Pathian Thu Aṭangin Inzir Rawh

Mitthite Tân Beisei Tûr A Awm Em?

He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a. Jehova Thuhretute chuan chûng chhânnate sawipui che chu an châk hle a ni.

1. Mitthite tâna beisei tûr chu eng nge ni?

Isua chu Jerusalem bul Bethani khua a va thlen chuan, a ṭhianpa Lazara thihna chu ni li lai a lo ni tawh a. Mitthi ta farnu Marthi leh Mari nên chuan an zalhna thlânah an va kal a ni. Chutah chuan mipui an lo pungkhâwm ta thuai a. Isua’n Lazara a kaihthawh laia Marthi leh Mari te lâwm dân tûr chu i ngaihtuah thei em?—Johana 11:20-24, 38-44 chhiar rawh.

Marthi chuan mitthite chu kaihthawh leh an ni dâwn tih a ring a. Jehova chhiahhlawh rinawmte chuan Pathianin leia nung leh tûrin mitthite a la kaitho dâwn tih hmân ata tawh an hria a ni.—Joba 14:14, 15 chhiar rawh.

2. Mitthite dinhmun chu eng nge ni?

Mihringte hian thlarau thi thei lo an nei lo va. Vaivut aṭanga siam mai kan ni. (Genesis 2:7; 3:19) Kan thluak a thih hian kan ngaihtuahna pawh a bo nghâl a ni. Chuvângin, kaihthawh a nih hnuah Lazara chuan a thih laia a thiltawn engmah a sawi lo; mitthite’n engmah an hre thei si lo va.—Sâm 146:4; Thuhriltu 9:5, 10 chhiar rawh.

Mitthite’n hrehawm an tuar thei lo tih a chiang hle. Chuvângin, Pathianin mite chu an thih hnuah a hrem ṭhîn tih zirtîrna chu a dik lo. Chu chuan Pathian a sawi chhe zâwk a ni. Meia mite hrem chu a thil tenzâwng tak a ni si a.—Jeremia 32:35 chhiar rawh.

 3. Mitthite kan be thei em?

Mitthite chu an ṭawng thei lo va. (Sâm 115:17) Mahse, vântirhkoh suaksualte’n mihringte an biak hian, mitthi tawh thlarau angin dik lo takin an inchhâl thei a ni. (2 Petera 2:4) Jehova chuan mitthi biak tum chu a khap a ni.—Deuteronomy 18:10, 11 chhiar rawh.

4. Tute nge tho leh dâwn?

Khawvêl thar lo awm tûrah chuan thlâna awm mi maktaduai tam takte chu an lo tho leh ang a. Jehova an hriat loh avânga thil sual titu ṭhenkhat pawh an tho leh ang.—Luka 23:43; Tirhkohte 24:14 chhiar rawh.

Tho lehte chuan Pathian chungchâng thutak chu an zir theiin, Isua thu âwihna hmangin rinna an lantîr thei ang. (Thu Puan 20:11-13) Lo tho leh a, thil ṭha titute chuan leiah hian chatuana nunna an nei thei ang a. Mahse, tholeh ṭhenkhat chuan thil sual an la ti zawm zêl ang. Chutiang mite thawhlehna chu ‘thiam loh changa thawhlehna’ a ni ang.—Johana 5:28, 29 chhiar rawh.

5. Thawhlehna aṭangin Jehova chungchâng eng nge kan hriat theih?

Thawhlehna chu Pathianin a Fapa kan tâna a nun pe tûra a rawn tirh avânga awm thei a ni a. Chuvângin, thawhlehna chu Jehova hmangaihna leh khawngaihna târ lanna a ni.—Johana 3:16; Rom 6:23 chhiar rawh. (w11-E 06/01)

Hriat tam lehzual nân, Jehova Thuhretute tihchhuah Bible Zirtîrna Dik Tak Chu Eng Nge Ni? tih lehkhabu bung 6 leh 7-na hi en ang che.

[Phêk 20-naa milem]

Adama chu vaivut aṭanga siam a ni