Ilonga sha moohapu dhaKalunga

Mbela oonakusa oye na ngaa etegameno lyasha?

Oshitopolwa shika oshi na omapulo ngoka tashi vulika ho ipula kombinga yago noshi na omanyolo ngoka taga yamukula omapulo ngoka. Oonzapo dhaJehova otadhi ke shi nyanyukilwa okukundathana nangoye omayamukulo gomapulo ngoka.

1. Oonakusa oye na etegameno lyashike?

Sho Jesus a li a thiki muBetania shoka sha li popepi naJerusalem, okwa adha pwa pita omasiku gane okuza sho kuume ke Lasarus a si. Jesus okwa li a yi kombila yanakusa pamwe naMarta naMaria. Mbala konima yaashoka ongundu yaantu oya li ye ya kuyo. Marta naMaria kaya li tuu ya nyanyukwa sho Jesus a yumudha Lasarus!—Lesha Johannes 11:20-24, 38-44.

Marta okwa li i itaala kutya oonakusa otaya ka yumuka. Aapiya yaJehova aadhiginini oya kala yi itaala okuza nale kutya monakuyiwa Kalunga ota ka yumudha aasi opo ya ka kale ishewe nomwenyo kombanda yevi.—Lesha Job 14:14, 15.

2. Oonakusa oye li monkalo ya tya ngiini?

Nonando oonkondo dhomwenyo nenge tu tye “omufudho” odho hadhi mwenyopaleke aantu niinamwenyo, tse katu shi iishitwa yopambepo mbyoka hayi kala owala nomalutu gopanyama uule wethimbo lyontumba. (Omuuvithi 3:19; Genesis 7:21, 22) Otu li iishitwa yopanyama, twa shitwa okuza montsi yevi. (Genesis 2:7; 3:19) Onkee ano, omadhiladhilo getu ihaga vulu okulonga momukalo gwontumba ngele uuluyi wetu owa sa. Pashiholelwa, sho Lasarus a li a yumudhwa ka li a hokololele aantu kutya okwa li megulu nenge moheli, molwaashoka oonakusa kaye na shoka ye shi.—Lesha Episalomi 146:4; Omuuvithi 9:5, 10.

Osha yela kutya oonakusa ihaya mono iihuna, nelongo ndyoka kutya Kalunga oha hepeke oonakusa momulilo gwoheli kali shi lyoshili. Mboka haya longo aantu ngawo otaya lundile Kalunga thiluthilu. Edhiladhilo ndyoka lyokuhepeka oonakusa momulilo gwoheli oli li oshinima shinyanyalitha kuye.—Lesha Jeremia 7:31.

 3. Mbela otatu vulu ngaa okupopya noonakusa?

Itatu vulu okupopya noonakusa nandonando. (Episalomi 115:17) Ihe mboka haya popi naantu oyo aayengeli aakolokoshi mboka tashi vulika yi ininge ya fa nakusa. (2 Petrus 2:4) Jehova okwi indika aantu kaaya popye noonakusa.—Lesha Deuteronomium 18:10, 11.

4. Oolye taya ka yumudhwa?

Aantu omamiliyona mboka ye li moombila otaya ka yumudhwa muuyuni uupe mboka twa tegelela. Nokuli naantu yamwe mboka ya li haya longo uuwinayi molwaashoka kaaye shi Jehova otaya ka yumudhwa.—Lesha Lukas 23:43; Iilonga 24:15.

Aayumudhwa mboka otaya ka pewa ompito yi ilonge oshili kombinga yaKalunga nokuulika kutya oye na eitaalo tali longo muJesus mokukala haya vulika kuye. (Ehololo 20:11-13) Ngele aayumudhwa mboka oya kala taya longo uuwanawa, otaya ka vula okukala nomwenyo sigo aluhe kombada yevi. Ihe yamwe yomwaamboka taya ka yumudhwa otaya ka tsikila natango okulonga uuwinayi. Onkee ano, molwaashoka oohandimwe ya tya ngaaka otaya ka pangulwa shi ikolelela kiilonga yawo iiwinayi, otaku vulu okutiwa kutya otaya ka ‘yumudhilwa epangulo.’—Lesha Johannes 5:28, 29.

5. Elongekidho li na ko nasha neyumuko otali tu longo shike kombinga yaJehova?

Aantu otaya ka vula okuyumudhwa molwaashoka Kalunga okwa gandja Omwana a yambe po omwenyo gwe omolwetu. Onkee ano, elongekidho lyeyumuko oli li omaganohenda ga za kuJehova noli li wo euliko kutya oku tu hole.—Lesha Johannes 3:16; Aaroma 6:23.

Opo wu mone uuyelele wa gwedhwa po, tala ontopolwa 6 nosho wo 7 yembo ndyoka lyu ulikwa mpoka Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.

[Ethano pepandja 26]

Adam okwa shitwa okuza montsi yevi