbila kumoxi ni Marta ni Madiia, jiphange ja difundu. Mu kithangana kieniókio, ku tukuluka mundu uavulu. U tena ku xinganeka kiebhi kia divu Marta ni Madiia kioso Jezú kia fukununa Lázalu?—Tanga Nzuá 11:20-24, 38-44.

Marta uejidile kuila o athu afú, hádia eji ku a fukununa. O jiselevende ja fiiele ja Jihova, tundé m’ukulu, ejiia kuila hádia Nzambi ua-nda fukununa o athu afú phala ku kala dingi ku muenhu mu ixi.—Tanga Jobe 14:14, 15.

2. Uebhi o ukexilu ua athu afú?

Sumbala o nguzu ia muenhu, mba “muha ua muenhu” iene i bhangesa o athu ni iama ku kala ku muenhu, etu ki tuala ni nzumbi. (Ndongixi 3:19; Dimatekenu 7:21, 22) Etu a tu bhange ni mavu. (Dimatekenu 2:7; 3:19) Kioso ki tu fuá, o ibanzelu ietu i jimuka. Mukonda dia kiki, Lázalu kioso kia mu fukununa, muéne ka zuela se ihi ia bhiti ni muéne ku’alunga, mukonda o athu afú kejiia dingi kima kioso-kioso.—Tanga Jisálamu 146:4; Ndongixi 9:5, 10.

Tuejiia ué kuila athu afú, ka tale hadi. Mu kiki, o ilongesu izuela kuila Nzambi u kaxtikala o athu ku’alunga, milongi ia makutu. Íii milongi ia ku tatela Nzambi. Nzambi nuka ua banzele ku talesa hadi ku athu, mu ku a zukutisa mu túbhia.—Tanga Jelemiia 7:31.

  3. Tu tena kuzuela ni athu afú?

O athu afú ka tena dingi kuzuela. (Jisálamu 115:17) Maji kioso o ji-anju ja iibha kia zuela ni athu, ene a tena ku nganala o athu, mu ku a zuelela kuila jinzumbi ja athu afú kiá. (2 Phetele 2:4) Jihova ki mu ibhila o muthu u mesena kuzuela ni athu afú kiá.—Tanga Matendelelu 18:10, 11.

4. Nanhi ua-nda fukunuka?

Ku mundu ubhe, athu avulu ala mu jimbila, a-nda vutuka ku muenhu. Né muene ió a bhange ima ia iibha, Jihova ua-nda ku a fukununa, mukonda ene kejidile luua o kidi kia lungu ni Nzambi.—Tanga Luka 23:43; Ikalakalu 24:15.

O athu a-nda ku a fukununa a-nda di longa o kidi kia lungu ni Nzambi, ni ku kala ni kixikanu kua Jezú mu ku mu belesela. (Dijingunuinu 20:11-13) O ió a-nda vutuka ku muenhu, se a bhanga ima iambote, a-nda kala ku muenhu ua kalelaku mu ixi. Maji saí iá a-nda ku a fukununa, a-nda kolokota o ku bhanga ima ia iibha. O athu enhá, a ka “fukunuka phala ku a êlesa”—Tanga Nzuá 5:28, 29.

5. O difukunukinu di tu longa ihi ia lungu ni Jihova?

O difukunukinu kidi, mukonda Nzambi ua tumikisa o Mon’ê ua bhana o muenhu uê phala ku tu bhulula. Kiki kilondekesa o henda ia Jihova ko kuetu.—Tanga Nzuá 3:16; Loma 6:23.

Phala kuijiia dingi, tanga o kibatulu 6 ni 7 kia divulu didi, a di bhange ku Jimbangi ja Jihova. Mu Kidi Ihi i Longa o Bibidia?

[Foto ku bandu 22]

Adá a mu bhange ni mavu