Diospa Palabranmanta yachay

¿Kanchu ima suyakuypas wañuqkunapaq?

Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.

1. ¿Ima suyakuymi kan wañuqkunapaq?

Jerusalenpa hichpanpi Betania sutiyoq llaqtaman Jesus chayaruptinmi amistadnin Lazaroqa tawa punchawña wañusqa kasqa. Wañukuqpa paninkuna Marta hinaspa Mariawanmi Jesusqa rirqa sepulturaman, hinaptinmi chaylla achka runakuna hamurqaku. ¡Mayna kusisqachá Martawan Mariaqa tarikurqaku turin Lazarota Jesus kawsarirachiptin! (Leey Juan 11:20-24, 38-44.)

Martaqa yacharqam wañuqkuna kawsarimunantaqa. Diosta serviqninkunaqa ñawpaqmantaraqmi yachanku wañuq runakunataqa Dios kay Pachapi kawsarichinanta. (Leey Job 14:14, 15.)

2. ¿Imaynam tarikunku wañusqakunaqa?

Runakunatawan animalkunata kawsachiq kallpa otaq “espiritu” kawsachiptinpas manam cuerponchik ukupiqa angel hina espirituqa kanchu nitaq chayna espirituchu ñoqanchikpas kanchik (Eclesiastes 3:19; Genesis 7:21, 22). Allpamanta rurasqa runam kanchik (Genesis 2:7; 3:19). Wañuspanchikqa manañam imatapas piensanchikchu, sientenchikchu nitaq ñakarinchikchu, chayraykum Lazaroqa kawsariramuspan mana willarqachu imam pasasqanmantaqa. (Leey Salmo 146:4; Eclesiastes 9:5, 10.)

Qawasqanchikman hinaqa manam wañuqkunaqa ñakarinkuchu. Chaymi mana allin runakuna wañuspanku ñakarisqankumanta yachachiyqa manam ciertochu. Chayqa manam tupanchu Diospa yachachisqanwanqa, payqa cheqninmi runa kañasqa kananmanta yachachisqankutaqa. (Leey Jeremias 7:31.)

 3. ¿Parlachwanchu wañuqkunawanqa?

Wañusqakunaqa manam rimankuchu (Salmo 115:17). Demoniokunam ichaqa runakunawan rimanku wañuqpas rimachkanman hina (2 Pedro 2:4). Chayraykum Diosqa mana munanchu wañuqkunawan rimay munasqanchiktaqa. (Leey Deuteronomio 18:10, 11.)

4. ¿Pikunam kawsarimunqaku?

Diospa prometesqan mosoq Pachapiqa millonnintin wañuqkunam kawsarimunqaku, kawsarimunqakutaqmi Diospa kamachikuyninmanta mana yachaspanku mana allin ruraqkunapas. (Leey Lucas 23:43; Hechos 24:15.)

Kawsarimuq runakunaqa Diosmantam cheqapta yachanqaku hinaspam Jesuspi iñisqankuta qawachinqaku payta kasukuspanku (Apocalipsis 20:11-13). Allin ruraqkunaqa kay Pachapim wiñaypaq kawsanqaku. Mana allinta hinalla ruraspankuqa manam wiñaypaqchu kawsanqaku, kawsarimuspankupas Jesuspa nisqanman hinam ‘[juzgasqa] kanankupaq’ kawsarimunqaku. (Leey Juan 5:28, 29.)

5. ¿Imatam Diosmanta yachachiwanchik kawsarimuyqa?

Ñoqanchikrayku wañunanpaq Churinta kachamusqanraykullam kawsarimuyqa kanqa. Chaywanmi qawachiwanchik Jehová Diosqa hatu-hatun kuyakuyninta. (Leey Juan 3:16; Romanos 6:23.)

Astawan yachayta munaspaqa qawariy ¿Imatapunim Bibliaqa yachachin? libropa 6 hinaspa 7 kaq yachachikuyninkunata, kay libroqa Jehová Diospa testigonkunapa rurasqanmi.

[16 kaq paginapi dibujo]

Allpamantam Adanqa rurasqa karqa