Aʻoaʻoga a le Tusi Paia

Pe e Iai se Faamoemoe o Ē ua Maliliu?

Ua lāgā i lenei mataupu nisi o fesili atonu na e taumānatu ai, ma faasino mai i le Tusi Paia tali. E fiafia Molimau a Ieova e talatalanoa ma oe e faatatau i nei tali.

1. O le ā le faamoemoe o ē ua maliliu?

Ua fā aso talu ona maliu Lasalo le uō a Iesu, ae taunuu loa Iesu i Petania e lata ane i Ierusalema. Na ō atu i le tuugamau Iesu, ma tuafāfine o Lasalo, o Mareta ma Maria. E leʻi umi ae lolofi atu le toʻatele o tagata. Pe e mafai ona e faaata le fiafia o Mareta ma Maria ina ua toe faatūina e Iesu Lasalo?​—Faitau le Ioane 11:20-24, 38-44.

Na talitonu Mareta o le a toetutū mai ē ua maliliu. Ua leva ona iloa e auauna faamaoni a Ieova, o le a toe faatutū mai i le lumanaʻi e le Atua ē ua maliliu, ina ia toe ola i le lalolagi.​—Faitau le Iopu 14:14, 15.

2. O le ā le tulaga o ē ua maliliu?

O loo iai i tagata ma meaola uma le “agaga” po o le malosi o le ola e faaauau ai ona ola, ae e leai se agaga e ola pea pe a tatou feoti. (Failauga 3:19; Kenese 7:21, 22) O i tatou o tagata na faia mai le efuefu. (Kenese 2:7; 3:19) Pe a tatou feoti ma lē toe ola o tatou faiʻai, ua lē toe iai foʻi ni o tatou manatunatuga. O lea, ina ua toe faatūina mai Lasalo, e leai sana tala e faatatau i le mea sa iai ina ua maliu, auā o ē ua oti e latou te lē iloa se mea.​—Faitau le Salamo 146:4; Failauga 9:5, 10.

E manino la, e lē o puapuagatia ē ua maliliu, ona e lē moni le aʻoaʻoga e faapuapuagatia e le Atua tagata pe a maliliu. Ua faaleaga e lenei aʻoaʻoga le Atua. E matuā ʻinoʻino o ia i lea manatu e faapea, e faapuapuagatia tagata i le afi.​—Faitau le Ieremia 7:31.

  3. Pe e mafai ona tatou talanoa i ē ua maliliu?

E lē mafai ona tautatala ē ua oti. (Salamo 115:17) Ae ua faafoliga mai e agelu leaga o i latou o agaga o ē ua oti, i le talanoa mai i tagata. (2 Peteru 2:4) O lea la, e faasā e Ieova le taumafai e talanoa atu i ē ua oti.​—Faitau le Teuteronome 18:10, 11.

4. O ai o le a toetutū mai?

O le a toetutū mai i le lalolagi fou le faitau miliona o ē o loo i tuugamau. E oo foʻi i ē na faia mea leaga ona o lo latou lē iloa o Ieova, o le a toe faatutūina mai.​—Faitau le Luka 23:43; Galuega 24:15.

O le a mafai e i latou o le a toetutū mai ona aʻoaʻo le mea moni e uiga i le Atua, ma faaalia le faatuatua iā Iesu e ala i le usitaʻia o ia. (Faaaliga 20:11-13) O ē e toetutū mai ma faia mea lelei, o le a olioli i le ola e faavavau i le lalolagi. Peitaʻi, e iai lava ē e toetutū mai e faia pea mea leaga. O lo latou toetutū mai o le “toetutū i le faamasinoga.”​—Faitau le Ioane 5:28, 29.

5. O le ā ua taʻu mai e le toetū e uiga iā Ieova?

Ua mafai ona faataunuu le toetū ona na auina mai e le Atua lona Alo e foaʻi mai lona ola mo i tatou. Ua faailoa mai i lenei faatulagaga le alofa ma le agalelei faifua o Ieova.​—Faitau le Ioane 3:16; Roma 6:23.

[Ata i le itulau 16]

Na faia Atamu mai i le efuefu