Maa Baebolo Ne Ɛhilehile Wɔ

Asoo Anyelazo Bie Wɔ Ɛkɛ Maa Mɔwuamra?

Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.

1. Anyelazo boni a wɔ ɛkɛ maa mɔwuamra a?

Mekɛ mɔɔ Gyisɛse hɔdwule Bɛtani mɔɔ bikye Gyɛlusalɛm la, ɛnee ɔ gɔnwo Lazalɛse ɛwu yeli kenle nna. Gyisɛse nee nrenya ne mɔɔ ɛwu la amediema mraalɛ Maata nee Mɛle hɔle azie zo lɔ. Yeangyɛ, menli dɔɔnwo rale ɛkɛ. Ɔda ali kɛ mekɛ mɔɔ Gyisɛse dwazole Lazalɛse vile ewule nu la, Maata nee Mɛle anye liele kpole.—Kenga Dwɔn 11:20-24, 38-44.

Ɛnee Maata die di kɛ mɔwuamra badwazo. Gyihova nɔhalɛ azonvolɛ kɔsɔɔti ɛnee ze kɛ kenlebie Nyamenle badwazo mɔwuamra ara azɛlɛ ye azo bieko.—Kenga Dwobu 14:14, 15.

2. Tɛnlabelɛ boni a mɔwuamra wɔ nu a?

Ɔwɔ nuhua kɛ ngoane ɛnwomenle maa menli nee nane kɔ zo tɛnla ngoane nu ɛdeɛ, noko yɛnle sunsum mɔɔ yɛvea nwonane sonlabaka nu a. (Nolobɔvo ne 3:19; Mɔlebɛbo 7:21, 22) Yɛle nwonane nu abɔdeɛ mɔɔ bɛvale ndɛtɛlɛ a bɛyɛle yɛ a. (Mɔlebɛbo 2:7; 3:19) Saa yɛ amelɛ ne wu a, adwenle biala mɔɔ wɔ yɛ ti anu la minli. Ɛhye ati a, mekɛ mɔɔ bɛdwazole Lazalɛse la yeanga debie mɔɔ zile wɔ ye ewule ne anzi la anwo edwɛkɛ biala la, ɔluakɛ mɔwuamra ɛnze ɛhwee.—Kenga Edwɛndolɛ 146:4; Nolobɔvo ne 9:5, 10.

Ɔda ali kɛ, mɔwuamra ɛngola ɛnde nyane. Yemɔti, ngilehilelɛ ne mɔɔ se Nyamenle yɛ menli mɔɔ ɛwu la kpɔdekpɔde la le adalɛ. Ɔsɛkye Nyamenle duma. Adwenle mɔɔ menli lɛ kɛ ɔyɛ awie mɔ kpɔdekpɔde wɔ senle nu la le ye kyibadeɛ.—Kenga Gyɛlɛmaya 7:31.

  3. Asoo yɛbahola yɛ nee mɔwuamra adendɛ?

Mɔwuamra ɛngola ɛndendɛ. (Edwɛndolɛ 115:17) Noko saa anwumabɔvolɛma mɔɔ ɛyɛ ɛtane la tendɛ kile menli a, bɛbɔ adalɛ bɛka kɛ bɛle awie bie mɔɔ ɛwu la sunsum. (2 Pita 2:4) Gyihova tua mɔdenle mɔɔ menli bɔ kɛ bɛ nee mɔwuamra kɛdendɛ la.—Kenga Mɛla ne 18:10, 11.

4. Nwane mɔ a bɛanyia ewudwazo a?

Wɔ ewiade fofolɛ ne mɔɔ ɛlɛba la anu, menli mgbe dɔɔnwo mɔɔ ɛwu la bazia ara ngoane nu. Bɛbadwazo menli mɔɔ yɛle ɛtane ɔluakɛ ɛnee bɛnze Gyihova la ati la bie mɔ bɔbɔ.—Kenga Luku 23:43; Gyima ne 24:15.

Menli mɔɔ bɛbadwazo bɛ la bɛahola azukoa Nyamenle anwo debie na bɛahile kɛ bɛdie Gyisɛse bɛdi ɔlua tieyɛ mɔɔ bɛbayɛ bɛamaa ye la azo. (Yekile 20:11-13) Bɛdabɛ mɔɔ bɛbazia bara mɔɔ bɛbayɛ mɔɔ tenrɛ la bɛadɛnla azɛlɛ ye azo dahuu. Noko akee, menli mɔɔ bɛbadwazo bɛ la bie mɔ bɛahɔ zo ayɛ ninyɛndane. Wɔ bɛ ewudwazo ne anzi, “[bɛbabua] bɛ ewule fɔlɛ.”—Kenga Dwɔn 5:28, 29.

5. Duzu a ewudwazo ne maa yɛnwu ye wɔ Gyihova anwo a?

Yɛbahola yɛanyia ewudwazo ɔluakɛ Nyamenle manle ɔ Ra ne rawule manle yɛ. Ɛhye ati, ɔle ɛlɔlɛ nee ɛlolɛ mɔɔ Gyihova ɛla ye ali a.—Kenga Dwɔn 3:16; Wulomuma 6:23.

Saa ɛkpondɛ nwolɛ edwɛkɛ dɔɔnwo a, nea buluku ɛhye, Duzu A Baebolo ne Kilehile Amgba A? mɔɔ Gyihova Alasevolɛ ɛyɛ la tile 6 nee 7.

[Nvoninli wɔ mukelɛ 22]

Bɛvale ndɛtɛlɛ a bɛbɔle Adam a