Amwiiye Ncolyaamba Jwi Lya Leza

Sena Kuli Bulangizi Bwabafwide?

Cibalo eeci cili amibuzyo ambweni njomwakalibuzyide kale alimwi cilatondezya nkomukonzya kubujana bwiinguzi mu Bbaibbele lyanu. Bakamboni ba Jehova bayookkomana kubandika andinywe bwiinguzi kumibuzyo eeyi.

1. Ino bafwide bajisi bulangizi nzi?

Ciindi Jesu naakasika ku Betaniya munsi-munsi aku Jerusalemu, Lazaro mweenzinyina wakafwide kale kwamazuba one. Jesu wakainka kunamaumbwe antoomwe a Marta a Mariya, ibacizyi ba Lazaro. Mukaindi kasyoonto, bantu bakabungana. Amuyeeye buyo mbwaakakkomana Marta a Mariya ciindi Jesu naakamubusya Lazaro.—Amubale Johane 11:20-24, 38-44.

Marta wakali kusyoma kuti bafwide bayoobuka. Babelesi ba Leza basyomeka balizyi kuti kumbele, Leza uyoobabusya bafwide kutegwa bakapone alimwi anyika.—Amubale Jobu 14:14, 15.

2. Ino bafwide bali muciimo cili buti?

Nokuba kuti nguzu zipa buumi, naa kuti “muuya,” zipa kuti bantu abanyama kabapona, swebo tatuli myuuya iijisi buyo mubili wanyama. (Mukambausi 3:19; Matalikilo 7:21, 22) Tuli zilenge zyanyama zyakapangwa kuzwa kubulongo. (Matalikilo 2:7; 3:19) Ibongo bwafwa, imizeezo ilamana. Aboobo, naakabusyigwa Lazaro kunyina ncaakaamba cakamucitikila ciindi naakafwide akaambo kakuti bafwide tabazyi cintu cili coonse.—Amubale Intembauzyo 146:4; Mukambausi 9:5, 10.

Masimpe, bafwide tabakonzyi kupenga. Aboobo njiisyo yakuti Leza ulabasubula bantu bafwa taili yamasimpe. Ibejelezya Leza. Imuzeezo wakupenzya bantu mumulilo ulamusesemya Leza.—Amubale Jeremiya 7:31.

  3. Sena tulakonzya kwaambaula abafwide?

Bafwide tabakonzyi kwaambaula. (Intembauzyo 115:17) Ciindi bangelo babyaabi nobaambaula abantu, balicengeezya kuba muuya wamuntu uufwide. (2 Petulo 2:4) Jehova ulakasya kusola kwaambaula abafwide.—Amubale Deuteronomo 18:10, 11.

4. Ino mbaani bayoobusyigwa?

Munyika mpya iiboola, mamiliyoni aabantu bali muzyuumbwe bayoobuka. Nobaba baabo bakali kucita zibi akaambo kakuti tiibakamuzyi Jehova bayoobusyigwa.—Amubale Luka 23:43; Milimo 24:15.

Bantu ibayoobusyigwa bayooba acoolwe cakwiiya kasimpe kajatikizya Leza akusyoma Jesu kwiinda mukumumvwida. (Ciyubunuzyo 20:11-13) Aabo bayoobusyigwa akucita zyintu zibotu bayookkomana kupona kukabe kutamani anyika. Pele bamwi ibayoobusyigwa bayoozumanana kucita zyintu zibi. Aboobo bubuke bwabo buyooba “bubuke bwalubeta.”—Amubale Johane 5:28, 29.

5. Ino bubuke butondezya nzi kujatikizya Jehova?

Bubuke bulakonzyeka nkaambo Leza wakatuma Mwanaakwe kuzyootufwida. Aboobo eeci ncitondezyo caluyando aluzyalo lwa Jehova.—Amubale Johane 3:16; Baloma 6:23.

Kutegwa muzyibe zinji, amubone zibalo 6 a 7 mubbuku eeli, Ino Ncinzi Cini Bbaibbele Ncoliyiisya?,  lyakamwaigwa a Bakamboni ba Jehova.

[Cifwanikiso icili apeeji 26]

Adamu wakalengwa kuzwa kubulongo