Lilongesa Ondaka Ya Huku

Okuti Kuna Ekevelelo lia Vana Vankhia?

Monthele ei muna omapulo hamwe uhole okulinga, nokulekesa apa movasi omakumbululo Mombimbiliya yove. Onombangi mba Jeova vena ehambu liokutomphola noove konthele yomakumbululo oo.

1. Olipi ekevelelo lio vokuankhia?

Etyi Jesus ankho ehika ko Betania popepi no Jelusalei, ankho palambale ononthiki ononkhuana tunde etyi epanga liae Lasalu ankhia. Jesus aende kelangalo na Marta na Maliya onomphange mbomulume wokuankhia. Konyima, ovanthu ovanyingi aveliongiya ponthele yavo. Upondola okusoka ehambu lia Marta na Maliya etyi Jesus apindulapo Lasalu?—Tanga João 11:20-24, 38-44.

Marta ankho utavela okuti vokuankhia mavakapindukapo. Ovaumbili vekolelo va Jeova vetyii tunde kohale, okuti komutwe Huku makatutilisa vokuankhia opo vakale vali nomuenyo kombanda yoohi.—Tanga Jó 14:14, 15.

2. Vokuankhia vekahi ñgeni?

Namphila ononkhono mbomuenyo ine “ospilitu” ikalesa ovanthu nomuenyo novinyama, onthue hanthue nospilitu mbukala vala molutu. (Eclesiastes 3:19; Gênesis 7:21, 22) Onthue tuvanthu vopahitu vatungwa nonthata. (Gênesis 2:7; 3:19) Tyina owongo wetu unkhia, omalusoke etu anyima. Ngotyo, etyi Lasalu atutiliswa kapopile natyike konthele yononkhia mbae, mokonda wokuankhia natyike vali ei.—Tanga Salmo 146:4; Eclesiastes 9:5, 10.

Tyimoneka nawa okuti, vokuankhia kavamono ononkhumbi. Moluotyo, elongeso liokuti Huku umonesa ovanthu ononkhumbi tyina vamankhi, ounkhembi. Elongeso olio, liundula Huku. Oe uluyele olusoke luokumonesa ovanthu ononkhumbi motupia.—Tanga Jeremias 7:31.

  3. Okuti tupondola okupopia no vokuankhia?

Vokuankhia kavapondola okupia. (Salmo 115:17) Mahi, tyina onoandyu onondingavivi mbupopia novanthu, mbukemba okuti onohande mbovanthu vankhia. (2 Pedro 2:4) Jeova wailika okuhanda okupopia no vokuankhia.—Tanga Deuteronômio 18:10, 11.

4. Ovalie mavakondolwa vali komuenyo?

Mouye omupe mauya, ovanthu ovanyingi-nyingi mavakondolwa vali komuenyo. Alo umwe vana valingaile ovipuka ovivi mokonda yokuhei Jeova mavakatutiliswa.—Tanga Lucas 23:43; Atos 24:15.

Vokuatutiliswa mavakalongeswa otyili konthele ya Huku opo vakale nekolelo mu Jesus Kristu, mokutavela kwe. (Revelação [Apocalipse] 20:11-13) Vana vakondoka komuenyo iya avalingi ovipuka oviwa, makakala apeho nomuenyo kombanda yoohi. Anthi, vamwe mavakatualako okulinga ovipuka ovivi. Etutilo liavo, malikakala etutilo litiwa “etutilo liekoyeso.”—Tanga João 5:28, 29.

5. Etutilo litulongesa tyi konthele ya Jeova?

Makukakala etutilo mokonda Huku watumine Omona wae opo aave omuenyo pala onthue. Iya otyo, oluembia nokankhenda ka Jeova tuhatokalele.—Tanga João 3:16; Romanos 6:23.

Opo unoñgonoke vali konthele yotyo, tala okapitulu 6 na 7 komukanda ou, walingua no Nombangi mba Jeova. Oityi Ombimbiliya Tyili Ilongesa?

[Olutalatu pefo 22]

Andau watungilue neheke