Etshama oma l’ɔtɛkɛta wa Nzambi

Onde elongamelo kɛmɔtshi kekɔ lo dikambo dia wavɔ?

Sawo nɛ monyiyaka ambola amɔtshi wele ondo wɛ amboyaokaka ndo diɔ mɛnyaka lɛnɛ akokayɛ ntana ekadimwelo lo Bible kayɛ. Ɛmɛnyi wa Jehowa wayɔngɛnangɛna dia nkɛtshanya layɛ ekadimwelo ɛsɔ.

1. Elongamelo kakɔna kele l’anto wavɔ?

Etena kakakome Yeso la Bɛtaniya suke la Jerusalɛma, lâsɔ ko ɔngɛnyi ande Lazaro ambovɔ aya nshi nyɛi. Yeso akatshu otsha lo diombo nde la Mariya la Mata akadiyɛnde la ɔnɛ lakavu. Kombeta edja, olui w’anto wakatshumana. Onde wɛ kokaka nkanyiya ɔngɛnɔngɛnɔ waki la Mata nde la Mariya etena kakôlola Yeso Lazaro?—Adia Joani 11:20-24, 38-44.

Mata aki la mbetawɔ k’ɔnɛ wanɛ wakavu wayolɔ. Ekambi waki Jehowa wa kɔlamelo wakeyaka dia lo nshi yayaye, Nzambi ayolola wanɛ wakavu dia vɔ nsɛna nto lanɛ la nkɛtɛ.—Adia Jobo 14:14, 15.

2. Eongelo kakɔna kele l’anto wambovɔ?

Kânga mbele wolo wa lɔsɛnɔ, kana “nyuma,” kimanyiyaka di’anto la waa nyama monga la lɔsɛnɔ, sho kema la nyuma katetemala nsɛna l’ɔkɔngɔ wa nyɔi ka demba. (Undaki 3:19; Etatelu 7:21, 22) Tekɔ ditongami diakatongama oma lo ditshu. (Etatelu 2:7; 3:19) Etena kavɔ onto, wɔɔngɔ ndo tokanyi tande ndanaka. Ɔnkɔnɛ, l’ɔkɔngɔ wa nde mbolɔ, Lazaro kombuta ndoko dikambo dia woho wakinde lo diombo nɛ dia anto wambovɔ haweye ndoko dikambo.—Adia Osambu 146:4; Undaki 9:5, 10.

Lo mɛtɛ, anto wambovɔ hawosowe. Ɔnkɔnɛ, wetshelo w’ɔnɛ Nzambi soyaka anto wambovɔ wekɔ kashi. Wetshelo ɔsɔ mɔnyɔlaka Nzambi. Kanyi y’ɔnɛ anto soyamaka lo lowenga la dja mbonyangiyaka efula.—Adia Jeremiya 7:31.

  3. Onde sho kokaka ntɛkɛta l’anto wambovɔ?

Anto wambovɔ hawokoke ntɛkɛta. (Osambu 115:17) Koko, etena katɛkɛta ɛdiɛngɛ l’anto vɔ mbeyaka nsɛma ɔnɛ wekɔ ekishi w’anto wakavu. (2 Petero 2:4) Jehowa akatoshimbe diaha sho mpemba ntɛkɛta l’anto wambovɔ.—Adia Euhwelo k’Elembe 18:10, 11.

4. Waa na wayolɔ?

L’andja w’oyoyo wayaye, miliyɔ y’anto yele lo waombo wayolwama. Kânga anto amɔtshi wakatshaka akambo wa kɔlɔ l’ɔtɛ wakiwɔ kombeya Jehowa, wayolwama.—Adia Luka 23:43; Etsha 24:15.

Wanɛ wayolwama, wayetshama akambo wa mɛtɛ wendana la Nzambi ndo wayɛnya mbetawɔ kawɔ le Yeso Kristo lo mbokitanyiya. (Enyelo 20:11-13) Wanɛ wayolwama ndo wayosalaka akambo w’ɔlɔlɔ, wayɔsɛnaka pondjo pondjo la nkɛtɛ. Koko anto amɔtshi wayolwama, wayotetemala nsala akambo wa kɔlɔ. Vɔ “wayulo l’elumbwelu.”—Adia Joani 5:28, 29.

5. Eolwelo atotɛtɔ lo dikambo dia Jehowa?

Eolwelo kayoyala nɛ dia Nzambi akatome Ɔnande dia nde ndjokimɔ lɔsɛnɔ lande lo dikambo diaso. Ɔnkɔnɛ, ɔsɔ ekɔ djembetelo ya ngandji k’otamanya kaki Jehowa.—Adia Joani 3:16; Romo 6:23.

Dia mbeya awui akina wendana la daka dia lo Bible dia eolwelo, enda tshapita 6 ndo 7 ya dibuku nɛ, Bible etshatɔ mɛtɛ? diakatondjama oma le Ɛmɛnyi wa Jehowa.

[Osato wa lo lɛkɛ 26]

Adama akatongama oma lo ditshu