Bâ ye so Bible afa

Mbeni beku ayeke dä teti azo so akui awe?

Article so ayeke sigigi na ahundango tënë so mo lingbi ti hunda tere ti mo na ni nga a yeke fa na mo ndo so mo lingbi ti wara akiringo tënë ni dä na yâ ti Bible ti mo. A yeke nzere mingi na aTémoin ti Jéhovah ti sara lisoro na mo na ndo ti akiringo tënë ni.

1. Beku wa la ayeke dä teti azo so akui awe?

Na ngoi so Jésus asi na Béthanie so ayeke nduru na Jérusalem, kamarade ti lo Lazare akui asara lango osio awe. Jésus na aita ti Lazare, Marthe na Marie, ague na ndo so a lu kuâ ni dä. Hio tongaso, gbâ ti azo abungbi. Tara ti bâ nzerengo tere ti Marthe na Marie na ngoi so Jésus azingo Lazare na kuâ!​—Diko Jean 11:20-24, 38-44.

Marthe amä na bê so a yeke zingo ande akuâ. Awakua ti Jéhovah so ayeke be-ta-zo ahinga so na yâ ti ngoi so ayeke ga, Nzapa ayeke zingo azo so akui awe ti kiri ti duti na fini na ndo ti sese.​—Diko Job 14:14, 15.

2. Dutingo ti azo so akui awe ayeke tongana nyen?

Zo ayeke pëpe na mbeni âme so ayeke ngbâ na fini na peko ti kuâ ti lo (Ézéchiel 18:4). A leke e na pupu-sese ti sese (Genèse 2:7; 3:19). Na ngoi so mongoli ti e akui, e hinga ye oko mbeni pëpe. A yeke tongaso si na pekoni so a zingo Lazare na kuâ, lo sara tënë oko pëpe na ndo ti ye so asi na lo na ngoi so lo yeke kuâ ndali ti so akuâ ahinga ye oko pëpe.​—Diko Psaume 146:4; Zo-ti-fa-tene 9:5, 10.

A yeke polele so azo so akui awe alingbi pëpe ti bâ pasi. Tongaso, tënë so a tene Nzapa ayeke sara sana na azo na peko ti kuâ ti ala ayeke tënë ti mvene. So ayeke tenengo mvene na ndo ti Nzapa. Tënë ti sarango sana na azo na yâ ti wâ ayeke mbeni ye so Nzapa aye ni oko pëpe.​—Diko Jérémie 7:31.

  3. E lingbi ti sara tënë na azo so akui awe?

Azo so akui awe alingbi ti sara tënë pëpe (Psaume 115:17). Me na ngoi so asioni ange asara tënë na azo, ala lingbi ti handa azo atene ani yeke yingo ti azo so akui awe so (2 Pierre 2:4). Jéhovah aye pëpe ti tene e gi ti sara tënë na azo so akui awe.​—Diko Deutéronome 18:10, 11.

4. Azo wa la ayeke kiri ande na fini?

Na yâ ti fini dunia so ayeke ga, azo kutu mingi so ayeke na yâ ti dû ti kuâ ayeke kiri ande na fini. Même ambeni zo so asara ye ti sioni ndali ti so ala hinga Jéhovah pëpe a yeke zingo ande ala.—Diko Luc 23:43; Kusala 24:15.

Azo so a yeke zingo ande ala ayeke wara lege ti manda tâ tënë na ndo ti Nzapa nga ti fa so ala mä na bê na Jésus na lege so ala yeke mä yanga ti lo (Apocalypse 20:11-13). Azo so akiri na fini si asara ye ti nzoni ayeke wara lege ti duti na fini lakue lakue na ndo ti sese. Ye oko, ambeni zo so azingo na kuâ ayeke ngbâ ande ti sara aye ti sioni. Ti azo tongaso, “zingongo ti ala na kuâ ayeke ti wara ngbanga.”​—Diko Jean 5:28, 29.

5. So Jéhovah ayeke zingo akuâ afa nyen na e na ndo ti lo?

A yeke ndali ti Molenge ti Nzapa so lo tokua lo ti mû fini ti lo ndali ti e la asara si lege ayeke dä ti tene a zingo ande akuâ. Tongaso, ye so afa ndoye ti Jéhovah nga na kota nzobe ti lo.​—Diko Jean 3:16; aRomain 6:23.

Ti wara asango mingi na ndo ni, bâ chapitre 6 na 7 ti buku so Bible afa nyen biani?, so aTémoin ti Jéhovah asigigi na ni.

[Foto na lembeti 22]

A sara Adam na pupu-sese ti sese