Wantuku masiya xTachuwin Dios

¿Pi tlan nalatamaparakgo tiku nikgonitta?

Uma artículo namakgtayayan natekgsa kmiBiblia xtakgalhtin makgapitsi takgalhskinin nema wix max katsiputuna. Komo, lakaskina xtatayananin Jehová tlan natalikgalhtawakgakgoyan umakgolh takgalhskinin.

1. ¿Pi tlan nalatamaparakgo tiku nikgonitta?

Akxni chalh Jesús kBetania, akgtum aktsu kachikin lakatsu kJerusalén, Lázaro xʼamigo Jesús, akgtatita kilhtamaku xninit. Jesús, Marta chu María ankgolh niku xmaknukanit, lakapara lhuwa tastokgkga. ¡Kaj kalakpuwanti la max paxuwakgolh Marta chu María akxni akxilhkgolh pi Jesús malakastakwanilh! (Kalikgalhtawakga Juan 11:20-24, 38-44.)

Marta xkanajla ktalakastakwanat. Chuna, xlakskujnin Jehová makgasa katsikgo pi mima kilhtamaku akxni Dios nakamalakastakwani kKatiyatni tiku nikgonitta. (Kalikgalhtawakga Job 14:14, 15.)

2. ¿La wilakgolh tiku nikgonitta?

Maski «espíritu» wa litliwakga nema tlawa pi nalatamakgo latamanin chu animales, akinin ni espíritus tiku kgalhikgo xlukut chu xtiyatliwakan (Eclesiastés 3:19; Génesis 7:21, 22). Akinin litatlawanitaw pokgxni (Génesis 2:7; 3:19). Akxni niy kiʼakskititkan nialhtu lakpuwanaw. Wa xlakata akxni Lázaro xlakastakwananitta, nituku lichuwinalh akxni xninit xlakata ninin, nituku makgkatsikgo chu nitu lipatinankgo. (Kalikgalhtawakga Salmo 146:4; Eclesiastés 9:5, 10.)

Chuna la akxilhnitaw, ninin ni patinankgo. Wa xlakata tamasiy nema anan pi kamapatinikan tiku ni tlan xlikatsikgo, ni xlikana. Ama tamasiy nitlan lichuwinan Dios, Jehová nipara tsinu akxilhputun nakalhkuyakan latamanin. (Kalikgalhtawakga Jeremías 7:31.)

 3. ¿Tlan nakatachuwinanaw tiku nikgonitta?

Ninin nila chuwinankgo (Salmo 115:17). Pero demonios tlan katachuwinankgo latamanin chu katakgaxmatli pi wa xʼespíritu tiku ninit (2 Pedro 2:4). Wa xlakata, Jehová ni lakaskin pi nakatachuwinanputunaw tiku ninit. (Kalikgalhtawakga Deuteronomio 18:10, 11.)

4. ¿Tiku nataspitparakgo klatamat?

Kxasasti kakilhtamaku, millones latamanin tiku anta wilakgolh kputaknun, Jehová nakamalakastakwani, asta wantiku tlawakgolh tuku nitlan xlakata ni xkatsikgo xlimapakgsin Dios. (Kalikgalhtawakga Lucas 23:43; Hechos 24:15.)

Tiku nakamalakastakwanikan tlan nakatsinikgo xlakata Dios chu nalimasiyakgo pi kgalhakgaxmatkgo chu nakanajlanikgo Jesús (Apocalipsis [Revelación] 20:11-13). Tiku tlan nalikatsikgo putum kilhtamaku nalatamakgo kKatiyatni. Pero wantiku chuntiya natlawakgo tuku nitlan ni katikamaxkika talakaskin makgas nalatamakgo chuna la tiwa Jesús, «nakamalakastakwanikan xlakata nakatalakaxlakan». (Kalikgalhtawakga Juan 5:28, 29, NM.)

5. ¿Tuku kinkamasiyaniyan Dios xlakata talakastakwanat?

Dios tlan kinkamalakastakwaniyan xlakata makamilh xKgawasa chu makamastalh xlatamat kimpalakatakan. Uma limasiya pi Dios lu lhuwa kinkapaxkiyan. (Kalikgalhtawakga Juan 3:16; Romanos 6:23.)

Komo tlakg katsiputuna xlakata uma, kaʼakxilhti capítulo 6 chu 7 xla libro ¿Tuku xlikana masiya Biblia?, nema tlawakgonit xtatayananin Jehova.

[Epígrafe xla página 22]

Adán pokgxni litlawaka