Wifunde Kinenwa Kya Leza

Lelo Kudi Lukulupilo Kampanda ku Bafwe?

Kino kishinte kipangula bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisamba nobe ano malondololo.

1. I lukulupilo’ka ludi’ko pa boba bafwe?

Kitatyi kyāfikile Yesu ku Betani kubwipi na Yelusalema, wātene mulunda nandi Lazalasa mufwe ke padi mafuku aná. Yesu wāenda ku kibundu pamo na Mata ne Madia bakaka ba mufwe’wa. Ponka’po kibumbo kyāyula bā. Le ubwanya kulanga nsangaji yāimvwene ba Mata ne Madia kitatyi kyāsangwile Yesu Lazalasa?—Tanga Yoano 11:20-24, 38-44.

Mata wādi witabije amba bafwe bakasangulwanga. Bengidi ba kikōkeji ba Yehova bayukile tamba kala amba mu mafuku a kumeso, Leza ukasangula bafwe bakekale monka na būmi pano pa ntanda.—Tanga Yoba 14:14, 15.

2. Lelo i ngikadilo’ka idi’mo bafwe?

Muntu kadipo na muya keufu. (Ezekyele 18:4) Batwe twi bipangwa bya ku ngitu bipangilwe ku biloba. (Ngalwilo 2:7; 3:19) Shi bongolo bwetu bubafu, mifwatakanyo yetu ibaoneka. O mwanda Lazalasa pa kupwa kusangulwa, kānenepo kintu nansha kimo kitala pa lufu lwandi, mwanda bafwe kebayukilepo kintu nansha kimo.—Tanga Mitōto 146:4; Musapudi 9:5, 10.

Nanshi, bafwe kebabwanyapo kususuka. O mwanda, lufundijo lwa amba Leza ususulanga bantu pa kupwa kufwa i lwa bubela. Luvubakenyanga Leza. Mulangwe wa kususula bantu mu mudilo i kya munyanji kwadi.—Tanga Yelemia 7:31.

  3. Le tukokeja kwisamba na bafwe?

Bafwe kebakokejapo kunena. (Mitōto 115:17) Ino kitatyi kisamba bamwikeulu babi na bantu, bakokeja kwimwekeja bya bubela bu mishipiditu ya boba bafwile. (2 Petelo 2:4) Yehova i mupeleje kutompa kwisamba na bafu.—Tanga Kupituluka 18:10, 11.

4. Lelo i bāni bakasangulwa?

Mu ntanda impya īya’i, bantu midiyo ne midiyo badi mu bibundu bakasangulwa. Enka ne bamobamo bālongele bintu bibi pa mwanda wa kubulwa kuyuka Yehova nabo bakasangulwa.—Tanga Luka 23:43; Bilongwa 24:15.

Boba bakasangulwa bakapebwa mukenga wa kwifunda bubine butala padi Leza ne kwitabija Yesu na kumukōkela. (Kusokwelwa 20:11-13) Boba bakasangulwa ne kulonga bintu biyampe bakekala na dyese dya būmi bwa nyeke pano pa ntanda. Inoko kudi bamo bakasangulwa, bakendelela kulonga bibi. Lusangukilo lwabo lukālamuka ke ‘lusangukilo lwa kidye.’—Tanga Yoano 5:28, 29.

5. Le lusangukilo lwitufundija bika padi Yehova?

Lusangukilo lukekala’ko, mwanda Leza wātumine wandi Mwana kupāna būmi bwandi pa mwanda wetu. Kino i kilomboji kya buswe bwa Yehova ne kya buntu bwandi.—Tanga Yoano 3:16; Loma 6:23.

Shi usaka kuyukila’ko bintu bivule, tala shapita 6 ne 7 wa dino dibuku, Lelo i Bika Bine Bifundija Bible? dilupwilwe na Batumoni ba Yehova.

Kifwatulo pa paje 22]

Adama wāpangilwe ku biloba bya panshi