Ithute Lentšung la Modimo

Na go na le Kholofelo ka Bahu?

Sehlogo se se rotoša dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Go na le kholofelo efe ka bahu?

Ge Jesu a be a fihla Bethania kgauswi le Jerusalema, mogwera wa gagwe Latsaro o be a šetše a na le matšatši a mane a hwile. Jesu o ile a ya mabitleng a na le Mareta le Maria, e lego dikgatšedi tša monna yo a hwilego. Go se go ye kae, ke ge lešaba le kgobokana. Na o ka akanya lethabo leo Mareta le Maria ba bilego le lona ge Jesu a be a tsoša Latsaro bahung?—Bala Johane 11:20-24, 38-44.

Mareta o be a dumela gore bahu ba tla tsošwa. Ke kgale bahlanka ba botegago ba Jehofa ba tseba gore nakong e tlago, Modimo o tla tsoša bahu gore ba tlo phela lefaseng gape.—Bala Jobo 14:14, 15.

2. Boemo bja bahu ke bofe?

Gaešita le ge matla a bophelo, goba “moya,” a phediša batho le diphoofolo, fela ga re meoya yeo e dulago mmeleng wa nama. (Mmoledi 3:19; Genesi 7:21, 22) Re dibopiwa tša nama tšeo di dirilwego ka lerole. (Genesi 2:7; 3:19) Ge bjoko bja rena bo ehwa, menagano ya rena e a fela. Ka gona, ka morago ga gore Latsaro a tsošwe, ga se a ka a bolela selo mabapi le seo a se kwelego lehung ka gobane bahu ga ba tsebe selo.—Bala Psalme 146:4; Mmoledi 9:5, 10.

Go molaleng gore bahu ga ba tlaišege. Ka gona thuto ya gore Modimo o tlaiša batho ka morago ga lehu ke ya maaka. E thomeletša Modimo. O selekišwa ke kgopolo ya go tlaišwa ga batho mollong.—Bala Jeremia 7:31.

  3. Na re ka kgona go boledišana le bahu?

Bahu ga ba kgone go bolela. (Psalme 115:17) Eupša ge barongwa ba kgopo ba boledišana le batho, ka bofora ba ka itira moya wa motho yo a hwilego. (2 Petro 2:4) Jehofa o iletša go leka go boledišana le bahu.—Bala Doiteronomio 18:10, 11.

4. Ke bomang bao ba tlago go tsošwa?

Lefaseng le lefsa leo le tlago, batho ba dimilione bao ba lego mabitleng ba tla tsošetšwa bophelong. Go tla tsošwa gaešita le ba bangwe bao ba bego ba dira dilo tše mpe ka gobane ba be ba sa tsebe Jehofa.—Bala Luka 23:43; Ditiro 24:15.

Batho bao ba tsošitšwego ba tla kgona go ithuta therešo mabapi le Modimo le go bontšha tumelo go Jesu ka go mo kwa. (Kutollo 20:11-13) Bao ba tsošetšwago bophelong gomme ba dira dilo tše di lokilego ba tla kgona go phela ka mo go sa felego mo lefaseng. Lega go le bjalo, batho ba bangwe bao ba tsošitšwego ba tla tšwela pele ba dira dilo tše mpe. Tsogo ya bona e tla ba ya go “tsogela kahlolo.”—Bala Johane 5:28, 29.

5. Tsogo e re botša eng ka Jehofa?

Tsogo e a kgonega ka gobane Modimo o rometše Morwa wa gagwe gore a tlo gafa bophelo bja gagwe bakeng sa rena. Ka gona ke pontšho ya lerato la Jehofa le botho bja gagwe bjo bogolo.—Bala Johane 3:16; Baroma 6:23.

Bakeng sa tsebišo e oketšegilego, bona dikgaolo 6 le 7 tša puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

[Seswantšho go letlakala 16]

Adama o be a bopilwe ka lerole