Chanubtaseletik ta skʼop Dios

¿Mi oy van spatobil oʼontonal ta sventa li buchʼutik chameme?

Li mantal liʼe tskoltaot sventa xasabe stakʼobil ta aVivlia atuk jlom sjakʼobiltak ti xuʼ van oy jech ajakʼojbe abae. Li sjakʼobiltak liʼe xuʼ xachan xchiʼuk junuk yajrextiko Jeova mi jech chakʼane.

1. ¿Kʼusi spatobil oʼontonal oy sventa li buchʼutik chameme?

Kʼalal kʼot ta Betania li Jesuse, jun bikʼit lum ti nopol xil li Jerusalene, oy xaʼox ta xchanibal kʼakʼal xchamel li Lázaro ti jaʼ yamigo li Jesuse. Kʼalal bat ta smukinal Lázaro li Jesuse, te xchiʼuk batel li Marta xchiʼuk María, ti jaʼ xchiʼiltak ta vokʼel li Lazaroe, ta jlikel noʼoxe ep xa li krixchanoetik tee. ¿Mi xnop xa noʼox avuʼun kʼu to yepal imuyubajik li Marta xchiʼuk María ti kʼalal ichaʼkuxesbat li xchiʼilik ta vokʼele? (Kʼelo Juan 11:20-24, 38-44.)

Li Martae xchʼunoj onoʼox ti oy li chaʼkuxesele. Yuʼun li yajtuneltak Jeovae snaʼojik ti Diose ta xchaʼkuxes ta tsʼakal liʼ ta Balumil li buchʼutik chamemike. (Kʼelo Job 14:14, 15.)

2. ¿Kʼu yelan oy li animaetike?

Li krixchanoe muʼyuk xchʼulel ti mu snaʼ xchame. Yuʼun ta pukuk pasbilutik (Génesis 2:7; 3:19). Kʼalal mi cham o mi paj ta abtel li jchinabtike muʼyuk xa kʼusi ta jnoptik. Jaʼ yuʼun kʼalal chaʼkuxi li Lazaroe muʼyuk laj yal kʼuyelan kʼalal ichame, yuʼun li buchʼutik chamemike mu xa kʼusi tsnopik xchiʼuk mu xa kʼusi chaʼiik. (Kʼelo Salmo 146:4; Eclesiastés 9:5, 10.)

Jech kʼuchaʼal laj xa kiltike, li buchʼutik chamemike muʼyuk xa chil svokolik. Jaʼ yuʼun mu me jechuk ti chalik ti chichʼik ilbajinel li buchʼutik chopol stalelalik echʼ ta xkuxlejalike. Li chanubtasel taje ta xchopol kʼopta li Diose, yuʼun li stuke mu lekuk chaʼi ti chichʼ chikʼel ta kʼokʼ li krixchanoe. (Kʼelo Jeremías 7:31.)

  3. ¿Mi xuʼ van jkʼopontik li buchʼutik chamemike?

Li buchʼutik chamemike mu xa xkʼopojik (Salmo 115:17). Pe jaʼuk li pukujetike xuʼ skʼoponik li krixchanoetike, jaʼ yuʼun jaʼ xa yechʼomal ye yaʼeluk li buchʼutik chamemike (2 Pedro 2:4). Jaʼ yuʼun, li Jeovae chal ti mu stakʼ ti ta jkʼan ta jkʼopontik li buchʼutik chamemike. (Kʼelo Deuteronomio 18:10, 11.)

 4. ¿Buchʼutik ta xchaʼkuxiik?

Mi achʼ xaʼox li Balumile, ta smiyonal xa noʼox krixchanoetik ta xchaʼkuxiik, yuʼun akʼo mi chopol kʼusitik la spasik ta skoj ti mu xojtikinik li smantaltak Jeovae ta xchaʼkuxiik. (Kʼelo Lucas 23:43, NM; Hechos 24:15.)

Li krixchanoetik ti ta xchaʼkuxiike, xuʼ me xchanik li kʼusi melel ta sventa Diose xchiʼuk xuʼ xakʼ ta ilel xchʼunel yoʼontonik ta stojolal Jesús kʼalal chchʼunik mantale (Apocalipsis 20:11-13). Li buchʼutik lek tspas stalelike ta me skʼupinik li kuxlejal sbatel osil liʼ ta Balumile. Pe jaʼuk li buchʼutik jaʼ ta spasik-o li kʼusi chopole muʼyuk me chkuxiik sbatel osil, jaʼ xa noʼox «[ch]chaʼcuxiic loqʼuel sventa chbatic ta tojob mulil» jech kʼuchaʼal laj yal Jesuse. (Kʼelo Juan 5:28, 29.)

5. ¿Kʼusi chakʼ kiltik sventa Dios li chaʼkuxesele?

Ta skoj ti la stak tal xNichʼon li Dios sventa xakʼ ta matanal xkuxlejale xuʼ xchaʼkuxi li animaetike. Taje jaʼ me jech chakʼ ta ilel slekil yutsil yoʼonton li Jeovae manchuk mi mu jtatik-o. (Kʼelo Juan 3:16; Romanos 6:23.)

Mi cha kʼanbe to mas yaʼyejale, kʼelo li kapitulo 6 xchiʼuk 7 li ta livro liʼe, ti pasbil yuʼun yajrextikotak Jeovae.

[Lokʼol ta pajina 16]

Li Adane ta pukuk laj yichʼ pasel